THLARAU THIENGHLIM IN CHUNGAH A HUNG TLUNG PHA LEH (Thilthawhai 1:6-8)

By Rev. Dr. H.M. Songate

Rev. Dr. H.M. Songate

Rev. Dr. H.M. Songate

Kum thum chuong zet a hnung an zui hnung khawmin, an hotupa thuchahai kha an la chieng naw emem. Chuleiin, hal le kawk an tul nawk hlak. Israel ram tungding kar kha an nghakhla hle chu ni ding ana, “Lalpa tuhin am anih, Israelhai kuoma ram I tungding nawk ding?” tiin an inthe tawm tep khawm khan an lan dawn mol mol, anih! Chuleiin, na deu tawl in “Pan a hun le a ni ama thu thua um dinga a ruot chu nangni lo hriet ding an nawh” tiin a kawk nawk anih. Pharisaihai le Lekhaziektuhai leh an inrem thei der nawna kha “priority’- hmasa lem an naw leh, pawimaw lem chungchang kha ani tak.

Isu’n mipui (people) a ngaituo a, an ni chun dan le an sakhuo kalhmang kha an ngaina tak ani lem lei a nih. Ngaidan in angnaw hi inthena, inhrietthiemnawna, inthuruol theinawna, inhmu tlang theinawna le inpaw theinaw na a nih. Isu hi a ngiel a angin hung nawk ta sien chu- ei ngaidan avan ang awmnaw de aw! Tulai kohran ruol le khawm In be sie zo vawng ei tih!!

Van tienga a kirsan ding tawm chen khan a thuoihruoihai  kha a thiltum ah an la chieng naw a nih! Israel rama ‘Rorel’ kha, thlarau thienghlim nekin an chak lem a hawi! Tulai khawvel kohran leh an lo inhlat bek nawh! Kohran Election kum zata, temperature nei le aruka invak a inbe ruk sar sar hai ang deu an hawi! Thenkhat lem chu local inthlangna chena ‘rorel chak’ an nih! Hal hrep ding reng an nih!

Thlarau thienghlim an chang hmakhat chu “Tuol suok lo ding” ati anih. Thlarau hratna le thilthawtheina nei lova suokdok hi chinglo ding anih. Thlaraua inthuom lo chun tawng tawng ding an nawha, suok dawk ding an nawha, ro rel ding khawm an nawh. Chuleiin, Thlarau thienghlim-Pathien thutiem kha dawng le chang phawt ding anih.

Chu Thlarau chun huoisenna indik, ngaituona fel, indikna, hmangaina vervekna thanglo ami pek hlak. Thlarau thienghlim inthuom lova thilthaw ei va hau awm de e! Ei program tamtak hai hi thlarau thienghlim bova hmang thei anni ding hrim alo nih! Isu’n, “Thlarau thienghlim baptisma inchang naw chun, suok dawk naw ro” alo ti ani kha! Ei chak luo am maw!

Tulai khawvel “digital age” ah ei hriet nuom taphawt hriet thei, ei inchuk nuom taphawt awlsam taka inchuk thei, bazaar kai ngai der lova, dit dit ‘online’ (internet hmangin) incha a, in ah an hung thak el an tah a. Ei bu fakna  dingin  khawl (machine) ei hmang naw chau anih! Chuonga khawvel hrietna a let tamtaka an thang zing lai, ringtuhai tadinga thil inlau um tak chu ei Pathien thil tum le dit hre hriet hrang  naw pal hi anih.

Pathien thu hre le thiem fu siin, thlarau thilthaw hre der naw inla, mi ti um tak, Pharisaihai le lekhaziektuhai ang ei ni ding a nih. Thlarau rawl le a thiltum hriet chieng angaia, mani ringthu chau le nuom dan ela, Pathien ram ei khal ding ani nawh. Chuleiin, tulaia ringtu inti hai hin ieng am ei ngaipawimaw tak a? Mani inlal nadinga Israel ram tungding ani? Member hau am? Thawlawm tam ani? Sawma pakhat ani? Sawma pakhat inchu hi ani deu tak am le? Mosie chun Pathien kuomah, “Ka kuomah I fe ve zing naw ding chun hitaka inthawk hin keini mi thuoi ta naw rawh”, Exodus 33:15 ah alo tih.

Member tam ringawt buoipuia in nawr zing ei ni chun “Gideon ral do thu” kha tiem met ngai atih! Kanaan ram bawng nene le khuoizua luongna ram kha, Pathien umpui zingna a umnaw chun, lut lo kha a thlang lem a nih. Eini rawi le chu ei inthlau char char ngei! Eini rawi chu ‘bawng nenen le khuoizu luongna ram ah’ ei cheng ding phawt chun Pathien umpui e, umpui love kha uksak naw tawp ei tih! Thlarau thienghlim ei dawng theinawna san lientak chu-Thlarau thienghlim umpuina taktak hi ei tri emem lei a nih. Thlarau thienghlimin ami control ding kha ei inlau emem a. Chuleiin, thlarau kha ei khuopde tlat hlak a nih.

Japan mipui hrim hrim chu “Iem I dit tak a?” ti a an indawn chun “Hlawhlingna” (success) an ti hlak. America mi an indawn chun “enjoyment”- (insuk) hlimna” an ti hlak! Israel hai chu “Hnam damna” an ti hlak. Chuleiin, khawthlang tieng mi hai chun Football, Rugby, Boxing, UFC, le en nuom chidang dang hi an baw nasa emem a nih. Eini rawi hi “Iem I dit taka?” tiin mi hang indawn ve hrim hai sien chu “Sum” (pawisa) ti vawng ei tih!! Pathien ram thil nekin ‘Sum’ ei ngainat zie chu hril ruol an ta nawh.

Thlaraua sipa hrattaka um nek chun sum hi ei dit lem seng a hawi! Ei umdan le nungchangin a suk chieng. Mi tamtak chu hniel ruol lovin “sum dit” chau ni lovin “sum bie” ei ni tah. Kohran rama corruption rapthlak zie khom ngaimaw tlak a tling tah. Mosie chun, Pathien thuoina umlova Kanaan ram lut nek chun lut naw tawp a nuom lem kha ropui ka ti emem. Ei kohran tin hai hi Pathien thlarau in ami thuoi takzet am aw?

Mani tha ti dan le nuom zawnga fe duol duol ei ni lem am aw? “Thlarau inthieng in mi pawl la” tiin hla ei hang sak duol duo hlaka chu, lungrilin sak nghal lo me, ieng taktak sak dawk naw ma nih! “Pentecost nia a tlungin Unauhai a thangpui” tiin sak ei ta, tienlaia thuoihruoihai a thangpuina kha hlimpui khawp nita lova! Mani mi thangpui si lo in iem thahnem a ta!? Chuleiin, hi hla vekin “Aw Lalpa I rong bawl dingin Thlarau hi kan ngai a” ati tawp el a nih. Lalpa rongbawlna dingin Thlarau thienghlim thithawtheina a tul tak. Hnam thlarau a ni nawha, Pawl (denomination) thlarau ani bawk nawh. Thlarau thilthawtheina ei nei phawt chun, a dang popo chu pek belsa ning ei tih. Isu ngeiin, “A ram le a felna zawng hmasa lem ro, chuongchun, chuong popo (fak le dawn, sil le puon, sum le in le lo hai) chu a pek belsa ding cheu anih” a lo kha.

Chuleiin, Isu’n a thuoihruoi hai kuom ah “Ngaituo lo ding ngai tuo naw ro! Ka pa chan ding in buoipui ding a um nawh! A hun le ni chu nangni nekin a hriet lem! Chuleiin, to tawk tawk unla,Thlarau thienghlim ka hung tir ding hi lo nghak ro” a ti anih. Isu’n a ngaimaw tak chu ‘Thlarau thienghlim’ ei chang le ‘Thlarau baptisma’ ei chang hi a nih. Chuleiin, Isu ngeiin “Thlarau thienghlim a hung pha chun thilthawtheina nei in tih” a ti a nih. Isu ngaimaw ngaimaw ve hi, thlarau thienghlim changna ani tlat!

Chu Thlarau thienghlim thilthawtheina hi ei nei am? Chu thlarau thienghlim chun ei hringna a control am le? Pathien nauhai tadinga thil inlau umtak chu ‘thlarau thienghlim’ umpuina bova, rongbawl dam, thilpek dam, thuhril dam, hla sak dam, taimak dam a nih. Thlarau thienghlim indiktak changtuhai chun ‘huoisenna indik, hmangaina thang si’ khawvel le mihriem ditdana chawkpawl lo hi a nih.

Ei thlarau thienghlim chang ei ti hi a da taluo tah a, thil a thawthei nawha, setan le a palai khawma, inzana chite khawm an nei ta naw a nih! Hi thlarau thienghlim hi vawikhat changa, phul liem raka tawpsan nawk el ding an nawha, nitina chang le zui ding ani lem. Chu ‘Thlarau I thuoi hai taphawt chu Pathien nauhai an nih’. Mani le mani inthuoi ringawt neka nun nghawkum a um nawh (Naupa tlanhmang). Mani ditdan chaua khawsa neka nun rinum a um nawh (Solomon). Pathien nau nita sia, mani chaua nun hmang neka nun harsa a um nawh (Juda Iskariot). Chuleiin, Pentecost ni hin, thlarau thienghlim ei ko takzet angai a nih. Tiemtu popo Thlarau thienghlim sukbit (Spirit fill) Pentecost hmang ngei dingin ka ditsakna kan hlan cheu. Amen!

 

 

 

Facebook Comments

Leave a Reply