TUKHAWM AMI ṬHANGPUITU DING KA NEI NAWH

Rev. Dr. H.M. Songate

Rev. Dr. H.M. Songate

“Pu, tui ahung infâwn pha ami ṭhuoitu ding ka nei ve nawha anih” John 5:7

Kum 38 zet zeng puma tui, Vantirkoin an sukfâwn nghâk chu ava sawt veng veng de aw! Ama khât chaua nghâk nisien chu adan aum deua. Mi tamtak, zeng ni kherlo, damnaw ṭuonrang taktak dam kha an tam hle ding ana! A ṭuon muong deuhai khawm sungkuo hrat tak tak vantirko hung le hung lova tuia zuk phûm chawt el nghâk kha an sip el ding ana. Ka ngaituo chang chu hi zengpa hi mi naran chung chu ani hrim hrim! Mi dâwthei tak, tuorsel tak le beiseina insangtak nei zing mi anih. Ei ni rawi thingtlangmi hnam hai hei pei chi chu ani naw tawp el! Sina thabo, lengvâk meimei le lekha tiem peilo hai thaw chi chu an nawh! Thabo leia zana zal vat pei lo, thabo leia inhnu taka tho hlak, teireina neinaw hai tading chun nghawk um hleng a tih. Eini rawi ni inla thi dei tang ei tih! Fak ding khawm kha anei mumal am chu! Damnaw po po lai khan a nghâk sawt tak ani ka ring bawk! Nghâktu umlo damnaw chu mi lungsietum tak an nih. Hospital ah vawi iemanizat ka um ve taha, damnaw nghâktu bo chu ka hmu vâng em em. Ṭhangpuitu ding nghâka kum 38 lai khuma zal el ta chu lungsiet a um em em anih. Chuleiin, Isu’n ava pan vang vang kha thil inza um tak anih. Isu pienghma kum 5 kum 6 vel lo zal tah anih. A nghâk sawt veng veng hle el! Isu nghâktuhai an thlâwn ngai naw zie a suk lang!

PATHIEN I NGHÂK SAWT TA’M?

Unau, nang teh Isu hi iengchen am I nghâk ve a? I nghâk nghawk vieu el tam? Thuhriltu hmingthang Spurgeon a nuhmei kha kum 25 tho thei lovin khumah a zal an tih. Ruth Graham Bell, Billy Graham a nuhmei khawm kha kum 10 vel a thi hma’n wheelchair in an nawr anih. Taksa damna ding dam, thlarau malsawmna ding dam, nauhai chunga dam, harsatna dang dang leiin Isu kum iengzam I nghak ve ta a? Kei ve bawk chu, vawikhat ka nuhmei Lalbeisei ni 5 sung food poison leiin hospital ah a uma. Sawt ka va ti lawm lawm de! Ringnawtu Kor le Vaihai damnaw dinga ṭha tak tak Guwahati ah anlo tam zie ka hmu dawk pha!! Chuleiin, hilaia zengpa hi ka tluknaw emem anih. Sukdamtu ding alo nghâk fan fan kha ropui ka ti em em. Tulaia damnaw inrik tamtak chu sorkar ah mani inthat phalna an hni rawp hlak. Kum 38 nghâkpa hi mi ropui tak anih. “Aw nghâk zingla phunnawi lo takin” ti hla kha ama rawiin sak inla inhawi ngawt atih! Lung inrawm taktak, mi dem hmang le chier hmang, khel hril pawi ti der lo hai insuk thlarau mi vieu bawk si hai le hi hla hi avel vela ei sak lem chun an thlang nawk ei inlau hle hlak anih! Chier inthluok ngailo, tuorsel, lung inuoi tak, ringna hrattak nei le thuawi mi a nih. Damtlâk hlie hlie anih

ṬHUOITU DING NEILO!

Ka lungril themtak chu zengpa ṭawngkam, “Pu, tui ahung infâwn pha ami ṭhuoitu ding tukhawm ka nei nawha anih” ati kha anih. Khawvel mipui hmun thuma ṭhea hmun hni neka tamlem haiin vawisun ni chen hin hi thu hi an lan zawt zing anih ti ka hang hmu chu ka lungril  a na em em! “Tukhawm Krista kuoma mi ṭhuoilut tu ding ka nei nawh an nawm” ti tu ding anva tam de aw! Thlarau bohmang hi kohran nisien ringtu mimal hai khawmin ‘hmangaina tak tak’ ei nei tlawm ta hle in ka hmu. ‘Thlarau bohmang’ ei hang ti de naka chu thlarau bohmang invawi em em mimal le kohran an tam bek bek nawh. Thawdan naran in feltak le mawihnai taka dan zawkimna ah ei hmang chauin ka hmu. Chanchin Ṭha thu a hrie nawhai laia va khêkpui chu hrillo, eini sunga takngiel khawm ‘diluted gospel’ chau naw hril ding ei hau ta naw ahawi. Chanchin Ṭha hi mi po po ta ding ani zing lai “Hril lovin iengtinam hre thei an ta?” Dr. Os Hilman in “Pathien thilthaw chu a naupa Isu sandamna dinga ahungtir kha ana, Isu thilthaw chu Sandamna sin thaw ana, ringtuhai mawphurna chu thiempu sin anga ringnawtu hai hung thuoilut anih” alo ti hi an dik hle anih. Isu ngeiin “Pa’n ami tir ang bawkin ka tir cheu hi” John 20:21 alo tih. Ringtuhai hin ei thawding tak ei thaw zo naw pha chu ‘ei thaw naw ding ei thaw lem hlak’. Kohran hai hin ei ‘Homework’ hi ei hne naw em em. Ei inkhawm ṭawk ṭawk a. Khawm chu tlawmngai mana thawlui deu angai nisien ahawi! Ei homework ei thaw naw leia thil umhai tlawmte hang tarlang met inla:

  • India rama Christian chu 2.4% anih. Nitin ringthar 10000 khat vel India ram sungah lâklut a ngai anih. Kohran tinin kumkhat sunga ringthar inlak zat kha lo hisap ve el ro! Kohran member tam nuom leia mani statistic sukpung hlak hai khan ngaiven a ṭha! Kohran member 40,000 in ringthar 1000 khawm kum khat sung man ngailo eini chun “Thlaraua ṭhanghar” ei hun tah
  • Ei panthlang hai Bangladesh ah ringtu 0.3% chau an nih. Khawvela ringtu tlawmna pawltak anih. North East India kohran haiin Bangladesh ringnawtuhai an hrilpuok ri avang hle! A hnai lai le ei zuom deu hai lai a thuo thuo in missionary ei hnaw muk ringawt el anih
  • An leh ei pansak hai Bhutan ah percentage tiding khawm neilo anla na, a harsa deu leiin ei baw tak tak ngam naw ning a tih! Khawvel rambung inthim pathum laia thlangsuok anih. Kum 2012 khan kan nu leh kohran ṭhuoitu iemani zat kan fea, thil lawmum suklang lo ding kan zu hmu suok haiin ka lung an suk dam em em. Kohran eini rawi hriet manglo hai hin “Ramthim” anlo nawr tak tak anih ti ka zu hmu chieng hle
  • India hmarsaka  khuo lientak Guwahati hi Mizoram le Arunachal Pradesh a population inkawp neka tamlem umna anih. Sample survey thawna a ringdan chun Christian population chu 0.65 vela ngai anih. Biekin tlawmte le Fellowship sawmhni deuthaw a uma. Ringthar la dinga hma la chu tlawmte an nih.
  • India hmarsak ah khawpui le district ringtu 1% um naw na ala um nuol el. “Tui ahung infawn pha ami ṭhuoitu ding ka nei ve nawha anih” titu ding an phul mur mur el anih!
  • Sikkim earthquake lai khan khuo (village) ringtu um nawna ala tam zie ka hang hmu bawk.

Tulai chu ‘workplace evangelism’, ‘workplace witness’, ‘marketplace evangelism’ tiin Christian organization le kohran hmathlirna tienga bengvarhai chun hma an lak nasa em em. Ei kawl le vela ringnawtu hai ei endan ka hmu chang mak ka ti hle hlak! Ei thawk chanpui hai laia chanchin ṭha hril nekin anni neka du âm le vervek ei tam lem ring a um. Sipai pakhatin “Vai lai chu ‘Zawlro’ hrildan an hriet nawha, ka hrila an mi bum mur mur hlak” ati thu an mi hril! “Krista kuoma mi ṭhuoitu ding ka hmu naw lei anih” titu ding chu an la tam ie! Kum iengzam eini rawi hi an mi nghâk ta aw! Kum 100 lai an mi lo nghâk sung ‘hremhmun’ tieng an liem rawn taluo tah! In khîk inkhala, in ve hlema, inchotuo hun chu an ta nawh ie! Ei thawding ei thaw naw leia “Thlaraua zeng”, damna nghâk an va tam de. Ringnaw tuhai buoipui lova ‘pawl’ ringawt buoipui el hi Pathien kona ah ei ngai ani chun ni el sien! Ei thaw ding ei thawnaw leia Setan in a phuor an va tam de. Thlaraua zeng hai hin thi chenin ringum takin an mi nghâk zing el ding chu ani hi! Adivasi hai Assembly ah thuhrilin kan nu le kan driver pa leh 2012 khan kan va fe a. Mi 2000 vel an inkhawma. Adivasi hai hi North East India ah 85 lakh vel an uma, ringtu percent a la tam naw hle. An Executive Secreatry in thla khat ah Rs. 2000/- a hlawa, Secretary dang pahni haiin Rs.1800/- an hlaw ve! An inrim zie chu theinghil thei kan ring nawh. Thingpui sik hai (Tea leave picker) hai quarter chîn em em ah mi pariet kan hei inhnaw bum chu, kan intar tho ie! Nithum vel chau sung mi iemani zatin Isu an pawm hman anih. Thlarau bohmang invawi tak tak kohran hai lûtna chi anih. “Tui ahung infawn pha ami ṭhuoitu ding ka nei  ve nawha anih” an la ti zing! “Ṭhuoitu bo, invawitu bo kan nih” tiin Krista kuomah an mi hek zing anih. Adivasi hai lai hin Maoist (ramhnuoimi hrat em em) an hung lutin Assam sorkar chun a hril. Silai la lo ding le hriemhrei hmang lova, bible le pen hmang lem dingin thei tawpin ka van fûi ve anih.

SANSUOKTU DING NGHAK AN VA TAM DE!

Unau dittakhai, ‘tho har ei tiu’!! Kum 38 neka sawt lem ‘Sandamna tuifawn ngaia nghâk zing’ an tam taluo. Khawpui le kawtthler tinah an zal thlek thluk el! Isu’n, “Dâk unla, Lo hai hi en ro. Ât dingin an hmin zo tah” a ti kha hre zing ei tiu. Dâk suok met ei ngai tah. Dâk suok der lova en ngai en char char el, thaw ngai thaw char char el, hril ngai hril char char el, sak ngai sak char char el, hmu ngai hmu char char el hai hi “Thlarau mitdel hai ngirhmun” anih. Hang dâk fân met ei tiu! Ei khaw nghat hang suksang deu ei tiu khai. ‘Thlaraua na em em santu ding ngai’ an tam hle. Intir suok a hun tah. A fe suok tu ding zawng suok a hun tah. Hun nuhnung an taha, chance an nei tlawm ta em em anih. “Pu, Tui a hung infawn pha  ami ṭhuoitu ding ka nei ve nawha anih” tiin an khek sup sup el. Krista aia sin thawtu dinga ‘Ko’ eini an naw?! 2012 November khan India rama mission tienga kohran ṭhuoitu iemani zat Korea ah “Ethne” conference kan zu neia. Kei khawm IMA (Indian Mission Association) palai in ka zu ṭhang ve a. Mongolia a Evangelical Fellowship hotu pa le Korean hotu’n hieng ang hin a hril. Mongolia rama ringthar pa’n Korea missionary kuomah “Iengtika inthawka Gospel hi inchang am? Ieng leia I Pa in ka pa alo hril naw? Ieng dinga I pu khawm chu Mongolia ramah hungin ka pu alo hril naw?”tiin. Korea pa chun hril ding ka hriet der nawh atih! August thlabul 2014 in Welsh hai kuomah “Watkin Roberts kha kum thumin lo hung inhma sien chu ka pa Pi khawm sandamin um atih” ka tiha. Mak an ti hle el. Eini rawi khawm zawna harsa tak ei tuok zing anih. Thlarauin ei mit sukvar sien ka nuom takzet. 1% missionary kohran khawm nilohai tadingin in ngaituo nasat a ṭul hle. Vantirko ngailova Tui sukfawntu ding ei nih! Thaw ta u, lal sunghai va hril ei tiu! Amen!

 

 

 

Facebook Comments

Leave a Reply