Kristien Kebai (The Limping Christian)

Jacob Wrestling With God
Jacob Wrestling With God

Rev. Dr. H.M. Songate

Kha hma deu khan ka sanghai nau pasalte pakhat hi a har khawp el a, a pa in “ama hi chu a inlai inpawlpui an hawi tawk chau a nih,” a ti hlak. Ringtu inti ve si mi tamtak thlarau I chie zawp lo , khau thur el, chapo deu ul, mani tha inti em em, in phalamna nei manglo, chalak kuk le hmasiel tak an um rawp hlak. “Mizai ngaiin thu hril rawh” ti khawm hre chuong lo, tawng phawk phawk le inti vei deu tak el, “in chapona chu in suong lem si a” ti ang deu khan.

Mi damna ding nekin mi natna ding an hril rawn lema, inphalamna ti hi an diksawnari ah a um ve nawh. Mi hlem pawi ti nekin an lawmzawng tak a ni a, khel hril an pawi ti nawh a, an khel hril vek dam an la awi nawk hlak. Kohran sum chen khawm inphalam der lovin huoi takin an fakruk ngam! Mani ta dinga hlawkna a ni phawt chun midanghai natna ding chu iengakhawm an ngai nawh. Hieng ang mihai hnaia umnaw hi pang damna a ni deu tak.

Jakob kha chu ang nungchang put chu a hawi! Unau phingtam beidawng khawm man bova bu pe nuomlo! Mi duam le hmasiel tak chu a nih. Khel hril hmang le mi hlem hmang. A nun ruok kha chu a hadam bek nawh! Ruoltha a siem ngam a um naw hle. Inhnai pui rak lova um dinga tha chi a nih. Ringtu kebai hai hi Pathienin an thatna ding le Ama an ngaizawng theina dinga a thawpek an ni hlak.

Jakob khawm Pathien leh an hei intuok meu khan chu siemtharin a um nghal. Inbuona Pathien a hne nilovin an tulin an tul a ni kha. Sap tawng lekhabu chun “Clinging Unto God” (Pathiena Intul) ti a nih. Buon hrat leia Pathien a hne niloin a nun ningintel thlak danglamna dingin siethlak ruol lovin malsawmna ngenin an tul a, invawt angin peithlak thei lovin a kawp tlat a ni lem. Suol leia dawizep tlanhmang zing el, hausa bawk, ti dawr dawra um, nun harsa, nghatna tieng tieng hmelma le ti ding ngawt. Pathien an tuokpui kha chu vangnei tak a nih!

A hming thlengin a um. Jakob a hming thleng hnung nungchang kha ringtu nungchang ding a nih. Pathien a hmu hnung khan an let tawp a ni khah. Ei ram kohran chu “testimony” ah ei inghat a, ringna le thuzawmah ei in nghat nawh.
Dr. M.R. De Haan, Radio Bible Class hmusuoktu chun hieng hin a tih. “Lalpa kar khat khawm ka khata ka ngir theina dingin mi sie naw. Ka khupa dingthathuona ka biek zing theina ding che in harsatna hling mki sie pek zing rawh.” A lo ti. Suol chu an tawknaw ngei ngei! Eini rawi chun harsatna tuok der lo dingin ei hni tlut tlut a, mi tluong taka harsatna an neinawna dingin ei hni pek tlut tlut bawk hlak. Hlawtling pal ei tih, ti inlau a um bak el!

Zakai kha a piengthar tukhawmin an ringhlel nawh. Isu an tuokpui zo hnunga a thilthaw hmasa tak chu “pasiehai laia a sum zatve sem a nih”. A zinga inthawkin a sum zatve semin a buoi char char a ni kha. Chu zoah a sum hlepruknahai kuoma “a let lia rul” kha a sunzawm nawk char char a nih. Zakai khan Pathien thu mal khat khawm a hril nawh a, Pathien thua a thawsuolhai kha a siem tha char char el a nih. A sim hne hle.

Testimony tlawr hluoma hrillovin a ringna khan a tarlanga, a ringna kha a thiemchangna a nih. Zakai piengtharna ringhlel ding tukhawm an um nawh. Isu meuin a puong a ni khah. Eini rawi chu Pathien thu tlawr hluomin ei hril a, a hril rawn ei inchu a, siemthatna chang si loin! Thalarau milo in suk thlaraumi fawm, tha silo in suk thafawm ei nih. Ei hnam sunga piengthar tamtak hai hinZakai kha puo ve hai sien ka nuom.

Ei suol tawhai bansan umlo, nunhlui le a thar um chuong lovin a ngai ngaiin ei um a. Siemthatna (transformation) chang siloa ringtu inti ei tam. Simlo piengthar ei tam hle awm! Hrat inti deuin midang hmusit ei ching! Lengkhawma lamthei haiin an lam theinawhai an hmusit a! Lam kha hratna an sawn a, an chapo pui hlak. Hi lei hi a nih, inti piengthar hai hi ei ringthei nawna san. Pathien dit vieu bawk si a thu zawm tlat lo. Hieng ang mihai hi “keibailo ringtu” an nih. Jakob a nunhluia intang ringtu, intivei le chapo ei la tam. Hlem ding le mani hlawkna a ding a ni phawt chun nunhlui rama um zing. Pathien hmaisana intuokpui ei ngai a nih. Pathien hmang tlak ringtu ni ding chunk ke vuok bai pek ei ngai. Ngal hrat taluo Kristien hai hi kohran le society ta dinga mi nghawkum an nih. An la taima phien nawk nghal hlak si!

Kum 2007 khan Sikkima kohran thuoituhai chun nit hum sung training eni dingin an mi ko a. Nasa takin hma an laka, ringthar khawm an pung nasa hle. Ka lungril an sukhlimin ka lawm em em. Amiruokchu Hmarhai natna an invawi ve tlata pawi ka ti ngawt el. Chuchu kohran pawl in the a nih. A kum nawk an mi ko nawka, a boruok a danglam em em in ka hmu. An re deu thup niin ka hriet a. Open air preaching le meeting khawm an lo thaw ngam ta nawh. Mak ka tie m leiin kan dawna. Anni chun “Mr. Tagodia, VHP (Hindu kulmuk) General Secretary a hung a, mipui tamtak public meeting a kova, ‘Kristien hai hi mi thabo, zu le sa, drugs le nuhmei-pasala inhnel mi, sum du le sakhuo corrupt tak an nih. Nagaland, Mizoram, Manipur le Meghalaya hai en ro’ a ti a, chuleiin kristien hung lut ding chu Trishul (fei luthum nei) in lo dang pei ro a hung ti a, mipuiin an awi em em a Kristien hai hi kan intawm deu an tah, an ti a. Zakai ang ringtu nilovin hmur ringtuhai (lip Christian) eini leiin ram lak a harsat pha a nih. Keibailo ringtuhai hin Pathien hming le ringtu hming an suksiet nasa em em el.

Job chun harsatna pop o a tuok vawng hnungin hieng ang hin an tih, “Kha hma khan na hrietnain ka hriet che a, turuok hin chu ka mit ngeiin ka hmu t ache”. A hma a Job le Pathienin ahruol hrep hnunga Job kha a va danglam ta de! Job a bula um kha a van hawi awm de! Pathien le an inhnai dank ha a ropui hle a nih.

Hezekia kha a hringna kum 15 a suksei ding a hei hriet meu chun “dam te te in lawn diem diem tang ka tih,” a tih. Eini rawi ni inla chu kum khat bek la suksei sa rawh ti mei ei tih! Lal inhnarum tak a nih. Ringtu lawn diem diemhai hi ngai an um a, inza khawm an um. An bula um a hadam em em bawk. Eini rawi chu Pathien kut ei tuok hnung khawmin ei la khau thur hlak nisien a hawi!

Paul, van thumna a thuoia um pa kha Pathienin “hling” lo pen aw sienla chu tuor a um hmel nawh. “Ka hrat po leh ka hrat hlak” “Tuta inthawk chu ka hratnawna hi suong lem tang ka tih” a tih. A ropui de aw! Kebailo ringtuhai chun chu thuruk chu an hriet phak ngai nawh! Nangteh vuok baiin I um ve tam! Vuokbaia umhai hi hming thlengnaw an um nawh. Lazar khan Pathien thu a hril naw de naka chu , to tawka titak deua bazaar a leng khan thu ropui tak a hril a nih. A san chu thu deu thawa um hnung keitho kha a ta ding chun “ke vuokbai” a lo nih. Pathien varna le remhrietna ngena Pathien ke a intul nachang ei hrietnaw chun ei ram le kohran chu ‘kebai ram le kebai kohran’ ning ei tih.

Pathien rama nina inchu, thabo vieu si pawimaw inchu, thunei inchu, ro hrat nuom, hma siel bawk, khau thur el hai hi “keibailo Kristien” an ni a, an bula um sawl a um em em hlak. Ei ram kohran roreltu lai an tam vieu el thei! Inpumpek le channa ding zawng lovin, hming that, hmai malarna ding le thunei nuomin an inpawng nek lem. Milien le sumhau haiin kohran an khala, Esau upatna inchu thlak an rin nawh. Tuoituhai in en that a tul!

Kha hma deu khan Mizoram Synod hai leh program kan nei a. Aizawl Chanmari venga in pakhatah bufa dingin an mi fiel a. An nupuinu chun hieng hin a tih. “Kan kohran thuoituhai, pastor le lay leader hai hin Pathien rawl an hrietnaw kan inlau leiin kartin mi hriet lova bungheia tawngtai pawl kan um” a ti a. Ropui ka ti khawp el. “Kei khawm mi tawngtai sa pek zie ro” ka ti nghe nghe. Kebai lovin an I thuoi le kohran ke inbai a ta, kebai ruolin an mi thuoi leh kohran hrat takin Pathienin thuoi lem a tih! Keibailo ringtu hai le Pathien Thalarau Thienghlim an inkawp thei nawh.

Unau, nangteh vuokbaiin I um ta?

Facebook Comments

2 thoughts on “Kristien Kebai (The Limping Christian)

  1. A tiem avan hawi lawm lawm de aw, internet ringawt nekin Mipui tiem thei dingin Hmasawnna Thar adam insuo thei nisien chu maw. vuok hrema, natuora ke inbai hai thuhril/ziek chu atiem an hawi ngawt el. Tiemtuhai po po Lalpa,n malsawm raw seh.

Leave a Reply