Pathien Thucha

Thoma Sulhnung Suina

Rev. H. P Runremthang

Isu inchuktirhai laia mi ngei, Galilee, Judai ram le Samari ram daia lo khawsa hlak Thoma khan ei ram (India) ah Chanchin Tha leiin a lu a hung phum ngat el a na. Chu a thina le inzawma hmun pawimaw tak tak pathum lai Chennai khawpuia hin vawng himin a um a. Chuonghai chu sakhuo hminga inzin mihai ta dinga hmun pawimaw (pilgrim centre) a tling phak a nih. Ei rama um ni si, unau tamtak la hmu lohaiin an hmu ve thei dinga buotsai chu eini, a hmuna umhai mawphurna a nih” tiin July 31, 2011 (Sunday) khan a hmun ngei sirin fang kuol a nih a; malsawmna tamtak kan dawng pha. Hun sawtnawteah a lim (picture) khawm lo hmu beisei a nih a. Chu hma chun a thu tlangpui bek lo tarlang ei nuom a nih. Isu inchuktirhai laia Thoma hin hming pathum lai a neia hril a nih a; chuonghai laia hrietlar deuhai chu Greek tawnga ‘Diduma’ ti le, Aramic tawnga ‘Thoma’ ti hai hi an nih. Hienghai hi “Inphir” tina ve ve an nih a. “Inphir” ti a put san hi mi thiemhai hril dana chun, a farnu Lysia le inphir an ni lei niin an ngai a nih.

Eini rawiin a tlangpuia ei lo hriet dana chun- Isu inchuktirhai laia pakhat ‘Thoma’ chu India ramah a hung thi a nih ti kha a nela. Nisienlakhawm, Thoma hi India ramah missionary pangngai ang elin a hung vang vanga, Krista ta dingin a hringna a hung inhlan pangngai ringawt an nawh a. India ram chau nawa khawm Parthia ram dam, Media le Persia ram dam; Carmania ram le Hyrcania ram dam; Bactria le Magia ram dam khawm a sirkuol niin (Kum zabi 4-na lai vela kohran chanchin ziektu hmingthang pakhat) Eusebius chun a hril a nih.

Chennaia chau khawm ni loin Thoma hin India ram sunga ngawt khawm sulhnung tamtak a nei a. Scotra thlierkar a sir hnungin, AD 52 khan Cochin a tlung a; chutaka Juda tlandar lo umhai kuomah Isu Krista Chanchin tha a hril a, hmun sari laiah kohran an din nia hriet a nih. Chuonghai chu Quilona dam, Palayur-a dam, Choyal-a dam, Gokamangalam-a dam, Miliankara-a dam, Nilanam-a le, Parur-a hai an nih. Hi hnung hin khawsak tieng a fe pei a, China ram chenin Chanchin Tha a hril pei a. Chutaka inthawka hung kir nawkin Mylapore (Chennai khawpui bul) ah a khawsa a. Hippolitus tlanga rawng a bawl laiin Hindu thiempuhaiin an hnawt a; a Lalpa kuoma a tawngtai laiin feiin an sunhlum tah a nih. Ama hming chawi hin kohran lientak pahnih a ngir nghe nghe a. Pakhat chu Mar Thoma Church (Pu Thoma Kohran) a nih a; pakhat nawk chu St.Thomas Evangelical Church of India (tuta keini inchukna College neituhai hi) an nih.

Hi Chennai khawpui sunga hin a sulhnung hmun pawimaw pathum a um a. Pakhatna chu thiempu haiin an hnawt a, puka an tawmna hmun le an sunna hmun “Little Mount” tiin an ko a. Pahnina chu- a thina hmun. Chutak chu “St. Thomas Mount” tia koin a um bawk a. A pathumna ruok chu- “St.Thomas Basilica” an tih a; Thoma thlan hmun ngei nia hriet a ni leiin Biekin ropui deu an bawl khum a nih. Apostle-hai thlan hmun ngeia Biekin bawl hi “Basilica” an tina san chu a nih a. Hieng ang hi khawvel pumpuiah pathum chau a um a, Rome khawpuiah “St.Peter Basilica” ropui deu a um a, Spain-ah “St.James Basilica” a um bawk a; St. Thomas Basilica, Chennai a mi hi a pathumna a nih.

St. Thom Basilica- a hin museum khawm a um a. Chutaka chun Thoma an sunna fei hmawr zum nia hriet chu tha takin an kawl tha a; ama thlan hmun ngei nia an hrietna hmuna inthawka an icho suok “Thoma ru hlek” nia an hriethai khawm an kawl tha thlap a nih. A thlan hmun ni ding awma an ringna lai tak (hnuoi ril inthuk deu tak) a chun Darthlalangin kuong nal takel an siem a; chutaka chun Thoma lim (statue) chu an inzaltira, a kawl taka chun ama an sunna fei lim an siesa bawk a nih. A kuong chunga chun ama tawngbau ngei “MY LORD AND MY GOD” (Ka Lalpa le ka Pathien I nih) ti chu an ziek bawk a, lungril a them em em el. Chutaka chun, a sirtuhaiin to tawka tawngtaina an nei theina dingin tiin Thungna (bench) tam tawk takel an sie a. Keini khawm hnukul raka tawngtaiin hun kan hmang a nih. Sap ram tienga inthawk le hmun dang danga inthawk khawma a hung sirtu an um zing bawk.

Little Mount an ti hi ‘little mount’ an ti ang hrimin phai ram khawpui sung laia tlang bawk chite, lung hmun deu vawng a nih. Hi hmuna hin ‘Hindu thiempu haiin that tuma an hnawt laia an tawmna puk’ an ti chu a um a. ‘Bleeding Cross’ an ti a um bawk a. Hi ‘bleeding cross’ an tina san chu – Thoma khan ama thisen farna hmun chie lungpui chunga khan Kraws lim a kera, chu chu hi Kraws hi a nih an tih a. Thoma kutsuok chie niin an hril a nih. Chun, hi Krawsa hin vawikhat chu thisen indiktak a hung suok ngei niin chieng takin an hril a nih. Chun, Thoma beidawng taka a tlansiet laia a tui dawnna a nih’ an ti a um bawk a. “Hi tui hi a pung chuong nawh a, a fe taphawtin an dawn khawma a kang chuong bawk nawh” an ti a nih. Keini khawma lungril le titakzetin kan dawn ve.

St.Thomas Mount tia an ko bik tak hi a hmun an hawi hle. A tlang khawm an sang a, Chennai khawpui khawm chieng takin an thlir kuol thei a nih. A kawl ela chun International Airport (khuoiva lun lai ang ela Vuongna vuong suok le vuong lut chu) chieng taka zuk hmu theiin a um bawk a, a suk inhawi pha hle. Hi hmuna hin Thoma a tawngtai laia feia an sun lai lim le, a ringhla leia Isu nak a purlai lim (statue) chu Biekin sungah an sie a, lungril a tawk em em. Tlang bul thuta inthawk chun Isu’n Kraws vawi thum lai a tlukpui lai le, an hemde chen lim (statue) chu lam sir peia chun an inthut bawk a nih. Iengtiklai khawm hi hmuna hin tawngtaia hun hmang an um zing bawk.

Thoma hi a hmel ei hmu phak nawh a chu inchuktirhai laia khawm a danglam bik rieu a nih ti ei hriet a. ‘Thil sut chet chet mi, a hrietchieng hle naw chu ring el nuom lo mi a nih a. Isu thonawk hnunga inchuktirhai kuoma an lar khawm khan inchuktir danghai chun, “Isu kan hmu tah” an tih a; Thoma ruok chun, “A kuta thir kilna serhai kha ka hmu a, thir kilna serhaia chun ka kutparhai ka khik luta, a naka ka pur meu naw chun, ring naw ning,” ti ngat el kha a nih a (Jn.20:25). Hieng a ni lei hin “Ringhlatu Thoma” tia hrietlar a hlaw pha nghe nghe a nih.

Nisienlakhawm, Bible thiemhai chun “Ringhlana hi Thoma nun a ni nawh a, mi an dawr pui dan amanih, a mizie kalhmang pakhat ve ringawt a nih” an tih a; an ti indik ngawt el. Ringhlana chu Thoma nun a ni nawzie chu hieng laia Chennai khawpuia a sulhnung hin a sukfie takzet a nih. Eini rawi chu thil ei zuk hriet hi, ei hrietchieng hma khawmin ei zuk ring nghal a; niseinlakhawm, sawtnawte ah ei inphatsan nawk hlak. Thoma ruok chu a hrietchieng naw chu a ring el nuom nawh a, a fimkhur em em a nih. Nisienlakhawm, a hrietchieng ta laklaw chu a thipui ngam nawk thung a nih. Chu chu a nih ‘ringtu nun indiktak lem ding chu’.

Chuong a ni lei chun, “Ringhlatu Thoma” tia hrietlar ni sienlakhawm, ringhlana chu a nun a ni nawh a; chuong ta nek chun, ringhlana chun hrietchiengna nei dingin a nun a kei thuoi a. A hei hrietchieng zet chun “Ka Lalpa le ka Pathien I nih” (My Lord and my God) tiin a khek ruoi el a nih (Jn.20:28). A va ropui nawk ta si de! Hieng a ni lei hin Bible thiemhai chun ‘Isu hi ‘Lalpa’ chau ni loin, ‘Pathien’ a nih ti puong hmasataktu chu Thoma hi a nih an ti a nih. Chu chau khawm chu ni loin, “A thinaah thi ve dingin feng ei tiu” tia tawng suok ei ihmu sun chu “Ringhlatu Thoma” chau hi a ni ve thung a sawn naw! (Jn.11:16).

Chuong ang pei chun a chengna ram Galilee, Judai ram le Samari ram hung maksanin India ramah a izui Lalpa ta dingin AD 72 lai khan a hringna a hung inhlan tah a nih. “A thinaah thi ve dingin feng ei tiu” ti chu a hung sukdik tah a nih. Tuin am “Ringhlatu Thoma” tiin ko nawk tang an ta? A iringhla hlak, a Lalpa khawm khan a nak chau inpurtir ta loin, a angsungah an chawltir lem ta ding a nih.

Ringhlana hi Lalpa’n a hnawl nawh a, ei lo ringhla hlak a ni khawma, hrietchieng tumna neia ama hnai dingin Lalpa’n a mi dit a nih. Thoma thina hmun le hmanghai chu a lo indik tawk naw thei. A tui dawnna le an tawmna puk dam, an sunna le a thina hmun dam a lo indik tawk naw thei bawk. Hieng hmun le hmanghai hi a lo indik chie am ti zawng dawk chu Chennai Hmar Christian Fellowship thiltum an nawh a. Chuong nek chun- hieng Thoma sulhnunghaia inthawk hin ei nunah inchuktir mi nei sien la. Krista hi ringhlana neiin lo zui hlak inla khawm, hrietchieng tumna lungril neiin pan hnai inla, ama ei hrietchieng ta hnunga ruok chun inphatsan ta loin, “A thinaah thi ve dingin feng ei tiu” tiin ei infiel lem a nih.

Rev. H.P. Runremthang Video Sermon