Tlangval William Darngawn te kha

Tlangval William Darngawn te kha

By Rev. Dr. Lalrosiem Songate

Fam muol mi lo chang san tah ei tlangval suongum William Darngawn, Upa Lalthangvung le pi Lalțhathieng hai nau pasal neisun nun tawi dan ka ngaituo rawn po leh Pathien remruot dan ka hriet tâwk naw zie ka hriet zuol hlak. Cancer an vawi ka hriet hlima inthawkin a thipui ding hin ka ring ngai naw reng reng a, a san chu, a nun tlûong zie le fel zie ka ngaituoin Pathien ta dinga ditum tak niin ka hriet a, hieng anga tlangval fel le țha Pathienin a hringna cancer an fâk hlum tir el chun Pathien hi an vêt hle ning a tih, ka ti hlak a. Chuleiin a damnawna khawm kha thipui naw ni a, Pathienin a hmang nuom leia hieng ang natna hmanga a cherna ah ka ngai lem hlak a. A damnaw laia ka va kan hlak khawmin, thi ding en hin ka en ngai naw a, la hung dam suok a ta, Pathienin nasa takin a la hung hmang ding hin beiseina ka nei tlat hlak a. Chuong ang ngaidan ka nei leiin a pa lungril sawlna khawm hung dam nawk vat tho ding angin ka ngai tlat hlak a nih.

Tlangval William hi a mizie hrim hrim a khawm mifel tak chu a nih. A naupang laia inthawk khawma a nu le pahai lungril sawl ding veng dawp dawp mi. An hril dan lem chun Douglas Schoola a kai lai vawikhat damnaw in hospital chen a lut hiel a, chu khawm chun a ruolhai kuomah a nu le pa an lungril sawl inlauna leiin hrillo dingin an cha mawl mawl thu an hril a. Cancer a hung invawi a, na tuora an per zâk el khawmin a nu le pahai lungril nat ding an lau leiin thei tawpin an thup hlak a nih. Kei nilang chu inrûm hlut hlut ka ta, kachu kakha mi hmet ro, ting ka ta insêk thei tawpa kan sek ka ring. A nu le pa laka hin a thei chinah a nat rinumna thup tumin hmel hlim hi a put tum zing hlak a nih. A nu le pa ta ding chun an tar chau hnunga enkawltu dingin thlâkhla an um pek ngawt el. Tlangval fel le tlawmngai chu a lo va ni em em de aw!

Tlangval William hringnun special nawkna pakhat chu nun petek hun neilo hrim hrim a nih. A naupang laia a nu le pain kohran inkhawmna iengkima an keihruoi hlak kha a hung tlangval hun chen khawmin a sunzawm pei a, a thi ni chenin a sunzawm tluonsuok zak a nih. Hnungtawl nun khawm hi a hriet ve nawh ning a tih. Kohran inkhawma fel ringawt khawm niloin rawngbawlna nun chen tlung phak a, Pathien ta dinga insie hran hrim hrim a nih. Mi tam tak lekha an inchuk a, sin țha tak neia inhawi taka khawsak tuma ngaituona an nei laiin, William ruok chu B.A. a zo le inruolin Bible inchuk a, Pathien rawngbawl dinga in singsa zui nghal a nih. A Bible inchuk hlim laia Delhi papui pakhatin EAC ditsakna leia William hi an chuk zo pha EAC tienga sawr dinga a chawmtu Delhi Hmar Christian Fellowship hotuhai kuoma hni dinga thurawn a mi pek ka la hriet zing. A umna tieng tieng mi mit chu a lo tlung hlak a nih. Eini rawi chu tleirawl nun petek hun dam ei in umtir a, ama hi chu Bible a Samuel ang el a, taksa le thlaraua a hung ințhang lien ang peia, Pathien le mihriemhai ditsakna a khawm a hungințhang lien pei lem a nih. Tlangval fel chu a va hang ni ngei de aw!   

Tlangval William fel zie ka hriet nawkna pakhat chu Kangrengdawr Central KTP inkhawmpuina hmuna a fiemthu thawna ei Central KTP YouTube channela an sie khan hriet theiin a um. Tuchen hin ka la en nawn rawp hlak, kan nui nasa thei em em. Rev. Chungthang țawng ân sîr a, a thiem em em a nih. Anachu a fiemthu thawna a khan Rev. Chungthang sermon ân sîr a chu Pathien thu a hmangnaw reng reng kha a nih. Pathien thu hi ieng angin inlêk inlakhawm fiemthu thawna a hmang ngailo ding a nih. A fiemthu thaw kha nuizat a um chau niloin a thienghlim em em el a nih. Mi țhenkhat chu pulpit a thu ei hril khawma pulpit chunga inthawka ti dinga in awmlo dam ti chang ei nei a, fiemthu ka thaw ei ti leh Pathien tieng thil dam fiemthu thaw nain ei hmang hlak a. Tv. William kha chu chuong ang chu a ni ve nawh. Tlangval fel chu a va hang ni de aw!

Hieng ang lawm lawma fel le ditum, Pathienin hang duot lawm lawm sien a awm vei leh, cancer natna a hang infâk hlum tir der el chu a na, a mak ngawt el. Hieng thu ka ngaituo hin Bible a Enok dam, zawlnei Elija dam, annawleh American Indians hai laia rawngbawltu le țawngțai taima em em David Brainerd kum 30 a ni chaua Pathienin a kuom tienga a țhuoihai dam ka ngaituo a. Ka ngaituo hlak chu khawvela hin mi țhenkhat nun thienghlim chungchuong an um a, chuonghai chu khawvel mi angna nekin vanmi angna an hau lem a, khawvel a an rawngbawlna chu a hlâwk hle ding lai zingin khawvel pawrchena rama um dinga Pathien tak ngiel khawma enhla le inpâm uma a ngai hi an um hlak ning a tih. Enok khawm kha Bible in Pathien leh an leng hmunkhat hlak thu a hril a, Pathien le an inpâwl zing lai kha a thlâkhla em leiin a kuom tieng a țhuoi thleng el chu ni awm a nih (Gen. 5:24). Ei tlangval William khawm hi a nun le mizie ei hang en veng veng hin ei hriet chieng zuol po leh belchieng a dawl deu deu el hi a na. Chuleiin a nun hi a țha em leiin khawvela rawngbawlna ieng angin țul sienkhawm Pathienin hnuoi chihrak pawrche laia intâl bal dinga an pâm leiin a kuom tieng a țhuoi lem el ni dingin ngaidan ka nei a nih. Chuong an naw chun hieng ang lawma rawngbawltu dinga ditum Pathienin rawngbawl hman lek loa a lak hmang el na ding san a umin ka hriet naw a nih.

Chuong chu a lo ni chun, a sunghaiin duot taka an ko dan angin, “Bawia, nang chu hi hnuoi chihraka intâl dingin Pathienin an pâm deu che a ni kha, Pa kuomah lo chawl hadam la, keini rawi nun inhnawk bet but hai hin insui thlu nawk nawk pumin hnuoi pawrche taka hin Pathien ram hung phur lem el kan tih” ei ti ding ni el naw nim.  

Facebook Comments

Leave a Reply