NIHAI HI A ȚHA NAW LEIIN REMCHANGNAHAI INCHAW PEI RO (EPHESI 5:16)

By: Rev. Dr. H. M. Songate

Pathienin sorkar hmangin ni 21 tawp insungah ami khum bum tawla, Pathien ni silo hmutheilo hripui chikhat ți-in ei intawm vawng el tah a, a nghawk ngiel ngiel chu tam ei tih. Pawl tamtak le sungkuo tamtakhai hma lakdan ka hmuin ka lawm takzet. “Nihai a țha naw leiin remchangnahai inchaw pei ro” ti kha ei sukdik ani ka ring. Eini mi sermon, online le ziekhai ka tiemin ka ngai rawn pha em em a, lawmum ka tih. Chuonglai zing chun sungkuo tamtak chu iengkhawm uksak loin ei intungmum mei mei nisien a hawi. Guwahati Hmar Christian fellowship chun lockdown anthawkin zantin kohranin insung maichama ding program details, bible tiem ding, hla sak ding le tawngtaina subject (pawl bang puotieng) siemin hun hmang a nih a, inkhawm hun pangngai sung ngeiah program hmang zie a nih. Passion week (Lungngaina hapta) sung khawm zantin inkhawm ngailo kha Pastor Vanlalsangin Passion week bible portions a hung siema, zantin mimal le sungtinin, hunbi neiin program kan hmang seng hlak. Zantina sungkuo maicham le inkhawmna nei ngailo an umpal ani chun lockdown hi thlarau rama chu a țha hlie hlie in ka ngai. Kei khawm program neia suok dawk zing hlak, neinaw chang pova ina study neia inbur char char hlak ka na, tuhin chu ka țhungna ka mit le kawngin a tuor naw tieng an tah! 

Biekin hmangsuol: Ei ta dinga lesson ropuitak le țawngțai puma ngaituo ding chu ‘Pathienin Ama biekdan hi thlakthleng deu a nuom tah’ nisien a hawi (Isai 1). Ringtuhai hi ‘Pathien in, Thlarau chengna in’ ei ni hi ei theinghil zova, ‘biekin (Chapel) hi Pathien in’ ei sawn zing khawm hi hril nuom a nei ni ngei a tih. Biekin hming hi sap țawng chun a liendan indawtin panga a um niin ka hriet. Church an nawh a, biekin(chapel) a ni lem. Church-kohran chu nang le kei ei nih. Biekin (building) le kohran-Pathien-in hi ei hriet hrang naw leiin ei hmang suol ve ve hlak a nih. Biekin-chapel sungah ei inti thutak rak a, ei insuk up-a, ei inhmuom muk a, ei hmur ei sukzuma, nal fahranin ei incheia, Pathien-in (mani) danglam chuong si lovin. Chuleiin, state pakhata KTP members țhenkhatin hieng ang hin ami hril, “Kan upa pakhat chu biekinah a lut charin an suk titak taluo a, a hmur a sukzum zing hlak” tiin! “Chuleiin, a hmingah “Upa Faifuka, kan tih” tiin! Inlo faifuk ve tawl el am ie! “Kan pastor chu an sukup taluo a, biekin sunga a um sung po chu an sanpuom ani deu tak” tiin! Chuleiin, a hmingah “Pastor Umchuoa, kan tih” tiin! Biekin hi insuk titakna, insuk thlarau mi nina, mizie thupna hmunah ei hmang a, ei rawlhai ei sukno vel a, ei suk lap vel a, hnâm chu ei um tawl a nih. Hi lei kuhin biekin ei ngaina ni ta veng a tih! Chun, ei biekin tamtakhaiah rank nei ang deua ei lan țhung zing khawm hi mit a kham. Officer rank le sum hau dan indawt ni lovin, People group or age group in țhe lem nisien (Luke 14:7-14). Isun tlanna sin thawdinga a hung khan a rank a hung sawm naw leia dam ei ni hi! ‘Biekin hi mipuiin a huhoa khel ei hril rawnna tak a nih’ an lo ti vet hi a umzie ka man tah! Ei ni nawna le eithawlo hlain ei sak ruol țhup țhup hlak a, mani nina le inhmelo Pathien thu țha kheksuokna inin ei hmang bawk a, țhat tehlem runah ei inchangtir bawk hi ani ka ring! Pathien kohran (mani seng) kuhi ei umna taphawtah suk thienga, sukmawi lem ding an nawm. Mani insunga dam, ei thawkna hmuna dam, le hmun dang dang ah.

Hlimhlawp program: Chun, ‘nominalism’ study tlawmte ka thawna le inzawmin- biekin (chapel) hi mani nuomzawng le inhawi ti zawng le nuom zawng thawnain ei hmang mek niin an lang. thuhril kawngah, hla sakna kawngah, program siemna kawngah, mani kut fe zawng le kut thiem zawngin hma ei lak nasa em em. Program hming mawi tak tak ei siem a, a karah pastor tawite ei in țawngțai tir a, a dang popo chu ei nuom tawkin ei chen hlak! “Kan program hmang chu an hawi taluo, a Isu a Isu kan hriet nawh” ti ang deu khan! Infotainment le entertainment bukah (in) ei siem zo tah. Biekin sung le pulpit inza dingin nasatakin ei inchuktir a, inkhul takngiel khawm ei inkhul ngam nawh a. Pathien-in (ei ni) taksa ruok hi chu ei nuom nuom thawpui a thiengah ei ngai hi an dik naw hulhuol a nih. Sanctity of the pulpit and the church chu ei hriet taluo ringawt ie. Nu haiin an nauhai ‘biekin sungah chang naw rawh’ tiin an vau tawm hlak a biekin an ngainaw pha lem!   Tienlaia temple, Pathien a ngiel a ngana a umna ang deu khan ei la ngai zing hi bansan a hun. ‘Pathien in, Pathien chengna chu nang le kei ei nih’. Hi taksa, Isu Krista thisena inchawksa kuhi a nih sukthieng ding lem chu. Hi thuruk hin ami hnetawk naw leiin ei suol a, ei inrel a, ei inkhing a, ei inruk a, ei dawnin, ei hawp khu veng vung el ani hi. Chu chau chu ni lovin biekin sunga chau hla sak inhawi ti a insim sui sui, inring kunga țawngțai thei, hlim em em, ek neilo ang ela inchei, mani nei shownain ei hmang a, inru thei awmlo hmel putin, a puotienga inthawka en chun angel ang deu el, sungtieng ruok chu thlan ruok le no a puotieng tle sura, a sungtieng inkhawn rut anga hrilkhi pawl ei ni tah. Ei in lockdown sung hin Pathien rawna insiemthat a hun ta awm ngei. ‘Insiemthat’, ei ti pha chu ei ți em em a, mani nina pangngai kha ei chel țawk țawk hlak. Nihai a țha ta naw leiin hi remchangna hi inchawk thiem tum ei tiu. Ram danga ringtu haiin kawtthlera Pathien an kona ka hmuin ka lungril a suknawi a, ralkanga inthawkin kalo inrumpui ve hlak. Ei ni rawi hlak hi aw eh! Biekin kuta bawlfawm mei meiah nita lovin ‘ei taksain Pathien chawimawi tak tak’ ei tiu. Nihai hi a țha ta naw a nih. Hieng neka ni țha naw lem khawm a hung inhersuok pei awm si a.

Khawpui lien le inhawia um am? Khawteah?: Khawvel mihriem tukhawmin fak le dawn thuah hlawkpui nekin mi a nuoi telin an sinhai an chan a, an tlasamin an țam pha tah a nih. Lungngai le beidawngin an um zo tah. Ei khawvel inher dan hi nasatakin a suk danglam sawng ding an tah a, fak le dawn zawng dan khawm nasatakin a suk danglam ding an tah, fak ding tlasam le mi rethei ei pung deu deu a, mi hausahai lem chun an sum inhmang hi billion (a tam taluo) tam an tah. Ei inlaichinna le ei hawiher, ei nunphung, khuo le veng, khawvel nghatdan le inherdan popo a hung danglam mek a, a hun ang peia ei in adjust thiem a țul ding an tah. Sum hau le car țha, private Jet nei a țangkai ta nawh! Inkhul le insim ei ni nekin an ți lem dai! Ei sum neihai le ei hmun le hmang nei erur haiin an mi țhangpui theinaw zie hung chieng deu deu ei ta, hringna hlut zie hung hre deu deu ei ta, khawvelah bel ding a umnaw zie hung hre deu deu ei tih. London khawpui dam, New York dam, Hollywood, Paris dam, Rome khawpui haia um nekin, khawte, village kilkhawrah mi tlawmte umna hmun an thlang lem vawng an tah! Parvachawm khuo le Talaan khuo thlalak ka hei hmu chu- ka lungrilin “Khawvel mihausahai le celebraty ruolin hmu hai sien chu plot chite khawm dollar tamtakin inchaw nuom an tih” ka tih! Ei țhalaihai țhenkaht thabo deu deu, ina umpeilo, khawpuia lekha inchuk ang renga umhai le a țhadeuhai sinthawna nei popohai khawm, mani vengtieng fe chakin an inrum vel el an tah! Mani insung nghawka ințek thar thara ram danga umhai khawm an in le veng ngaia  beidawngin a sun a zanin an inrum zak el a nih! Tulai tak hin tuinam khawpuia um le fe chak ei um ding? Khawte ram kilkhawra um nuom vawng ei ni ta hi! Cinema (movie) inhnikhai khawmin a thar en ding an nei nawh. A suok ta bawk nawh. Football en nuomhai tading khawma a hlui vawng en angai tah. Ei lawmhaiin ei luok an suksuok zo tah. Lockdown hawngkar nghakhlaa innguk innguk lo khan Pathien hnai rawh! Pathien chauin chuong ang chun a mihriem siemhai chungah thil a thawthei a nih. Khawvel ropuina le hausakna popo hi iengmalo el ani zie chite a hung suklang ani hi. Chuleiin, Pathien țhatna in Ama ramah cheng dingin ami fielna a nih. Khawvel an her danglam nasa pei ding leiin inngaisie lovin in ngaituo țhalem ei tiu. Thingtlangah umin mani huona thlai suok ngeihai-hripui hrik umlo, organic hring sieuin hang hme phak inla nuom a um a nih. Mipui tlawmna tieng tieng baw hi himna ani lem si a. “Mihriemin an tam an dam puia, ngain an tam an thipui” ti kha an dik zo tanaw ding a hawi. Ei dit le ei ngainahai a zaiin Pathienin ami hmal țil pek pei a, ei hnungkira Ama zawng nachang ei hriet theina dingin hieng popo hi amin hmutir a nih. Khawpuia inthawka intieng inlawi kha damna hlun an nawh a. Mani umna hmun senga Pathien kuom tieng kirnawk hi damna hlun a ni lem.

Hospital țha am Pathien? Vawituk April 7, zingkara, hi thu ka zieklai zing hin UK Prime Minister Boris Johnson chu London St. Thomas Hospitalah a serious leiin ICUah oxygen pek ani thu le lo țawngțaipui ve dingin fielna velhni lai ka hmu hman! Hieng neka ei beidawng hun a tlung pha chun khawvelah iengkhawm beisei ding le dit ding nei ta nawng ei ta, Pathien ei hung zawng tak tak ding an tah. Mani tu le tehai khawpuia an um ei lawm vei leh, ei nitin mitthli luongnain an chang zo ta bawk! Krista lungpui ngheta ngirhai ruok chu pasie in, rethei inla khawm dettakin, sukchang ruol lovin ngir ei tih. India ram hlawl lem hi chu ‘hripui’ takngiel khawm sakhuona le an keimat hram hram a, nasatakin ei unau sakhuo lien lemhai karah buoina a suok mek bawk. Mi tamtakin nasa takin sakhuo thilah lalut lo ding le sakhuo zie inkaitir lo dingin an ngen a nih. ‘Nihai a tha naw leiin remchangnahai inchaw pei ei tiu’ khai. Bible in thu indik ami hril hi ngaiven a hun tah. Khawvel țhuoituhai khawm an ram tading sengin hmasiel takin hma an lak tah. An pathien seng an kova, ei ni khawm ei PM in ‘Diyas’ lamp leh lo thaw dingin ami ngen seng ani kha! Ei Pathien biekdan le chu an ang naw hulhuol a nih. Bawng ek le bawng zun hrilmawihai khawm an ri a re deu tah a, lawm a um thawkhat vieu! Ei hmathlir dan a hung danglam seng ding a nih. Ei ringna le inhmelo thil la hung suok pei ata, ei ringna sukchau ding le inphatna ding lampui awlsam em em le țha em em el, martar chang ngai der lova inhawi taka ringna inphatna lampuihai a hung suok pei ding ani leiin ei fimkhur a ngai zuol. Kei țhangsain rongbawltuhai popo khawm ei beram enkawlnaah Lalpan lampui feltak ami hril ka nuom. Bible in “For the shepherds are stupid, and do not inquire of the Lord; therefore, they have not prospered, and all their flock is scattered” (Jer 10:21) ah alo tih. Mitin kuomah hi ngenna- “Nihai a țha naw leiin remchangnahai inchaw pei ei tiu khai” tiin Pathien hmingin ka hung fiel cheu a nih. 

Facebook Comments

Leave a Reply