Ka Nuhmei Mâk Ka Hei Tum Zet Chu!

Thinan ami ṭhe hmakhat

Zankhat ka sin inlawi chun kan nu in ka fak ding bu a hung thur mawl mawl a. A kut ka chela, hril nuom ka nei thu hrilin inṭhung dingin ka ti a. Ka thu hril tum ngaithla dingin ama khawm chu anṭhung nghal a. Ka thu hril tum chu inṭhe ka nuom thu ka hrilpui tum a nih.

Ka hang hril ta ngeia, lungsen hmel khawm put chuong loin a san a min dawn ringawt a. A san ka hril ngam el naw lei chun a lung a suk sen deu a. A fakna hmawla mi deng pum chun ka patling naw taluo a mi ti a. Chu zan chun zankhawvar in a ṭap a. Ka hmangai tak naw zie hmaisana hang hril el hlak chu ka ngam naw si. Lungsiet um hi ka ti em em a, ka dit ta naw tlat bawk si.

Kan inṭhe dan ding chu ka ziek ṭan ta a. Kan in hi aman chang a ta, kan car khal lai khawm hi chang bawk a ta, chun ka sumdawngna company hi 30% a chang bawk ding tiin rawtna ka siem ta a. Ka ziek zo chun ka hang in entir a, ama hlak chun a keithler nenga, inring takin a ṭap hawm hawm el ta a. Chuonga a hang intleng vel chun ami suk lungsen deu bawk leiin, ka hril huphur em em le hril ngam si loa rulpui tûr vawna ka vawn, ka dit tak naw thu hang hril khawm chu awlsam ka ti deu nghe nghe ta a.

A zinga zantieng in kan lawi chun ka nuhmei chun dawkanah lekha a lo ziek mawl mawl a. Kei hlak chu ka sawl deu leiin khum tieng ka pana ka in bawr bawr ta nghal a. Zingkhuo a hung var chun kan inṭhe dan ding aman a ziek thu a mi hrila, hieng hin a ziek a nih: Kan ro le thil iengkhawm a ditnaw a, thlakhat a liem hma chu lan ṭhe lo a nuom thu a hril a. Chu thlakhat hun sung chu an nupa nun a hma anga pangngai thlapa hmang zawm dingin a rawt a. Chuonga a rawtna san khawm chu kan naupa thlakhat hnunga exam ding a um a, a lungril sukbuoi a nuomnaw lei niin a hril a.

Kei khawm chun ka remti ve el ta a. Chun kan innei ni a kan zalna pindan tienga ka pawmlut lai thu a mi hrilpui a. Thlakhat sung chu zingtin chuonga ka pawm suok zie ding a ti nawk a. Invêt thlak chu ka ti deua, amiruokchu, ṭha taka kan inṭhe theina ding a ni phawt leh tiin ka remti pui el ta a.

Inṭhe ka nuom thu ka hrila inthawk ka nuhmei le hin kan taksa hi kan intawk ta naw tawp kha a na. Kan thlakhat sung inremna anga kan pindan tienga ka pawmlut ṭan ni chun kan lo intawk naw sawt ta bawk leiin kan pahni in kan inza huou niin ka hriet nghe nghe a nih. A ni hni ni chun ngai ah kan nei deu ta a. Ka pawm lai chun ka awmah a hung inbeia, a perfume rimhai khawm chu ka hriet thei a. Chuchun ka nuhmei hi ka lo uksak ngai naw zie kan hriet suok chau a nih! A vun inchuor hai le a sam hmun ṭhenkhat inṭuok hai chun a lo naupang tak naw zie dam a min hriet suok tir a. Ka nuhmei hi ka lo thlathlam nasa de aw, tiin kan ngaituo hiel el a.

A ni li ni chun kan innêl ṭha nawk ta vieuin ka hriet a. Hi nu hin a hrat lai hun kum sawm chuong zet ka ta dingin a pek a na tiin ka ngaituo a. Nikhat lem chu a thuomhnaw hâk ding chungchanga thlang ding a hriet naw thu a hril a. A taksa a lo ṭiem ta deu leiin a thuomhnaw inbel phawt chu a lien tieng an ni pei bawk si. Chuonga a bula ka ngir lai zing chun natna nasa tak tuor hin ka hriet a. A sam hai chu ka zuk chul pek hieu hieu a. Chulai chun kan naupa a hung lut a, kan inpawm suok hun ani tak thu a mi hung hril a. Kan inpawm vel hi hmu nuomum a ti a, a lo inchan ve zie hlak a nih. A nu chun kan naupa chu a zuk koa, duot em emin a hang kuo vawng vawnga. Chulai chun ka lungril thlâk pal kan lau leiin naw dang tieng ka lo en dai a.

A thlakhat tlingna ni, a tawp ni tak kan tlung chun ka nuhmei ka hang pawm chu ka châng thei ta ṭhak naw a. Nupa kar innel tawnna khawm kan lo tlasam ta naw tawp niin ka hriet a. Chu ni a sin ka fe malamin ka ngaizawngnu Jane a kawla chun ka hei lut malama, ka nuhmei mâk ka tum chu ka ṭhul nawk ding thu ka hril ta a. A tir chun ka thuhril chu ka ṭawng invai mei mei a sawn a, kei hlak chun ka ti tak tak thu ka hril nawn a. Kan nupa kara in hmangaina hi a umnaw niloin, thil chikte te hai ka lo hmu khumkhel hlak leia kan nupa kar sie ani lem thuhai ka hrilfie ta a. Jane chun lungsenin ka ngheiterep inṭeng sawkin a mi hung bena, a ṭap ve hlawp hlawpa, ka fe san nghal a. Zantieng in kan lawi malam chun ka nuhmei ka pek ding parbawr mawi fahran hi kan chawk malam a. A zawrtunu chun ieng thu am ziek I nuom a mi ti a. Kei chun, “Thina in a mi ṭhe hmakhat zingtin khuma inthawkin pawm suok zie tang ka che!” tiin ziek rawh ka ti a.

Chu zan in ka hei tlunga ka nuhmei parbawr peka ka lungril ka thlâk tak thu hril tuma kan pindan ka hei lut chu ka nuhmei khum chunga a thisa in a lo zal zing el ta a! Thla iemanizat cancer natna rinum tak a tuor a, kei hlak chu nuhmei dang le ka sin buoiin ka lo hriet fûk naw hi a na. A thi vak tho ding a ni ti a hrieta, kan nupa kar inṭhe buoia kan naupa lungril suk chawmchawrawk ding a nuomnaw leia hienga a mi keisei pek mei mei hi a lo ni a.

Hi kan chanchin a inthawk hin ei nupa kara pawimaw tak chu thil ropui, car, pawisa, in le lo hai niloin ei nupa kara thil chikte te hai hi an lo ni lem ti hrieng ei tiu. Chuleiin ieng angin buoi la khawm I nuhmei, I pasal ta dinga ruolṭha ni tum tlat la, in inngainat zuolna dinga thil pawimaw chikte te hai thaw theinghil ngai naw rawh. Chuonghai chun nupa kar inhmangaina le inpawna a siem ṭha lem hlak si a.

 

 

Facebook Comments

Leave a Reply