SANDAMTU A PIENG TAH, LAL KRISTA CHU!

By: Rev. Dr. Lalrosiem Songate

(December 25, 2019 nia AIR Imphal Hmar programa a thuhril a nih)

Vawisun hi Krismas ni a ni le inzawmin Krismas thucha “Sandamtu a pieng tah, Lal Krista chu” ti thupuia neiin Krismas thucha ei hril ding a nih. A hmasa’n ngaithlatuhai po po Krismas chibai ka buk cheu!

Isu Krista pieng thu Chanchin Țha Matthai le Luka haiin an ziek ve ve a, amiruokchu an ziek dan an ang naw a, an kal ruok chu an ni nawh. Matthai hin Isu Krista hi Judahai Lal a nizie a tarlang nuom leiin lal a nina le inawm thilhai a thlang khawm a ni el a, Luka ruok chun a ziek dan enin Isu Krista mihriemna tieng a thlûr bik niin an lang a nih.

Vawisun hin ei thupui Sandamtu a Pieng Tah, Lal Krista Chu, tile inzawmin Luka zieka mi hi ei thlûr bik ding a nih. Luka bung 2 ah Isu piengthu Luka in ngainuomum taka a ziek ei hmu a. Mari le Josef chu Galili rama inthawkin an khawpui Bethlehem, Judai ramah intiempuina a hming ziek dingin an fe a. Bethlehem khuo an tlung chun tlunginhai a lo bit ta vawng leiin tlungna ding an hmu zo ta naw a, bawngin pakhat chu phîtfaiin chutaka riek dingin an insingsa ta a. Chulai chun Mari naupai inhla tak chu a nau nei a hung hun a, chuongchun bawngin sungah Isu naute chu a hung pieng ta a nih.

Chuong lai chun khawhnâwma phûla berampuhai an beramhai venga riekchilhai kuoma vantirko a hung inlâr a, Isu pieng thu a hung hril ta a. Chuong thu an hriet phing chun berampuhai khawm chu an inthawk vak a, Isu naute hung pieng thar chu en dingin an ranruolhai maksanin an fe ta a. Chuongchun a hmun an va tlung chun vantirkoin a hril ang ngeiin Josef, Mari le an naute Isu ranbupêknathlênga zal chu an va hmu ta a.

Isu Krista pieng thu vantirkoin berampuhai kuoma a hril dan chun, “In ta dingin Sandamtu a pieng tah, Lal Krista chu!” tiin a hril a nih. Chu umzie chu Isu Krista hung pieng hi mihriemhai sandamtu ding tina a nih. Anleh mihriemhai hi ieng dinga sandam țula um am ei na? Ieng dinga Isu kher kher hin a mi sandam thei am a na? tihai ei hril ding a nih.

A pakhatna ah mihriemhai hi suola thi ta hnung, mani in sandam theilo eini leiin a mi sandamtu ding midang ei ngai a nih. Ei thlatu Adam le Evi bawsietna lei khan annia inthawka insieng mihriemhai po po hi suola pieng vawng ei hung ni ta leiin suol ei thaw le thaw naw thu niloin, ei pienga inthawka suola pieng hrim hrim ei lo ni tah. Entirna dingin ka pa chu Hmar a ni leiin Hmara pieng ka na, ieng angin țawng dang hmang thiemin Hmar țawng chen khawm theinghil vawng lang khawm Hmar ka nina a bo chuong nawh. A san chu Hmar thisena insieng ka ni leiin. Chuong ang bawkin thil suol thaw in la, thaw naw inla, suola insieng ei ni ta lei khan misuol ei ni ta hrim hrim a nih. Suol ei thaw leh misuol thil suol thaw ei na, thilțha ei thaw khawma misuol thilțha thaw ei ni el a nih.

Tirko Paula khawma Rom 3:23 ah “Mi po poin thil an suksuol vawng ta a, Pathien ropuina an chang zo ta naw a nih.” a ti a nih. Chun Rom 6:23 ah Paula bawkin suol man chu thina a nih, a ti leiin, mihriem suola tlu ta hnunghai hi thi hmabak vawng ei ni ta a. Hi taka thina a ti hi taksa thina el niloin thlaraua thina, Pathien le kuomkhuoa ințhe sawngna le chatuona hremhmuna hremna hai hi a tina a nih.

A pahnina ah mihriem aiaw ding chun mihriem vêk a ngai a nih. Isu Krista Pathien Naupa hin mihriemhai suolna leia an hremna tuor ding mihriemhai aiawa a hung tuora a thina ding chun ama hi mihriem a ni a ngai a. Chun, midang suol intlantu ding a ni leiin ama chu suolna neilo a ni a ngai nawk bawk a nih. Adam thla a pieng taphawt mihriemhai chu suolna nei vawng an ni leiin Pathien naupa suolna nei derlo chu mihriemhai aiaw thei dingin mihriema hung insiengin khawvel mihriem po po aiaw in an suolnahai leia thiin a hung intlan ta a nih. Isun sandamna sin a hung thaw dan hi ei hang bi vang vang chun ei sandamna chang hi Pathien ngeiin a hung riruong vawng le ama bawkin a hung phursuok vawng hi a lo nih.

A pathumna ah Isu Krista hi eini mihriemhai mi sandamtu dinga Pathienin a ruot hrim hrim a nih. A hming umziehai reng reng khawm hin a nina a tarlang hle a nih. Thuthlung Thara Isu ti hi Greek țawnga mi a ni a, Thuthlung Hluia Joshua ti hi Hebrai țawnga mi a ni a, an umzie chu thuhmun an na, a umzie chu Jehova Sandamtu tina a nih. Jehova chu Pathien hming a ni a, chuleiin Pathienin sandamna sin a hung thaw tina a ni a, hang ngaituo chun a sandam hne awm hle a nih. Chun Krista ei ti hi Hebrai țawnga Messie ti le Greek țawnga Kristos tihai le thuhmun an ni a, a umzie chu ruota um chu annawleh Pathien miruot chu tina a nih. Chuleiin Isu Krista hming umziehai ei hang remkhawm chun Pathien, mi sandamtu dinga ruota um chu, tina a nih.

A palina ah Isu hi mihriemhai Sandamtu dinga ruot a ni zie sukchiengtu pakhat nawk chu Thilthaw 4:12 a Peter thuhril hi a nih. Judahai kuoma Isu hi sandamtu dinga Pathien miruot ani zie a hrilna ah Isu hming naw chu “Mi dang tu kuoma khawm sandamna a um nawh; vânkhuphnuoia mihriem isak lai, a mi sandam ding hming dang hrim a um nawh,” a ti tawp a nih. Peter hin Isua sandamna um hi a hmu chieng hle a nih. Isu rawngbawl lai khawm Isu hnungzuitu tamtakin an fe san laiin, Isun anni rawikhawm fe hmang an nuom ve am ti an dawn chun, Peter bawkin, Johan 6:68 ah “Lalpa tu kuom dang am feng kan ta, nangin chatuona hringna thu i nei annawm” a ti tawp el a nih. Chun Isu ngei khawmin “Kei hi Lampui le Thutak le Hringna ka nih,” a ti a nih (Johan 14:6). Chuleiin Isu chau hi khawvel sandamtu dinga Pathienin a riruong chu a nih.

Țhenkhatin Pathien hi hmangaina a ni leiin mihriemhai kumkhuoa hremhmuna um chu phalnaw nih, an ti hlak. An dik hrim a nih, Pathien hi hmangaina Pathien a ni lei takin ei bohmang ding a phal naw a, ei sandamna ding Isu Krista ahin a mi ruot pek lem a nih. Hi naw hi sandamna lampui dang a siem nawa, a umnaw bawk a nih. Entirna dingin khurkhuruomah tla lang suok thei ta naw lang. Ka pa chun a naupa ami hmangai em leiin kân ban kaina ding hruihruol hung thlâk thla sien. Kei chun a hruihruol thlâk chu ngaisak loin ka pa’n a mi hmangai em a, hilai khurkhuruoma ka thi sawng mi phal naw nih tiin ngaițha takin um lang, sansuokin um chuong naw tawp ka tih. Chuong ang bawkin Pathienin a mi hmangai leiin a mi sandamna dingin a Naupa Isu Krista a hung tir a, hihi ei ngaisak naw chun sandamin ei umnaw ding ma chu ning a tih. Hebrai ziektuin 2:3 na a a hril angin, “hieng ang lawma sandamna ropui (Ama Pathien ngeiin a mi buotsai pek) hi inthlathlam inla, iengtin am tlân suok thei hlak ei ta?”

Chuleiin Krismas ei ti a, Isu piengchampha hlim tak le lawm taka inser si hin, a hungna san tak sandamna a mi hung buotsai pek hi hrefu lo le chang loin um pal ei tih, ti inlau a um hle! Isu Krista hung piengna san tak a sandamna sin thaw hlâwkpuitu le changtuhai ei ni seng theina dingin Lalpan Krismas hmangtu le ngaithlatuhai po po mal mi sawm seng raw se. Amen!

Facebook Comments

Leave a Reply