Mani Pastor hai hrilsie hlak mi i ni am?

Sawrkar sinthawtu pakhatin kum 96 zeta upa tah Evangelist inlar tak el Dr. Billy Graham kuom ah “Iengdinga mi thenkhat hin an pastor hai hrilsiet le sawisel hi inhawi an tie m em hlak am a ni a, tia an dawnna a chun, Kristienhai ta dinga mani pastor hai hrilsiet hi “thil thalo tak a ni bak ah Pathien mithmu a khawm suol a tling a nih,” tiin a hril.

 

Chu sawrkar thawktupa in a hrilzawmna a chun a sinthawpuihai chun an pastor hai tlinnawna le fel hlelna hai hohlimna thupui taka hmanga an hrilkhawm bawr bawr hlak zie thu hrilin mak a ti hlak zie thu a hril a.

 

Billy Graham ina hril peina a chun, “Pastor hi a famkim tukhawm umnaw ni haia, kohran pakhat enkawl dinga pastor pakhat Pathienin a hung ruot ta chun chu pastor pa chu kawng iengkimah a kohran mipuihai in an theidan ang sengin an lo thangpuiin an thlawp lem ding a nih. Hieng thu a hrilna a Billy Grahamin a bible chang sirsan pakhat chu I Samuel 26:9 na a Lal David in ama thattuma zawng zingtu Lal Saula chunga kut anlet nuomnaw thu a hrilna a “Pathien hrieknal chunga kutthlaka thiemchang thei tum um an ta?” tia a hrilna hi a nih.

 

Hihin pastor hi an lo indiknaw amanih annawleh an mawphurna an tlinnaw vieu a ni khawma tu sawisel theilo ding tina ani chuong nawh. Kohran tin hin ro inrel dan an nei senga, khawlai dunga van demsiet le van sawisel el niloin rorelna dan dungzuiin an diknawna le a tlinnawna hai an hrilkhawm lem ding a nih. Tirko Paula khawma I Korinth 14:40 na ah “nisienlakhawm iengkim mawitak le fel taka thaw ni raw se.” a ti a ni kha.

 

Vangduoithlak takin kohran mipui mani pastor hai sawisel le hrilsiet inhawi tie m em hi ka hmu rawp hlak a. Pastor pakhat chau khawm nilo, a hung nuhnung a hung hmasa demna ding hi an hriet vawng el a nih. Hieng ang mihai hin iengleia an thaw hlak am a nih ti hi ka ngaituo rawp hlaka, mi hriet hlaw an nuom lei dam a ni ka ring hlak. A san iengpo khawm lo nisien Pathien hrieknal lo sawiseltu ni hi thil thalo a ni bak ah Pathien mithmua khawm suol a tling tak meu a nih. Hieng anga pastor hrilsietna hin kohrana inkhingna a suk suok bak ah an pastor pa inchuktirna le zirtirna laka khan an lungril an khar ta tlat hlak a, a thuhril hrim hrim an fak thei ta ngai nawh.

 

Billy Graham chun hi thu hung indawntu kuoma thurawn a pekna a chun an pastor pa laka an lungril putzie hai la hrilpuia tawngtaina hai khawm neipui a, an pastor pa chu a hrilsiet zawnga thawloa, an theina kawng senga thlawpa thangpuitu nilem dinga infui dingin thurawn a pek nghe nghe a nih.

Facebook Comments

Leave a Reply