KRISTA PASALṬHA: MISSIONARY JOHN ALLEN CHAU

By Samuel L Songate

Kâr hni vel liem tah khan American Missionary John Allen Chau (Kum 27) chu Bay of Bengal-a Andaman thlierkarhai laia pakhat North Sentinel Island-ah Isu Krista Chanchinṭha va hril tuma fe chu a ram mi Sentinelese hnamhai chun nunrawng takin a hringna an lo lak pek a. A hmutu haiin an hril dan chun a ruong khawm tuipui kama phaiphin lai chun an phum a, tu chen hin India sawrkar chun a ruong hi a la’n hlawm thei naw zing a nih. Hi thu hin khawvel hmun tin a deng suok nghal a, social media, print media le mass media a hai khawm hril a hlaw nasa hle. Thenkhatin chanchintha leia martyr a ni thu an hril laiin ṭhenkhat nawk thung chun an vet leia thi a ni zie le a thil thaw kha thil invêtthlâk a ni zie an hril nasa hle.

Sentinelese hnamhai hi aboriginal tribes, khawvela hnam khawlbing pawl tak, modern civilization in a la chîm phak lo la um sun tlawmte laia mi an nih. Chuleiin India sawrkar khawmin an population le an nunphung humhalna dingin an chengna North Sentinel Island hi The Andaman and Nicobar Islands Protection of Aboriginal Tribes Act of 1956 hnuoiah ‘exclusion zone’ in a puong a, puotieng mihai chu an chengna thlierkar a inthawka mel 5 biel sung hrim hrim a va fe khawm a khap bur el a nih.

Hieng hnamchawmhai hi British hai huna inthawk khan sawrkar le mimal ang zawng khawmin vawi tam tak va paw an tum hlaka chu an chengna thlierkar va hnai hrim hrim chu lawng le helicopter khawm nisien, thal le feihai hmangin an lo bei el hlak leiin tukhawmin an paw thei ngai naw a nih.  Kum 1880 khan British India sawrkar thawktu pakhat Maurice Vidal Portman chun an nunphung le khawsak dan hrietchiengna dingin mi paruk – naupang 4 le puitling nupa tuok khat chu sipai le ralthuom le inthawkin thawluina hmangin a va man a, Andaman khawpui Port Blair ah a hung ṭhuoi tawl a.

An chengna thlierkar nilo boruok dang le environment dang an ngei naw mani ding an damnaw ta nghal a, puitling nupa tuokhai chu sawtnawte hnungin an thi zui nghal el a. Hi lei hin naupang 4 hai khawm chu sawt hrentang ta lovin an chengna thlierkar a bawk chun  a va thak kir nawk hlawl a nih. Sentinelese hnamhai hi an population iengzat chie am a nih ti hih tukhawmin an hriet thei nawh. Helicopter a inthawk annawleh ral khata lawnga inthawka an inlang dan anga tiem chun tuhin 30-40 inkar vel ni dinga ring an nih a, amiruokchu an chengna rampui sungah tukhawmin an va hmu naw leiin 400 vel khawm an la ni el thei tia ring pawl an um.

John Allen Chau kha Washington state, USA a pieng niin,  Christian University inlar ve tak Oral Roberts University (ORU), Tulsa, Oklahoma a inthawkin a graduate a, kum 18 mi a ni lai khan vawikhat mission trip ah a fe a, chu taka inthawk chun missionary ni dingin a lungril siem fel in, missionary organization pakhat All Nations chu 2017 a inthawk khan a zawm tah a nih. Abikin khawvel hmun hrang hranga hnamchawm, chanchintha la hrelohai chun a lungril an lak bik leiin an chanchinhai suizuiin a ngaiven zing hlaka, chu taka inthawk chun North Sentinel Island a Sentinelese hnamhai kuoma chanchintha hril ding hin a lungril a siem fel tah a nih. Ama tum dan chun an chengna hmunah va fe a, an khawsak dan anga va khawsa ve a, an ṭawnghai inchuka anni ṭawng ngeia Bible inlet pek a tum a nih.

John Allen Chau kha October 16, 2018 in Andaman & Nicobar Island khawpui Port Blair a hung vuong lut a. Local mi ṭhenkhat ruol in a siem bakah ngamantu pakhat chu North Sentinel Island a tlungna dinga ṭhangpuitu dingin Rs. 25000/- hlaw in a ruoi bawk a. A thei ang tawka an puocha hnungin November 14, 2018 zantieng chun a ruolhai le chun a lungrila an vawi em em, Sentinelese hnamhai chengna thlierkar chu panin lawng in an inthawk suok tah a. A mi ṭhuoihai chun Sentinelese hnamhai suol zie le an chengna thlierkar hung hnai taphawt chu an lo that pei hlak ti an hriet leiin a hmun chen thak lovin a thlierkar a inthawka hla rak lo chen chu an va thak a. Chuongchun John Chau chu a khatin lawnglengte a inzâpin November 15, 2018 zingkar chun North Sentinel Island a va chuongkai a, Sentinelese mi ṭhenkhathai chun thal in an lo kap ngei a, a Bible khawm an kâp fuk nghe nghe a nih. Sienkhawm ama chun, “Ka hming chu John a nih, Isu’n a hmangai cheu” tiin a khêk khum tawl a nih.

November 16, 2018 zantieng chun a journal (diary) ah a sunghai ta dinga a lekhathawn nuhnungtak chu a zieka, chu zo chun lawnga inthawka râl khata ama lo nghaktu ngamantuhai kuoma chun a journal chu pe in, North Sentinel Island tieng bawk chun a kir nawk a. A zing November 17, 2018 chun ngamantuhai chu ama ngaiven dinga an hung nawka, sienkhawm rala inthawkin Sentinelese hnamchawm haiin John Chau a ruong chu tuipuikam lai keiphît in phaiphin lai an phum an hei hmu tah a nih. Chu phing chun Port Blair tieng hung kir nghal in, Chau a journal chu a ruolpa kuomah an pek a, a ruolpa chun America-a a ruol dang pakhat chu hril sawngin a nu kuomah Chau a thi thu chu an zuk intlun tah a nih.

Chau in a thi hmaa a journal-a a thuziek a inthawk hin missionary lungril indiktak puta, a hringna ngei khawm a chân thei a nih ti hre zing puma Sentinelese hai kuoma Isu Krista chanchinṭha inhriettir chu a tum a nih ti chieng takin hriet thei a nih. A nu le pa le a unauhai kuoma a thucha nuhnungtak a journal-a an ziek dan a hnuoia ang hin hei tarlang ei tih.

 

Bryan le Mary,  Nunu le Papa

 Hi chungchang a hin nangni chun invet in mi ti el thei, amiruokchu hieng hai kuoma Isu chanchin inhriettir hi a pawimaw ka ti hle sih a. An kutah ka lo thi pal a ni khawma lunginsiet takin anni chunga le Pathien lakah hung lungsen ṭhak naw ro. Chu nek hman chun nangni khawm a kona cheuah ringum takin hung um lem ro. Puonzâr in hung fe thleng  ve pha leh ei la’n hmu nawk ding a nih.

Hi ka thil thaw hi thil ṭangkai lo a ni nawh a – hieng Sentinelese hnamhai hin chatuon hringna an chang ve theina  dinga thaw lem ka nih. Thupuongsuo 7:9-10 in a hril angin Lalṭhungpha huol vela anni ṭawng ngeia Pathien an chawibiek ve hun ding hi hmu kâr ka nghakhla tak zet a nih. In rengin ka hmangai cheu a, Isu Krista neka hmangai lem khawvela hin ieng dang khawm hung nei naw ro ti hi ka ṭawngṭaina a nih.

 

  SOLI DEO GLORIA (Pathien Chauh Ropui Raw Se)

 

John Chau

11/16/2018 (0620)

John Allen Chau a thi thu November 21, 2018-a an hriet char in,  a rawngbawlna All Nations chun an website ah Chau a thi pawi an ti thu le an sûnna thu an tarlang nghal a. Khawvel ngai a chu John Allen Chau in Sentinelese hnamhai a va ‘approach’ dan le Isu Krista chanchintha va hril a tum dan hi ‘dan lo’ le ‘invet thlak’ nisienkhawm Isu Krista sandamna chanchinṭha la hrelo hai kuoma inhriettir dinga a hringna a va’n hlân hi chungtienga inthawka lo thlîrtuhai ta ding chun a va hlu awm char char de aw! India ramah Kristien maktaduoi 20 chuong ei um a, pakhat khawm hieng Sentinelese hnamhai kuoma chanchinṭha hril ngam ei la um naw laiin, hi American tlangval hin a hringna a hung inhlân tawp hi khawvelin invet tihai sienkhawm kei chu ka ngaisang a, a ropui ka ti bek bek leiin a chanchin hi tiem liem mei meia, tobopui mei mei ding chun ka’n thiem thei hlawl naw leiin ka la hung ziek suok hram a nih.  (Pune, November 30, 2018)

Facebook Comments

Leave a Reply