Pathien Thucha

Rev. Dr. Lalrosiem Songate

By: Rev. Dr. Lalrosiem Songate

Isu piengthu ei tiem hin Krismas hun leh ei ngaizawm hlak bawk lei ninga ta, naute Isu bak ah Bethlehem bawngin, khawsak mivar tihai Krismas ruoițhe le lengkhawm hai leh ei ngaituo zawm rawp hlaka, a pa Josef, ân siengna tak khawm annaw bawka, ngaituo zawm a hlaw tlawm hle hlak anih. Amiruokchu a chunga ei Bible chang thlang sunga khin hi Juda tlangval Joseph mizie ngaisang um em em hriet theia umhai hei tarlang zawk ei tih.

A hmasa taka Bible in a mizie a mi tarlang pek chu mi feltak a nih, a ti a. Ei țawnga mi feltak a ti hin “tak” ti hin superlative degree anga hmanga ama neka fel tukhawm um talo, mi po po laia feltak tina anga hmang chu ninaw ni a. Hi kawnga hin ei țawng hmang dan hi fimkhur a ngai el awm de. A sap țawnga lem chu “And Joseph her husband being righteous …” (Matt. 1:18 Young’s Literal Translation) tiin comparision degree iengkhawm hmang loin a hril el a. Eini khawma ei inlet dan ding chu “Chun a pasal Josef chu mi feltak” ti nekin “mi fel a na” tia inlet ni lem el sien an diktak awm ie.

Hitaka mi fel a ti hi ieng ti kawnga fel a ti am ning a ta, annaweh eini rawiin mi fel ei ti hai hi iengti kawnga fel ei ti am ning a ta? Ei khawtlanga hai khawm tlangval le nunghak țhenkhat “a fel de aw” ei ti an um rawp hlak a. Fel le felnaw ei inkhina iem a ni tlangpui a? Hi thumal hi a sap țawnga chun ‘righteous’ ti a na, chuchu “fel” tia inlet tlanglawn hrim a nih. Hi thumal hmang dan a hin theological term le general term a țhe theiin a um a. Theological term hin Pathien tieng hrilna a Pathien felna ei ti hai, mihriemhai Krista zara thiemchang ei nina leia mi fela ngai ei nina hai ning a ta. General term ei ti hmang dan tlanglawn a chu mi țha deua ei ngai hai hi ‘a fel’ ei ti hlak a. Hilaia a hmang dan khawm hin general term, hmang dan tlanglawna a hmang el nia ngai ding a nih.

Isu nu Mari pasal Josef khawm hi khawtlang a khawma mi fela hriet hrim hrim, mi lungril tluong, uongthuongna neilo, Pathien hre mi a ni bawk a nih. A felna pakhat Bible a ei hmu chu a nuhmei huol lai zing anrai ti a hriet khan suk muolpho zawnga thaw loa to țawka ințhepui a fe san el a lo tum a nih. Hilai thu hi Bible in tluong putin a zuk ziek ela chu Josef in a hriet hlima a lungril nat dan ding, mak a ti dan ding le a beidawng dan ding dam hang ngaituo zui met in la. Tlangval thengthaw, lungril tluong le fel em em, hmabaka nuhmei neia sungkuo indin dinga inngaituo a nunghak khawm fel taka a ihriet Mari le ngei innei dinga in suk fel ta hnunga, a nuhmei huolin pasal dang laka nau a lo hei pai el ta chu rapthlak tak chu a nih! Nunghak tlangval inngaizawng hman an ințhe hin khawsawtin an kurinkuk hlak a na, Joseph ta ding chun harsa ve hleng a tih.

Mithiemhai hril dan chun Judahai dana innei dinga inhuol tahai hi nupa ang thoa ngai anni a, nuhmei dang pasal danga chetsuol hi uire le thuhmuna ngai anni hlak. Josef khawm hin a nuom chun a nuhmei huol Mari chu uire a intumin a hêk theia, Mari khawma lunga denghlum chen a tuok thei bawk a nih. Josef ruok chun a ngaizawngnu hin inphatsanin pasal dang laka nau lo pai sien khawm lungsena suk muolpho hi a tum ve nawh. Mi lungril ngilnei tak chu a va ni ngei! Tlangval țhenkhat an ngaizawnghai muolphona ding le hmingsiet theina ding ngaituo lek loa an nuom nuoma nuhmei chunga che tla an um hlak. Ei sawsaiti a hai hin pasal nekin nuhmei ta dingin hmingsiet le muopho a awl em em, hieng hi tlangval fel chun an veng pek hlak ding a nih. Tlangval hai hin ngaizawng nei dan a hin Josef hi entawn dingin a tha hle!

Chuonga a ngaizawngnu fe san el dinga a lo inngaituo lai chun a mang tieng Pathien vantirko in a hung inhriettir a, lungawi takin a nuhmei huol Mari chu a nei ta a. A nuhmei huol Mari inrai thu a hrieta beidawng taka a um laia Pathiena inthawka hrilfiena a hang dawng hnunga a lungril zangkhai dan ding le a hlim dan ding thlawt chu lawmpui a um hle! Juda mi an nia, Messia hung pieng ding le nunghak inthieng inrai dinghai khawm zawlnei hrillawkna hretu vawng kha an ni ding a na, chu hrillawkna tlungkimna ding kha a nuhmei ngei a lo ni zing ti a hang hriet lem chun a lawmna nasa zuol hle bawk a tih.

Chun Josef fel em em na chu ansumtheina hi a nih. A nuhmei huol Mari inrai chu Pathien thilthaw ani ti a hriet a, a nei nghal a. Amiruokchu chang 25 na kha ei hang en a, “nisienlakhawm, nau pasal a nei hmakhat chu a pawl nawh a,” tiin a hril a. A tlangval lai po po khawma insum theia nuhmei laka pawrche der lo, nuhmei a nei hnung khawma pawl el loa lan sum ngat ngat thei chu rapthlak tak a nih. Nuhmei inrai lai pawllo ding ti dan khawm a umnaw a, pawl theilo khawm an chuong bawk naw a. Amiruokchu a nuhmei hi nunghak inthieng lai zinga inrai ani bak ah Pathiena inthawka inrai ani bawk leiin Pathien inzana leiin ansum el chu a ni awm. Eini rawi ei innei hma tak ngiel khawma insum zo lo hai ei ni a, Josef ruok chu a nuhmei nei hnung chen khawma Pathien inzana leia lan sum fan fan el chu mi fel chu a ni tak meu el anih. Insumtheina hi quality pakhat a na, a bikin nunghak tlangval hai nuhmei pasal thila insum el chau niloin thil dang dangahai khawm mi insumthei ni hi mani mihriem nun hnena pakhat ana, inchuk tlak tak a ni bawk a nih. Fak le dawn thua dam ei du lei ela fak teu teu hin hrilselna nekin hriselnawna an tlun lem a, iengkima a huntawk hriet hi a pawimaw khawp el.

Josef chan hi Juda tlangval po po inhnar khawp a nih. Juda nunghak po po laia Messia insiengna dingin Pathienin Mari a thlanga, chu pasal ding le Messia naute enkawltu dingin Juda tlangval po po laia Josef Pathienin a hang thlang bawk a. Hieng lawma chan țha chang dingin a hringnun khawmin a zir bawk a nih. Suolna le țhatna hrim hrim hin hnungzui a nei senga, suol thawtu chun suolra sik a ta, țhatna thawtu chun țhatna ra a sik hlak bawk. Mi lungril fel le tluong, mi insumthei le takinning ni la, Josef angin mi inhnar i ni ding a nih.