Social Distancing thu Bible ah

By Samuel L Songate

Ei hriet seng angin tulaia natna hri inleng Coronavirus (COVID-19) anthawka invengna dingin rambung dang danga sawrkar thuneituhai chun theitawpin hma an lak a. India rama khawm state hrang hranga thuneitu haiin mipui pungkhawmna hmun hieng school/college/university, shopping mall, bazaar, cinema hall, sports stadium, office work place, religious places – churches, mosques, temples etc hai khawm khar dingin thu an pek deu vawng tah a.

Abikin vairam khawpui a hai lem chu Pathienni inkhawmna hmun hai chen khawm khar a ni ta leiin Sunday Worship Service khawm tam tak chun ei nei thei ta nawh. Hi le inzawm hin India PM Modi chun March 22, 2020 (Sunday) zing dar 7:00 a.m. anthawka zan dar 9:00 p.m. chen hi self-imposed curfew (janata curfew) a puonga, India mipuihai mi tukhawm hi hun sung hin chu tuol suok lova mani insunga inkhum seng dingin a fiel a nih.

Ei ram abikin Northeast India tieng khawm kohran ṭhuoitu tamtakin hi ‘Janata Curfew’ le inzawm hin Pathienni inkhawm hai nei lo dingin lekha an insuo bawk. Chulai zing chun mi ṭhenkhat nawk thung chun Pathien ringtuhai ni si, Pathienni inkhawm ei hang ṭhul (cancel) hi chu a dawizep thlâk, a Pathien ringzo naw thlâk taluo tiin an lo hrietthiem naw ve thung. Iengkhawm nisien, sawrkar thuneituhaiin COVID-19 hri inleng laka mipui ei inveng theina dinga ‘social distancing’, ‘isolation/quarantine’ ding a hung tihai hi eini ringtuhai ta dingin zawm chi a ni am? Ei innghatna tak Pathien thu Bible leh an kal am ti tawite in hei suklang tum ei tih.

SOCIAL DISTANCING IN THE O.T.

Thuthlung Hlui ei en chun Pathienin Mosie le Aron fethlengin Israelhai nun dan ding dan tamtak a lo pek a. A ṭhen chu personal hygiene le natna hri inkaisawng thei (contagious/infectious disease) laka inveng dan ding le enkawl dan ding dam a nih. Abikin Thuthlung Hlui huna natna inkaisawng awl em em phâr natna (leprosy) chungchanga Pathien thupek chu hieng ang hi a nih.

“Inphâr hri invawi chu a puonhai keithlêr nîng a ta, a sam a tlâiin put a ta, a hmûr chungtieng tuom a ta, “Inthiengnaw, inthiengnaw,” tiin a khêk ding a nih. Inphârnain a bâwm sûng po chu inthiengnaw nîng a ta, ân thiengnaw a na, a um hran ding a nih; a umna ding chu riebûk puotieng nîng a tih. (Lev. 13:46-BSI)

Leprosy (phâr natna hrik) hi inkaisawng a awl em em a, pang intawk (physical contact) el bakah surface transmission (thuomhnaw le hmangruo inhmang pawl anthawk khawma inkaisawng thei) a ni leiin Pathienin Israelhai kuoma khan phâr hai chu mipui umkhawmna lai riebuka an um a phal nawh a, riebuk puo tieng mi umnawnaah an um ding a ti a nih.

Hi dan hi Canaan ram an hluo hnung, khawpui le khaw kul neia an khawsak hnung khawmin an la zui zing a. II Lalhai 7:3 a khawm khan phar pali Samari khaw lutna kul kawtkhar puo tienga um ei hmu. Inphar chauh nilovin natna dang leia taksa anthawk tuithli put (discharge) le mithi ruong tawk hai chen khawm a hnuoia ang hin Pathienin thu a lo pek.

Chun, LALPAN Mosie kuomah, “Inkai thei vun hri nei amanih, taksaa inthoka thil pût nei hrim hrim amanih, mithi ruong tawk leia insukporche po po chu riebûka inthoka tir suok vong dingin Israelhai chu thu pe rawh. Anni laia ka chèngna hmun chu an sukporche nawna dingin, a nuhmei a pasalin dai puo tieng i tir hmang vong ding a nih” a ta. (Num. 5:1-3-DV)

Hi taka inthawk hin natna inkaisawng thei laka inthawka invengna dingin social distancing dan Lalpa Pathienin Israelhai kuoma khan a lo pek a nih ti chieng takin ei hmu thei a, chuleiin tuta COVID-19 natna, leprosy neka inkai awlsam lem hienga khawvel pumpuia an dar ta hin chu, Biblical Principle hmang khawma social distancing hi ringtuhai khawmin ei zawm ve ding thil niin an lang.

ISOLATION (QUARANTINE) IN THE O.T.

Tuta COVID-19 le inzawma WHO in Quarantine Protocol a siem chu, hi natna hrik kai annawleh kai dinga ringhla hrim hrim chu ni 14 sung khum hran annawleh sie hran (isolate/quarantine) a, an sung le kuo le midang khawm hnai phal lo ti a nih. Hi Quarantine Protocol khawm hi tulaia thil thar an nawh a, Thuthlung Hlui hun a khawm khan an lo hmang dai tah. Mosie unauhai Miriam le Aron in Mosie an hril siet leiin Pathien lungsenna an chungah a hung tlung a, Miriam chu a pumin an phar a, riebuk puo tieng ama khatin isolated (quarantined) a ni thu hieng ang hin ei hmu.

Chuongchun, LALPA lung chu an chungah a chawk a, a fe nâwk tah a. Puon in chunga sûm chu ân kieng tah a; chun, ngai ta, Miriam chu vûr ang ela vârin a hung inphâr tah a; Aron chun Miriam chu a hei en a, inphâr a lo ni ta zing el ti a hmuh a.

Chuongchun, Miriam chu riebûk puoah ni sari an khum hmang a. Miriam chu an ṭhuoi lût hma khat chun mipuihai chu an intâwl sawn nawh a. (Num. 12:10, 15-BSI)

Thuthlung Hlui a bawk Juda lal Amaziah naupa Uzziah chu an phâr leiin a thi ni chenin in hranah isolated (quarantined) a ni thu a hnuoia ang hin ei hmu.

Chuong chun, lal Uzzia chu a thi ni chen chun inphar a ni tah a; in hranah a um a, inphar a na; Lalpa ina inthawk chun satthlak a ni ta sih a; a naupa Jotham chu lal in enkawltu, ram sunga mipuihai roreltu a hung ni tah a. (II Chro. 26:21)

Chuleiin tulaia WHO le khawvel sawrkar thuneitu le healthcare giver haiin phar natna neka inkai awlsam lem COVID-19 hrik kai hai le kai dinga an ringhla haiin midang an kai sawng nawna dinga Quarantine Protocol an siem hi ei Bible a ngei khawm a case in ang chie naw sienkhawm, a ‘principle’ in angpui ei hmu leiin Pathien ei ring ti lei el a lo palzut el chu eini Bible ringtu hai thaw ding chi niin an lang nawh. Chun hi natna hrik hi a vengna (vaccine)le a damdawi khawvelin an la hmusuok si naw leiin tuta ei inveng thei dan le a natna hrik indar naw dan lampui um sun chu social distancing le isolation (quarantine) hi a la nih.

Ieng angin ṭi naw inla khawm, ei hriet le hriet lovin a natna pesawngtu le mi dang kaisawngtu ei lo ni thei leiin hi natna hrik invawi le kai dinga ringhla hai chu thei ang tawpa in isolate (self-quarantined) ding lem ei nih. Midang ta dinga harsatna le natna bakah thina chen intluntu ei ni thei tlat leiin. Chu chu ei Pathien thu le khawm an mil naw hulhuol a nih.

Chuleiin abikin eini Kristien hai khawmin a huhova Pathien biekna (corporate worship) ei la nei thei naw a ni khawmin, Pathien thlarau chengna biekin (temple) indik tak chu nang le kei hi ei nih ti hre in, sawrkar thuneituhai thupek inzain ei um hmun seng le ei insung sengah thlarau le thutaka Pathien bie seng dingin ei infiel lem a nih.

Thuthlung Hlui huna bawk zuk kir nawk in la, ringnaa ei pa (Patriarch) hai – Noah, Abraham, Isak le Jakob hai khawm khan anni khat le an sunglekuohai le chauh ei Pathien hi an lo chawibiek (worship) ve a nih ti kha hre zing ei tiu. (Pune, March 21, 2020)

Facebook Comments

Leave a Reply