PATHIEN KOHRAN INCHIKNA (2 TIM. 2:19)

By: Rev. Lalrosiem Songate

Rev. Lalrosiem Songate

Rev. Lalrosiem Songate

Khawvel tâwp huna mihriem hai mak ti em em ding pakhat chu sandama in ngai si sandamloa um ding dam, thilṭha thaw a inngai si a, Lalpan, “Nangni thilsuol thaw tuhai ka hriet ngai naw cheu …” a la ti hun ding hi a nih. Ei bible châng thlanga khin Pathien kohhran inchikna pahni a hrila chuonghai chu hang en ei ta, mani khawm lo in enfie seng bawk ei tiu.

Pathien Lungphum: Pathien lungphum a ngir zing thu a hril a, a ṭawngbul tieng chun nghet tak le sukchang ruolloa ngir a ni zie an lang nghe nghe. Chu lungphum chu ieng dang niloin Isu Krista hi a nih. Isu ngeiin “Hi lungpui chunga hin ka kohran rem ka ta…” (Math 16:18) a ti khan chu lungpui chu a kohran lungphum (foundation) ding a ti na a ni a, chun chu lungphum chu ama a ni bawk a nih. Eph 2:20-22 a khawm Isu Krista a lungphum laia iengkim in nghatna tak a ni zie ei hmu a, chun I Kor 3:11 a khan lungphum chu Isu Krista ngei a ni zie khawm ei hmu bawk.

A umzie chu kohhran hi in, lunga rem ang le tekhi a nih. A in innghatna lungphum chu Isu Krista a na, chu chunga chun kohran hai hi remkhâwm ei nih. Kohran member mimal tin hi inbawlna dinga hmang lung hai ang ei na. Lung reng reng hi an piengzie an inangnaw vawng ang bawkin mihriem hai khawm hi mizie inang pakhat khawm ei um nawh. In bawltuin lung piengzie hran hran hai rem khawm dinga a ṭhen a vuok kawi a, a ṭhen a vuok tlama, a ṭhen a do pâwng angin eini ringtuhai khawm hi Pathien thlarau irem khâwm thei dingin, a ṭul anga vuokkawi, vuok bawng le sawisak thei dinga ei um a ngai. Lung zie hran hran le chi hran hran hai nghet taka cement hmanga châr khâwm anni angin eini ringtuhai khawm Pathien Thlarau Thienghlim in ami châr khawm ding a nih.  Chuchu Pathienin a kohran an din nuom dan a nih.

Kohran sunga mani rilrem zawng chau in thuhmupui bikna hai, hnambing, laibung bing annawleh pawlbinga rorelna hai hi Pathien rama hin an inleng ve nawh. Mani rilrem zawnghai chau le inthuruol taka tlawmte a inkei bum hi Pathienin kohran a rem tum dan khawm an bawk nawh. Chuong thilhai chun Pathien ram suklien nekin Pathien pawi an tâwk lem a nih. “Nangni thilsuol thawtuhai….” (Math. 7:23) a tihai ding hi an ni el thei a nih.

Pathien Inchikna pahni hai: Hi taka inchikna ti hi a umzie tak chu English ṭawnga “Seal” ei ti hi a ni a. A umzie tak chu a neituin a nei fel tah, a neina dinga transaction iengkim zofel vawng tah tina a ni a. Pathien kohran chu Pathien ta a na, a neina dinga transaction iengkim Kros ah zo fel an ta a, Pathien ta an tah, tina a nih. Hihin eini laia kohran ei ngaidan tlangpui hi mi sawihning sien nuom a um ngei. Kohran hi Pathien ta a ni leiin kohran rawngbawltu le enkawltu hai hin Pathien dit dan anga an enkawl hi a pawimaw hle.

Ei rama kohran hai hi a hnam zawngin ei inkei bûma, ṭawng inhrietpaw dan zawng khawm a ni leiin a pawinaw ah ngai in la, amiruokchu ei kohran hai hi hnam ta le hnam hmangruo anga ngaina dam, hnam inpumkhatna hmangruo ang chaua ngaina dam a um hlak hi ei hrietchieng tawknaw lei niin an lang. Kohran chun inpumkhatna le inthuruolna umna dingin a hnam bing sunga chau khawm niloin a hnam puo tieng khawm hma a thei ang anga a lak ding ani lai zingin hnam hmangruo ang chaua ngaina ruok chu an diknaw a nih. Kohran hin hnam khat inpumkhatna neka in the darna a suk suok chun an diknaw bawk a nih. Hieng thilhai hin Pathien pawi an tawk phak tlat.

Inchikna Pakhatna: Pathien kohran inchikna pakhatna chu “Lalpa in ama ta hai a hriet” ti hi a nih. Isu khawma Berampu Ṭha chanchin a hrilna ah Berampu Ṭha chun a beramhai a hriet a, an hmingin a ko hlak a ti a ni kha (Johan 10:3,14). Beram dang a beram huong sunga va lutin a beramhai angin va um sienkhawm Berampu Ṭha chun ama beram a ninaw zie a hriet tho a nih. Kohran a hin ieng angin member hlun le pawimaw ni inla khawm Pathien mi hrietna ei nei si naw chun umzie a nei chuong nawh. Nakie Lapa hung nawk huna ei muolphona ri a nasa mei mei ding lem a nih.

Entirna dingin US President Barak Obama hi mitin deu thawin ei hriet seng, khawlaia intuokpui pal in la khawm hre nghal ei tih. Amiruokchu ama chun mi hre naw tawl hleng a tih. Chuong ang bawkin Pathien hrie inti tak tak Pathienin a hriet si lo ei va tam awm ngei! “Lalpa, Lalpa!” ti nazawng chu Pathien ram an lut naw ding chau niloin rawngbawltu inti ngiel ngiel, Lalpa hminga thuhril dam, Lalpa hminga thilmak hai thaw le khawhrihai hnawtdawk hlak damin an thilthaw hai suongin Lapa hei ko an ta, chutaka Isu dawn dan ding chu, “Nangni thilsuol thawtuhai ka hriet ngainaw cheu… “ (Math. 7:23) a la ti ding ku hi a mak tawp a nih. Krista ṭhanglo khawma rawngbawl thei a na, thilmak hai khawm thaw thei a na, khawhrihai chen khawm Krista ṭhangloa hnawtdawk thei a lo nih! (thilmak thaw le khawhri hnawtdawk hai hi ei ngai ropui nasa tawl si!). Chuonghai chu Pathien mithmua chun “thilsuol” thaw mei mei an lo ni lem. Pangzat a um ta ngei!

Inchikna Pahnina:  Pathien ta hai inchikna pahnina chu “Lalpa hming lam taphawtin suol fe san raw seh” ti hi a nih. Hi taka Lalpa hming lam ti hin “L-A-L=Lal, P-A=Pa, Lalpa” ti a va lam rik ringawt an nawh. Lalpa hming lam ti umzie chu Lalpa Pathiena nei tina ani a. Eini tulai ṭawnga ding chun mi piengthar hai tina a nih. Chuleiin mi piengthar taphawt chun suol fe san raw seh, ti umzie chu mi a piengthar ta chun ama a hringna thar mizie chun suol thaw hlakna nuna inthawkin a ṭhuoisuok ta hlak leiin piengthar inchikna indik tak chu nun inthlakthleng hi a nih. Piengthar inti si a nun inthlak thleng hmu ding um derlo chu a piengtharnaw a ni el.

Hringna hrim hrim, ieng hringna khawm nisien thup sawngin a um thei nawh. Thlaikak chikte khawm a hung kak suok hlim chun min hmunaw hai sienkhawm a hung inṭhang lien pha chu hmulo theilo a nih. Min Pathiena hringna indik tak a nei chun a thlarau nun a hung inṭhang lien pei a, ama in suol va fe san tum khawm a ngai nawh, ama a hringna ku khan suolna le thina dana inthawkin a thuoisuok lem hlak a nih (Rom 8:2).

Lalpan tiemtu po po malsawm raw se!

 

Facebook Comments

Leave a Reply