Pathien Thucha

Hnuoi Inphanna Hmun

Rev. Dr. Lalrosiem Songate

By: Rev. Dr. Lalrosiem Songate

Celt hai hin “inphanna hmun” ti hi an hril hlaka. An hril dan chun hnuoi le van inkar khawm hi feet thum vel chaua hla a na. Amiruokchu hmun thenkhat ah a kar a hnai zuolna hmun a uma chuong chu “inphanna hmunhai” (Thin Places) an ti hlak a nih. Hieng ang inphanna hmuna umhai chu hnuoi rama umsi in vanram an hnai em em a, chuong chun hnuoi rama umsi in vanram inhawi zie le ropui hai an hmuin an intem phak hlak. Khawvel rama umsi in vanram hlimum zie le inhawi zie an intem leiin an umdan hai khawm khawvel mihriemhai mithmu ah a mak chang khawm a tam hlak a nih.

Celthai in an hril pei dan chun hieng ang hmun inphanna hmun haia hin khawvel le vanram indaidanna bang hi an phan em em a, vanram le Pathien ropuinahai khawm iemani tawk an hmu phak in an intem ve phak hlak a nih. Hieng ang hmuna umhai chu khawvel pakhata inthawkin khawvel danga in inchawm lut anni deu tak hlak a nih.

Annawleh, hieng anga inphanna hmun hi iengtinam an tlung hlak a?

Celtic hai ngaidan chun hieng ang hmun ei tlung theina ding chun hriet ngailo ram suk a ngai. Ei hriet thangna hmun le ram, ei nuom nuoma ei umna rama inthawk hin chu lut thei annawh. Ei thu le hla loa sietna thina le thil rapthlak tak tak ei nuna hung tlung hai hin chulai ram chu a min hnai tir lem hlak a nih. Chuong ang ngirhmuna chun min inban tangna ding dang a neinaw leiin Pathien an koa, an bel mawl mawl hlak.

Chuong ang mihai chun hrietngailo ram an lut inthuk po leh Pathien an hnai zuol sau saua, Pathien an hnai zuol sau sau po leh khawvel dang an hnai sau sau bawka. A tawp a lem chu hnuoia um siin Pathien ropui zie hai,  vanram inhawi ziehai intem phak tawk an hung neia. An ngirhmun harsa em em sienkhawm Lalpa ah an lawm em em hlak anih.

Hi thu ka ngaituo leh hmeldanglamna tlanga Peter khawsak dan a min ngaituo tir chu tie. Hmel danglamna tlanga khan Isu kha a thuoihruoihai hma bula a hung danglama, a mihriemna hlip thlain a Pathien ropuina kha a hung suklang ni awm a nih. A hmel khawm nisa angin a hung var puma a silfen hai khawm an hung var vawnga. Mosie le Elija khawm an hung thla a, Isu le chun an titi ta a. Vanram inkhawmpui hnuoiah an hung hmang vak ni awm tak a nih.

An thilhmu chu mak an ti tawl hle ning a tih, Peter chu a hung tawng suok a, bawkte pathum bawl a rawt ta a. A umzie tak chu inhawi le ropui a ti em leiin umsawng a rawt ta a nih. Inhawi a ti em leiin ama le ama khawm an hriet fuk ta naw. Mosie, Elija le Isu hai umna ding a um phawt chun anni rawi chu tuolpara um el khawm a pawi ti naw a nih. Mihriem tukhawmin Pathien an hmu chieng chun mani inhrietfukna tieng hi a tlawm zat zat hrim a nih. Vanram le hnuoiram inzawmna laia khawsa anni tak a nih.

Hiengang nun changtuhai chu hnuoi rama cheng nihai sienkhawm an lungril le khawsakna chu vantieng a ni a. Hnuoia rimsiein nat inrumin umhai sienkhawm an sungril tieng mihriemna ruok chu nitin siemtharin a um hlak a nih.

Hieng ang nun hi i chang ve tam?

Facebook, Mihriem Inrukna Hmangruo

Victim of Human Trafficking

Nikhat lai el khan Nagaland nunghakte pakhat kum 17 mi chau Dimapur ah vuongna a chuong tum mek chu sansuok a nih. Chuchu Mumbai slum ṭawphnawk laia cheng, nga mana fak zawng fawm pakhat Facebook ah model inlar anga inhrilin a hlem a lo ni zing. Chun Defence Colony a dawrkai pakhat ve mei mei khawm, tlangval kum 25 vel sumdawng hausa tawntaw anga inhrilin India hmarsak nunghak pakhat a hlem bawk. Hieng ang thuhai hi India hmarsak state haia Police haiin Delhi Police kuoma report an hung pek ṭhenkhat an nih. Chu umzie chu India hmarsak nunghak tleirawl ngaituona hau manglo tam tak hi Facebook a inthawka an inhrietpui le an in ngaizawngpui hai Delhi laia hmu dingin an nu le pa hai hrietloin an tlanhmang rawp hlak alo nih. Continue reading

Ka Nuhmei Mâk Ka Hei Tum Zet Chu!

Thinan ami ṭhe hmakhat

Zankhat ka sin inlawi chun kan nu in ka fak ding bu a hung thur mawl mawl a. A kut ka chela, hril nuom ka nei thu hrilin inṭhung dingin ka ti a. Ka thu hril tum ngaithla dingin ama khawm chu anṭhung nghal a. Ka thu hril tum chu inṭhe ka nuom thu ka hrilpui tum a nih.

Ka hang hril ta ngeia, lungsen hmel khawm put chuong loin a san a min dawn ringawt a. Continue reading