LAL HEZEKIAH LE A INSUNG RÊLFEL

By Rev. Dr. Lalrosiem Songate

Tukum 2020 a ECCI kohran pumpui kum thupui dinga hotuhai hung ruot chu Insûng Khawsak Rêlfel ti a ni a, a thupui hang ngaituo met ringawt khawmin thafân a um hle. Ei tulai țhangthar nun nasataka inruithei chîmbuoia um el ta hi hang ngaituo chun lungnat khawm a um hle a, a san ding hril insiek zawnga chu tamtak hril ding um sienkhawm, a san lien tak laia pakhat chu insûng inenkawlna zirnaw lei chu ni dingin ka ring. Tukuma thupui hin chutieng ei ngaituona a mi țhuoi ding nisien a hawi a, lawm a um hle.

Hi thupui hi Juda lal Hezekiah kuoma Pathien thucha a inthawka lak suok a ni a. Lal Hezekiah hi Juda lal laia a sawmpathumna a ni a, ama hi lal țha le fel a nih. A pa lal suol tak Ahaz hun laia inthawk khan Assyria thuhnuoia lo um hlak le a lo rûn rawp hlak nisienkhawm, lal Hezekiah zarin Pathienin an hmelmahai a tukdâwl pek ta a nih. Chuonga muong taka a um lai chun Hezekiah chu a hung damnaw ta a. Zawlnei Isai hmangin Pathien thu a hung tlung a, a natna hi a thipui ding a ni leiin a insung a rêlfel a ngai a nih, tiin (Isai 38). Hi thua inthawka ei thupui hi laksuok a nih. Lal Hezekiah kuoma Pathien thu hung tlunga inthawk thil inchûk ding hang hril ei tih.

A pakhatna ah natna le sietnahai hi misuolhai chunga chau tlung loin mițha le mifelhai chunga khawm a tlung hlak a nih. Lal Hezekiah khawm hi lal fel tak a ni a, bible khawma, a pu David thilthaw ang po thaw vein, LALPA mithmua thil ṭhatak a thaw hlak a, a ti a nih (2 Kings 18:3). Nisienkhawm natna inrik takin a hung tlâkbuok tlat el. Job khawm kha mifel tak el a na, nisienkhawm sietna le natna rapthlâk takin a hung tlâkbuok a nih. Mi an damnaw amanih siet an tuok amani ei hmu a, an suol lei ni dinga zuk ngai nghal hi ei chîng rawp hlak.

A pahnina ah ieng anga inlal le ropui ni inlakhawm natna le thina laka inthawkin ei him chuong nawh. Hezekiah khawm Juda rama lal ropui nisienkhawm natna lakah a him chuong naw a, Pathienin a hril dan lem chun a natna hi a thipui ding natna a ni ti ei hmu a. Natna hi chi hran hran an um a, ei na khawma dam nawk el inbeisei chi a um a, natna țhenkhat ruok chu damsuok in beisei um ta lo chi a um bawk a. Entirna dingin khawsik mei mei chun damsuok nawk el dingin ei inngai a, cancer invawi ruok chun thi dingin ei inngai nghal hlak a nih. Hezekiah natna hi ieng ang chie am ei va hrietnaw a chu a thipui dinga Pathienin a hril chu a nih. Natna le thina hin milien milal a thlier hran ngai naw a, natna țibaium tak damsuok nawk an um laiin damnaw inriklo deua ngai an thipui khawm a um hlak bawk.

A pathumna ah Pathienin a hril chu lal Hezekiah hi a thi ding an ta leiin a insung a rêlfel a ngai a nih. Lal Heziekiah ta ding chun a insung chu Juda lalram po khawm a ni thei a, chun ama sungkuo bik khawm ni thei bawk a ta. A rêlfel ding chu ama hnunga lala hung in]hung ding dam, a thisan a nuhmei le nauhai khawsak dan ding dam ning a ta. Vawisuna ringtu nu le pahai khawm mani insung seng ei rêlfel hi a pawimaw hle. Lal Hezekiah angin Pathiena inhriettirna khawm dawng kher nawng ei ta, ei inringnaw lai tak khawm thi thut thei ei ni leiin thei ang anga rêlfel lâwk khawm a țha awm ngei. Insung rêlfel dingin ieng ieng him ning a ta, ti thu hi thu tharin ziek lem ei ta, mani insung seng rêlfel ruok chu a pawimaw a nih ti hrieng ei tiu.

A palina ah Hezekiah hi Pathienin a hringna a keisei pek a, hi hnung hin kum 15 lai a la dam a, chu hun sunga a nau nei Manasseh chu a pa hnungah a hung inlal a, lal khawhlo tak a hung ni ta a nih. Kum 15 sunga Manasseh hin a insung a rêlfel na a a rêlsuok a ni chun a rêlsuok țha naw hle a nih. Lal Hezekiah khan ro thil ieng iem a lo lakkhawm ei hriet naw a, ieng angin lakhawm rawn sienkhawm, a rohluotu Manasseh kuta inthawk chu an chavai vawng naw khawmin suosuol bawlna ah a hmang ral vawng ring a um. A fel vei leh rohluotu a nei chau ngei.  

Ei rama khawm sungkuo hieng ang hi ei tam hle ti hriet thei a nih. An pahai hausa em em, amiruokchu an thisan le inruol a, an hausaknahai po po inchek vawng ding le inchek mek hril ding ei um nuol ring a um. Ka ruolhai pakhat Sociology a Ph. D. degree zoin an chûkna le inzawma research a thawna a inthawka a hmusuok chu eini tlangmihai laihin hausa tak tak iemanizat ei um a, an bo le inruola an thil neihai boral vawng ding an tam em em ti thu a mi hril. Ama țawngbau ngeia a hril chu We have many successful persons but no successors, a ti a nih.

Hieng hi ieng leia um thei am a na, ei ti chun mani insung rêlfel hi ei thaw naw lei a nih. Ieng angin hausa inlakhawm ei insung ei rêlfel naw chun ei hausaknahai khawm midang ta an la hung ni vawng thei a nih. Chuleiin a pawimaw tak chu mani insung a hun laia rêlfel hi a nih. Mani nuhmei le nauhai enkawl a, inchûktir a, khawvel suolna laka humhim dinga thei tawpa țhang lak hi a pawimaw tak zet a nih.

Facebook Comments

Leave a Reply