Tirko Paula Khawpui (Sao Paulo) Brazil-ah

By: Joseph Joute, Freelance Journalist

Tirko Paula Biekin
Tirko Paula Biekin

 

“Chanchinṭha thu lâwmum intluntuhai ke chu a va mawi de!” (Rom 10: 15)

Thil mak ve tak pakhat chu, tulai khawvêl pumpui fangsuoka thuhne êm êmtu thil Internet thununna le enkawl (Governing) ding thu hriltlângna dinga Tirko Paula khawpui Sao Paulo, Brazil ruot a ni ve tlat hi a nih! Internet chanchin hi kha hma kha ei ziek tah a, tulai ṭhangthar lem chu a hre naw le hmang naw ramsam ei um ta nawh. Thil thawthei tak, indar hrât êm êm, thunun intak deuh deuh si a ni lei hin khawvêl rorêltuhai khawm an lû ân hai a. Ṭha tak le fel taka thunun le hmang a ni theina ding hi an ngaituo tak chu a ni tah.

Tuin chu khawvêla hin Internet enkawltu lien tak tak pâwl iemani zât an um a, thuneitutak, makhâta control theitu ruok chu an um nawh. Amiruokchu, Central Coordinating Function hi America kuta um a nih a. Hi lei hin Internet fethlengin enthlâkna sin khawm a thaw thei a, chu chu Human Rights dân kal a nih, tia sawisêlna a tam leiin chu mâwphurna chu la ta lo dinga thutlûkna a siem leiin khawvêl rambung dang dang le pâwl dang dang inrâwnkhâwma Governance Protocol ṭha tak siem an hung rawt tah a nih.

Chu thu le inzawm chun “Multi-stakeholder Model” a ṭûl tah tiin Brazil sawrkâr chun a hung khêkpui ṭan a. Khawvêl sawrkar khawmin a ngaimâw tah leiin UNO le European Commission chun Global Multi-stakeholders’ Meeting on the Future of Internet Governance (NETmundial), April 23-24, Sao Paulo, Brazil ah an buotsai a, chutaka ṭhang dingin an mi hung fiel ve tah a nih.

Brazil VISA Free-in Ka Hmu: Brazil VISA lâkna ding leh Embassy hrâw ngei ngei a ngai a, hun hlak chu a limit tah si, a’n hma thei tak April 15-in Delhi ka lût a. Online application document ka submit vawng hnungin a tawi takah ni 7 bêk i nghâk ngai a tih, an tih a. Amiruokchu, application document ka submit ni (April 16) a inthawka ka Brazil flight ticket April 22 (Thawṭanni) chu working days ni 3 chauh a nih a; a kâr lakah Good Friday, Saturday le Easter Sunday holiday hai a thla a.

Upa Dr Zâwlthanglien Chângsan-in Delhi ICI biekin ah Deeper Spiritual Convention a lo nei lai tak ka tuok fûk leiin Ningâni zâna inthawkin inkhâwm ka ṭhang ngat ngat thei a, ka vângnei hle. Ka lungrila um lientak ruok chu, VISA process-na ding ni 7 aiah ni 3

Tirko Paula Lim
Tirko Paula Lim

chauh a na, iem a ang ding? Pathienin a number 7 le 3 hmang hin iem a mi thawpêk rêk ding chu maw? tihai hi a nih!

Thâwṭanni chun Brazil Embassy ka va feh a, Delhi Vai staff ha’n thil thei lo dinga an mi hril hnungin, dâr 1pm hmain VISA ni 10 ka hni kha ni 90 an mi pêk a. Brazil sawrkârin VISA Fee Rs. 1, 600 a mi pêkkîr bawk a, a thlâwn tawpin Brazil an mîn lûttir a nih! Pathienin a mi ṭhuoi phât chu iengkim hi a tluong rawng el hlak a nih; khawvêl dânah theilo angin inlang hlak sien khawm!

Tirko Paula Khawpui Chu: Global Meeting meuh neina dinga an tina hmun chu ieng ang khawpui am a ni rêng hang ensin ka tih, tiin internet ah ka zawng a. Sao Paulo, Brazil ti chu ka lo la hriet ngai nawh a. (Tuta World Cup ah hin tamtak chun ei hriet ṭan ve ring a um. Opening Ceremony an neina Arena Corinthian stadium kawl lai kha ka tlungna a nih).

Tarsus (Tarsis) mi Tirko Paula’n Europe le Asia laia rawng a bâwl lai khan – abîkin Korinth ah – a rawngbâwlna lo hre ve pakhat chun Brazil, South America hi a zu tlunga chutaka Paula hrietzingna dinga a phuok a nih, an tih a. Ṭhenkhatin, 1554 laia Europe Missionary zu lûthai khan St Paul College an indin a, chutaka inthawka hung inṭan a nih, an ti bawk a.

Portugal-in a awp char char a, 1823 khan Independent a pêk a. Tuhin chu Italian, Spanish, Portuguese, Japanese, Chinese, etc an um a, Brazilian an inti vawng tah; Indians lo um hmasahai leh.

Sao Paulo hi Mafu (Sugarcane) le Coffee chîngna hmun a ni a, an hausak inṭanna chu Mafu le Coffee chîng, Process le thawndawk a nih. Khawvel Coffee ka dâwn lai po pova chu Sao Paulo Coffee kha a la’n hnik tak a, an chini a la tak ṭhatak bawk a, aman khawm a la tam takin ka hriet.

1700 lai Rângkachak an hmusuok leiin Industry hmunpui a hung ni pei a, kum 200 vêl kha chu thilsiemna hmun a tam leiin a boruok khawm a bal êm êm a, hma a sâwn hrât bawk a. Tuhin chu khawpui fai tak niin, Finance le Service khawpui a ni tah a. Brazil chauh ni lo, South America khawpui laia hausatak, khawvêl ah New York le Tokyo dawtah man totak a nih! London mipui nêkin mipui an tam lem a, motor inlawn vêl le khuolzin an tamlem ta bawk!

Tirko Paula hrietzingna dinga an lo indin Sao Paulo (St Paul) khawpui ka thlîr laia ka lungrila inlang chu, “Thil ṭha Chanchin lâwmum intluntuhai ke chu a va mawi de!” ti hi a nih! Tirko Paula lim (Statue) an siem lien deuh ke hnuoiah, Park inhawi deuh lai, khawvêl khingtieng daih ah ka zu ṭhung veng veng chu ân hawi veng veng bawk a nih! Vânram lem chu ieng ang thlâwtin am ân hawi ding chu aw? ti a mîn ngaituotir a. Vânram changtuhai mi hamṭha tak ei nih!

Angel Uniform Hak: Delhi a inthawk Abu Dhabi (UAE) dârkâr li vêl vuong hnungin dâr 10pm vêlin kan tlung a. Ishmael a thla Arab hai chu an lo ropuiin an lo hausa ta hem hem khawp el! Kan vuongna Etihad Airways, Jet Airways International le partner hai vuongna Airbus A340-500, Double Deck (sawng nei) mi 475 phur thei, Abu Dhabi airport a um zât po chauh khawm khu Hmar po poin ei inchâwk zo dîm aw, ti dingin a um!

Zing dâr 7:45am Sao Paulo panin kan vuong suok nâwk a. Africa khawmuolpui le Atlantic Ocean chungah dârkâr 15 kan vuong hnungin, zân dâr 8:45pm vêlin Tirko Paula khawpui chu kan tlung a. Airport ah India pawisa Brazil pawisa (Reais) (rice tia lam ding) a thleng ka tum leh, India pawisa an lo dit nawh a. Forex Bank Counter 6 zet ka hang en zung zung khawm chun an lo dit naw vawng a. Ka Credit Card khawm India Rupee a ni leiin exchange a buoithlâk tiin an mi except pêk nuom naw bawk!

Pawisa hmang thei ka nei ta naw leiin Taxi ka lâk thei ta nawh a, ka bei a dawng ṭan tah hle a. Foreign ah intâng sawng el lang ka sûnghai iem chang an tih aw? Khawvêl khing tieng daiha um kan tah a, iengtinam mi hung zawng dawk an ta? Meeting ṭhang thei ta lova kîr el ding khawma ka return ticket chu ni 3 hnungah a ni chauh sia, ni thum le zân thum bu ngheiin ka um thei dîm? Isu hman ni 40 le zân 40 bu a nghei a, kei khawm a hminga ka tuor vena a ni’l annâwm… Anachu, Meeting-a ṭhang ve dingin lampui a mi siempêk a, hi chen hi a mi ṭhuoi ta sih a…tiin, ngaituona a tam êm êm a.

Information Counter ah hin Bank dang chanchin an hriet am hang indawn rêng rêng ka tih, tiin ka a va pan a. Sâpṭawng an hriet naw khawp el a. Thilmak tak chu, ka hmêla khan ka beidawngna an hmu a – India pawisa ka chawi chu ka’n hmutir pei bawk leh – ka harsatna an hriet chu ni ngei a tih.

Sâpṭawng dang thiem lo, “Come” ti chauh hrie, nu pakhat thau deuh, Broiler kekawr inbuntir ang deuh mawngbâwr inhêm lut lut, anachu fel deuh hin “Come” a mi tih a. Thaw ding dang um lo chu ka zui tawp a. Terminal 2 sâwng hninaa Immigration pisa pakhat, night duty fel deuh anachu Sâpṭawng dang hre lo, “Don’t Worry” ti char hrie a, a kutpui intunga mîn hmutir zie pa kâwla hin a mi ṭhuoi a.

Sâpṭawng thiem lo Brazilian mi pahni, “Come” leh “Don’t Worry” ti char hrie hai râwl chu Pathien râwl an tah hi ka tih a. “Hung rawh. Lungngai naw rawh” a mi tih a nih chu! Ka phone (Airtel) ka hmang thei ta si nawh, ka Laptop battery a bo ta bawk. An electric connection hai hlak chu India ta leh lo inang lo. Internet (E-mail) hmang ka ṭûl a nih, tiin a table-a computer chu kut-zai-zira type-in, “Can I use the internet?” ka ti chu a hrietthiem nîng a tih, a lu a suk a, a kutpui ân tung a, “Don’t Worry” a hung tih a.

An computer hmang chun a mi fieltuhai leh Hotel ka mail thei tah a. Anachu, a mi hung ṭhuoi thei ding an um nawh a. Lo thei lova airport ah zân khat ka riek a ngai tah a. India mi Vai pakhat bêk ka hmu tâk duoiin tia ka va zawng hlakin, India mi pakhat khawm hmu ding an um nawh. Vaihai khawm ei ngai rawng rawng el an nih!

Phîng a hung ṭâm tah a. India pawisa sîng khat khawmin tui no khat khawm inchaw thei ta lo ka na. Fâk ding hang inchâwk ngaina lem chu a um nawh. Beidawng taka rinum tuor inti êm êma ka um lai chun ṭawngṭaina ding hmun remchâng ka zawng a. Ṭawngṭaina Room pakhat hi a um a, anachu, Muslim (Arab) ṭawngṭai an tam leiin ka lût nuom nawh a. Rest Room ah umin ka ṭawngṭaina ta lem a.

“Lalpa hi chen hih i mi ṭhuoi tah sih a, hieng el ding hi a nih maw? Nangin i lampui siem chu mîn hmutir rawh” tiin rinum ti tak le beidawng takin ka ṭawngṭai a. Chutaka a mîn hmutir chu, “Kei hman ka isiem mihriemhai ditnawin ka um a, an hmaah saruoka sawiin ka um a, ka dang a châr khawmin zu thûr an mi pêk a, tui dâwnna ding le ka saruokna thupna dingin ka kut khawm ka châng thei nawh,” tiin, Isu tuorna a mi hung inhmutir chu, hril ding ka nei ta nawh!

“A nih, Lalpa! mi ngaidam rawh. Kei chu coat ka la hâk a, necktie khawm ka la awr a, tui dâwn ding khawm tap water a um a…..” tiin rinum tuor kawngah iengkhawm ka la tuor ve tak tak nawzie, ka thisen far khat khawm la far lovin Ama chu a thisen a far kang râwt a. Ka tuor nêk daiha râpthlâk Isu’n a lo tuor zie ka hang hmu thar chun ka zâng tah êm êm a. “Khaw hêm, Tirko Paula Airport chu fangkuol ka ta, ieng ang thlâwta ropui am a nih ti hang bêlchieng ka tih,” tiin mipui inzi nuoi nuoi kâra chun Sao Paulo airport lien tak el chu, ka’n sukhar a, ka explore (fangsuok) tah a.

Ka hung kîr tienga ka vuong suokna ding hmun Departure Terminal le Check-in Gate hai hrietna’n ka hmang phaa, zân khat hotel Bill B$ 300 (Rs. 8, 100) le Taxi fare B$ 200 (Rs. 5, 400) ka Save bawk a. Pathien hi chu remruot a lo va thiem de aw, tiin lâwmthu hrilna ding vawng ka hmu tah lem a.

Zing dâr 7am chun Migration Officer khawm a hung tah a. Ka chanchin a hriet vawng tah a. Kan inbiek zo chun Mail ka nghâk thu ka hril a. Ka hang ṭhung hâdam lai tak chun telephone a hung inri lang lang a. Brazil ṭawngin ieng ieng amanih an hril zo chun lekha phêka hin thil iemani a ziek thla pei a. “Mr Joute” tia ka hming a sâm lei khan ka chanchin an hril ti chu hriet thei a.

An inbiek zo chun a mi hung pan a, “Mr Joute, Executive Director, UNO (NGO Branch) chun ‘Mr Joute kha Taxi hung la pêk unla, Hotel Grand Hyatt ah hung thak ro. Taxi man chu lo pêng kan tih,’ tiin an mi hung hril a. I’n hman ta chun hung rawh zu thak ka ti che,” a mi hung ti el tah a! Taxi var fai hlawk hlawk mi phur nuom an lo intlar ṭhuop a, Pathien hi chu a lo hausa a nih!

Ka ring phâk nawna tieng daih, kan Meeting-na ding Hotel ngeiah ṭhuoi tlungin ka um tah a nih! Ka hei tlung chun Car kawtkhâr an mi lo hawngpêk a, Taxi man B$ 200 (Rs.5, 400) chu inrang deuvin an hung pêk a. Ka thuomhnaw hai an mi sie ṭhapêk a, Meeting-na hmunah an mi ṭhuoi nghal a. Brazil President Dilma Roussef khawm a lo um a. EU Vice-President Ms Neelie Kroes leh, milien milalhai leh narân takin table hmunkhat kîlin, ngaidân mi hrilpui a, an mi hang inbiekpui el dâm chu;

“Pasie chu êkdura inthawkin a chawikâng hlak, Milienhai kuomah ân umtir theina dingin…” (1 Sam 2: 8) ti naw chu lungrilah thu dang a um nawh!

Hieng po po ka hrilna san chu, Pathien hin “Ama hmangaituhai, Amain a ruot anga a kohai ta ding chun an ṭhatna dingin iengkim a thawpêk hlak a. A kohai chu thiem ân changtir bawk a…thiem ân changtirhai chu a chawimawi bawk hlak” ti le, “A Naupa ngei khawm inro lova mi petu chun thil dang po po khawm a mi pêk belsa naw ding am a nih?”  (Rome 8:28-30) ti hai hi chawp-le-chil khawmin khawvêla hin a mi thawpêk hlak ti ka hril nuom lei a nih.

Thlarau chun ei hrâtnawna hai inrûm hril ruol lovin a mi ṭawngṭaipêk hlak a, ṭawngṭai dân ding le fedân ding ei hriet naw lai khawmin Pathien chun a nauhai chu fel takin a mi ṭhuoi hlak a nih!

Brazil Lanu
Brazil Lanu

WWW Hmunpui Awptu Chu: Brazil Meeting-a ka lungril hluotu lientak chu, tulai khawvêla Internet-in ram a lâk hrât dân dâm, mitin nitin nun a thunun zie dâm, thlarau ram thilthawtheina lo entirlâwkna a ni dân dâm, zalên taka hmang nisi a rûk taka mihriem nun thununtu a nizie hai nasatakin a mi’n ngaituotir a.

World Wide Web (WWW) an iti, Internet khawvêl thlung zawmtu tak hi Brussels ah a um a. Tu kum (2014) hi kum 25 a tlingna a ni tah leiin danglam taka hmatieng fepui dân ding an rêl zing bawk a. An thiltum tak chu, khawvêl mi hmun thuma ṭhea hmun khatin Internet hi an la hmang phâk chauh a ni leiin tuta inthawka kum 25 dang nâwka chu khawvel mi po po hmang (access) thei dinga siema, khawvêl mihriem po po inthlungkhâwmna ding ti hi a nih! Chutaka dinga Road Map chu kan lo buoipui a nih chu!

WWW hmunpui Brussels hi European Union sûnga um a ni el bâkah European Parliament umna hmunpui a ni bawk a. Poland ka fe ṭuma ka thu ngaituo hai leh, Brazil-a Internet Governance Meeting-a thurêlhai ka ngaituo chun, Hun Nuhnunga Sakawl Number hung suok dân ding vawng a kâwkin ka hriet a. Chu Number thunun theitu ding hung suokna ding chun European Union hin inthûk takin part a play a nih!

America (USA) thlang lai el Meeting kan neia, chutaka thu nei tak chu America ni lovin, European Union a ni tah! America khâwl thilthawtheina hai hmang dân ding rêla, khawvêl rambung tamlem hai zui dinga Dân siemtu (hmaṭhuoitu) chu European Commission a nih! Rambung tin ngai ṭhat thei ding le zâwm nuom zâwnga thu fepui a thiem leiin European Union chu khawvêl sawrkar hai khawmin anni ṭhangpuitu ding, an chunga thuneitu dinga an dit chu ni hung pei tah leiin Isu Krista hung nâwk hmaa khawvêla Jentêl Lalram nuhnungtak nina chu a hrâw chieng hlein a’n lang!

Khawvêl changkâng tak ei ti hi khawvêl Hun Nuhnung inchikna a nih ti hi ringtuhaiin theinghil naw inla. Internet Governance or e-Governance ei ti hi khawvêl rorêlna dinga Dânbawsepa hmangruo ni naw’ng a tih khawm ei ti thei ta nawh!

A ṭhatna le ei hmang ṭangkaina kawng tamtakah a um ang bawk hin, a ṭhatnawna le hmang suol theina khawm tamtak a um a nih ti hrie inla. Internet-a i mimal/personal thil i upload ta rêng rêng chu, bank account information khawm nisien, a him nawna tamtak a um tah.

Sap rama chu kum 15 tling lo (India-ah 18 hnuoi) chun Internet hmang phal lo ti a ni lai zingin, kum 10 le hnuoitieng hai khawmin an nuom nuom an download theina hmun a nih a, thunun (Control) thei tak tak an nawh! Facebook khawm naupang za peia 70% in an hmang tho a nih! Indiktak le ṭha taka hmang ding ti a ni laiin, Internet hmangtu za peia 40% chu thil ṭhanaw (Crime) thaw tumna lungril neia hmang an nih a, Facebook le Twitter hmangtuhi za peia 30% (chu chu thla tin mi maktaduoi 7 vêl) Fake Account hmang an nih!

Conclusion: Thukhârna dinga ka hril nuom chu; Nun him naw deuh deuh ram khawvêla chêng i ni tah leiin Nun himna tak tak chu Isu Krista chauh hi a nih ti hrein, i umdân ah fimkhur la, Pathien ditzâwng ieng am ning a ta, ti ngaituoa i nitin nun i hmang chun Tulai Khawvêl Hun Nuhnungtak ah hin nun him tak le hlimum tak la hmang thei ngei i tih! ti hi a nih.

Khawvêl thil – Internet, sum le pai, rothil – hai hin hlimna a mi pêk kher nawh, buoina le ngaituona suksâwltu chauh an nih. Dai kil kârah um inla khawm, Gospel Chanchinṭha ei dawng hi ei vângnei a. Khawvêla Chanchinṭha puongsuokna le phursuokna sin hi a manhla tak a, mimal le hnam hming khawm a mawi tak a nih!

Khawvêl hausakna le ropuina kawngah mihai phâk naw inla khawm, Chanchinṭha lei bêk hin mihai hriet ei la ni thei chun, khawvêl ah ro nei naw inla khawm Vânah Pathienin ro mi la siempêk ngei a tih! Chu chauh naw chu Hmar hai hin – hnuoi le vân ah khawm – ropuina ding tak tak iengkhawm ei nei nawh!

Hnuoiah khawm pilvut khu chui chui, chirhak le tuihawk laia lengin Vânram ei la chang nâwk naw lem chun mi po pova lungsietumtak ning ei tih!

Mi lungsietumtak ei ni nawna ding  le Ama zâra ei hausak theina dingin Isu chun a hringna hung inhlânin, a thisen far kang râwtin a mi tuorpêk a. Eini ruok chu thisen far khat khawm suol dona dingin ei la seng nawh a.

Tulai khawvêla thisen (Hringna) ei sêngna hai po po hi suolah ei um zing leia ei sêng ni lovin, suol dona leia ei sêng nisien la chu Vânrama ei chanvo ding a va ropui zuol awm deh!

Tirko Paula bawkin, “Suol dovin thisen suok khawpin in la ṭhang nawh.” a mi ti hi ngun taka ngaituo le inennawnna khawp a tling a nih! I Suol do leiin thisen far khat bêk i sêng ve ta’m? Lalpa’n ṭhangpui raw sen che! Amen!

Facebook Comments

Leave a Reply