NUHMEI ṬI LE PATHIEN ṬI IN ANGNA

By  Samuel L Songate

The friendship of the Lord is for those who fear him,
 and he makes known to them his covenant. [Psalm 25:15/ESV]

Sap ṭawnga a umzie inkawkal annawleh a umzie inletling char nisi, anachu umzie nei deua hmang nuom leia ziek kawp annawleh sukkawp chu  ‘oxymoron’  an tih a. Eini rawi hrietthiem theina dinga a entirna ṭha tak chu ‘Sudden Muanga’ hi a nih. ‘Sudden’ ti chu thawklekhata thil tlung annawleh thil inrang taluo hrilna a ni laiin, ‘Muanga’ ti ruok chu muongchâng, in awi deu tina a ni nawk thung. Chuleiin ‘oxymoron’ chu thil inkawkal tlat, inkawp theilo amiruokchu inkawp tlat, thil ni thei lo, ni bawk si hrilna nih.

A chunga Bible chang, tlar hmasa lem khi ei en chun, Pathien ruolṭha nina chu ama ṭituhai ta ding a nih tiin English Standard Version chun an let a. BSI Golden Juibilee Edition a khan “Lalpa thuruk chu ama ṭituhai kuomah a um a”  tiin ei inlet a. A umzie tak chu Pathienin a thurûkhai chen a mi’n kawltir nuom khawpa ama le inruolṭha ding chun ama ṭi hmasak phawt a ngai tina a nih. Khawvel dana chu ei mihriem ṭi zawnghai le inruolṭhat chu thil ni theilo a nih. Ramsa khawm ei ṭi zawng hieng Sakei, Savawm tihai hi chu inruolthatpui le innêlpui ding tinah ei tin meu nawh. Chu nek chun a ṭium lo hieng ui le mengte ti vel hi inruolṭhatpui le innêlpui a awlsam lem. Ṭi bawk ding, inruolṭhatpui bawk ding chu mak ve tak a nih.

Nikhat lai khan ka naupa naupang lem Joshua Thangdailo (kum 8) in “Papa, khawvelah iem i ṭi taka?” tiin a mi’n dawn a. Kei chun intipa deuin khawvela hin zuk ṭi ding bek bek ka hriet naw ngei ie tiin ka dawn a. Ama chun I ṭi pakhat ka hriet a tih a. Iem tia ka zuk indawn chun, “Mama a ni maw?” tiin a mi dawn a. Ka nui an za angreng khawp el a. Ka lungril chun ei nauhai khawmin ei ṭi zawng chu an lo hriet ve tho a ni hih ka tih a. Naupang hi an lo invet naw khawp el.

Ka naupa thil hril chu ka zuk ngaituo zui pei chun, an dikna chin umin ka hriet a. Ei nuhmei ei pasalhai chu ei hmangai leiin an lungril nat ding zawng ei thaw nuom nawh a, milai khawm mitmei ei inveng tawn hlak a nih. Chu umzie chu ei inṭi tawn leiin ei inza tawn tina a nih. Amiruokchu ei ṭi lai zingin an kuomah thlamuong takin imu inhnik takin ei zal thei bawk si. Ṭi bawk si, an kuomah thlamuong taka um thei bawk si. ‘Oxymoron’ chu a ni chieng khawp el.

Hi taka inthawk hin Lalpa’n theology thar a mi’n chuk tir niin ka hriet a. Pathien khawm hi a ṭi tu tu chu an thla a muong lem a, a tinaw tuhai an thla a muong naw lem thung. Ṭi a um e ti lo chun ei hnai po leh ei thla a muong zuol bawk si. Khawvela ei thil ti zawng chu ei hnai po leh ei thla a muong nawh a, ei fe hlat san po leh ei thla a muong lem a. Pathien ruok hi chu ei ṭi po leh ama ei hnai zuola, ei hnai po leh ei thla a muonga. Ama ei hlat po leh ei thla a muong thei naw lem thung.

Thil mak ve tak chu, Pathien meu khawm ṭi loa huoisen taka mani nuom dan dana hringnun hmanghai hi, ṭi nei lo nana na chu an thla muong lem awm tak, anachu an thla a muong thei chuong ṭhak nawh. Abikin ringtu piengthar tah le la piengthar lo khawm ni inla, Pathien ditnaw zawng suol thaw zing pum hin thlamuong taka um thei a ni ṭhak naw chu tie! Chuleiin ringtu pieng thar ni ta si, thlamuongna ei la nei thei naw a ni chun Lalpa mithmua suol awma inlang hrim hrim chu bansana, Bible tiem le ṭawngṭaia Lalpa le hun hmang rawn ding a nih.

Sandamna camp le crusade ei nei changa mi tamtak ei buoina chu thlamuongna tak tak ka nei thei nawh ti a ni tlangpui. Chuleiin camp le crusade a hai thlamuongna ei zawng hlak. Anachu Isu Krista nei lovin thlamuongna hi a hrana nei thei an nawh. Hla siemtu in,

“Nang Pathian nung chu I ni,

Engkim chung a roreltu,

I hnen loah hian thla a muang lo”

a lo ti angin, Pathien kuoma naw chu thlamuongna tak tak hi a um thei nawh a. Chu thlamuongna chu ama ṭituhai ta ding chauh a ni bawk. Chuleiin Pathien ṭitu indiktak nia, a kuomah thlamuong taka ei um zing theina dingin Lalpa’n a thu mal mi sawm pek raw se! (Pune, March 29, 2019)

 

 

 

 

Facebook Comments

Leave a Reply