Isu Ka Rama Hung Rawh.(Matt 8:28-34)

“Chun, ngaita, a khuoin Isu tuok dingin an hungsuok a; chun ama an hmu phingleh an rama inthawka suok digin an ngên ta a”.(Matthai 8:34).

Lientlangruol
Juda haiin an lal Messiah nasataka an tung luoiluoi laiin, an ringdan le an lo intûng ang ni derlova Isu Krista hung insieng hin an tading chun ring a harsa hle a, an ringthei naw hrim bawka.Nasatakin thilmak thawin damnaw tin sukdamin um haisien khawm, a tha tieng in ni tir nekin an Lal Messiah chu Khawhri zawl tiin an dem in an theida em em a, a hnungzuituhai chen khawm inkhawmna in a hai an hnawng ti ei hmu a.

Isu thlema a umzovin Galili rama rawng a bawl tan a, tlang chunga hai thu hrilin, mipui hai umdan ding tha tinreng an chuktira. Dan suk famkim dinga hung anina thuhai le ei tawngtai dan ding, vana lawmman neidan thuruk tinreng hrila an chuktir a, mipui khawma a thu inchuktirhai chu mak ti em em in an zui huoihuoi a, chuong a damnaw tamtak sukdama an um zovin ralkhing ram Gadarin ram tieng fe dingin a thuohruoihai le an suok a, lawnga thlipui an tuok khawma a hal dei a thuoihruoihai khawmin an la hrietchieng naw hle, “hi mipa hi mi iengang am a ni a, thli le dilhai chen khawma a thu an awi hi” an ti hiel kha.

Chutieng chu hunsien, Ralkhing ram Gadarin ram an hang kai chun Khawhri i man in a lo intuokpui a, ama chun a lo hrietchieng hle el, “Pathien Naupa, nang le keini iengam eiin zawlna? A hun a tlung hma in ami sawisak dinga hi taka hung am i nih?” tiin a lo khek khum a. (Hi khawhri iman hi Marka ziek a chuh an tam leiin a hming khawm Nuoia ka nih a ti ani kha)

A hrang nasat em lei hin a khuo mi khawma anhnai ngamlo le a hnai a khawm an fe ngamlo, khuop khawm an khuop hne ngai naw a, thlanmuola umin ama le ama an sukpawp nengnung hlak a.

Isun suoksan dinga thu a hang pek chun an khel laia vawkruol umhai sunga lut an ngen a, Isun a phalpek leiin vawkruol tamtak (Sanghni chuong lai) sunga chun lutin, vawkruol chu dila an tla hlum vawng el a, a vengtu hai chu khuotieng fein thil umdan chu an van tlun a, khawhri iman dam thu khawm chuh an hril a.
Chuongchun mi popo a khuoin Isu tuok dingin an hung suokdawk ta a, ienglei amani Isu chuh an hmu phingleh an rama inthawka suok dingin an ngen nawk ta el a.

A mak khawp el, a tuokdinga fe nisi khan, ama an hmu phingleh an ram suoksan dingin an hang ngen nawk el hi, ngaituo tham a tling khawp el. Khawhri iman a khawhri a hnawtdawk pek an hang hmu khan chu lawm hle ding chu an na……………………………………………..A hnawtsuok hma khan chu an ti a, a bulhnai khawm an fe ngamlo le ama ngei khawm a thu nilova a panghai an sukpawp hlak kha ani ei hriet kha, a hung dam hnung chun mi pangngai takin a khawsa el ani kha.

Ka ngaituoin, hilaia khawhri iman an ti em em, a hnaia khawm an fe ngamlo mi pangngaitak anga Isu kuoma um an hang hmu khan an lungril chu hlimin lawm hle ding an na, hieng anga thilthawthei,sukdam theitu chuh an khuo a luta, damnawhai dam insukdam tir awmtak an na. Chu nek hmanin an ram suoksan dingin an ngen el chu hrietthiem chu a harsa ngawt el, an ram hi hang fangsuok sienla, hieng neka natna thalo invawi, hieng neka khawhri iman nasa lem khawm an lo um el thei.

A iengkhawm lo nisien an ram a lut anphal nawna hin san chu a nei ngei chu a nih. Chu chu iem ning a ta ei ti chun, sukdam ding tak tak chun thil tamtak chan a tul ding hi an hrietchieng hle ni thei a tih. pakhat a sukdamna khawma an vawkruol tamtak an chan nghal el a ni a, an ram hang chenchil tak tak sien lem chuh an chunga iengang channa am a tlung ding ti suongtuoin an ram a fang kha anphalnaw el ni thei a tih. Krista chenchilna ram a chun hi khawvel a ropuina tehlem le mani inhawitirna tehlem hai hin hmun anchang thei si naw a.

Chu ang chun vawisuna ei nun a khawm hin hiengang hin ami tlungchil mek chu ani hi tie. Eini a hnawtsuok ve ding tamtak um leiin iengieng angin am harsatna le beidawngna tamtak ei tuok hlak khawm um ve ngei a tih. Mi damna chang ei hmuin ei lawmpui, “Ama chu a piengthar a, a danglam taluo a a tha taluo tah. inhnar a um taluo a, lawmpui a um” tiin ei lawmpui em em a, mani nina ngaituo derlovin mi piengthar le nun thlak danglam ei lawm a.

Mani insiem ve chu tum chuong lova um el chu tamtak ei um hmel ve khawp el. Isu Krista le naw chu nun danglamna taktak hi a um si nawh. Mani nuna Isu ko lut dingchun bansan ding thil tamtak eini a inthienglo hnawtdawk ding tamtak a nei si. Khawvel inhawitirna tehlem,sum le pai duamna, inkhawm thabona, tawngtai intlada na, Bible tiem peinawna le hiengang thil ei hringna siemthatu dinga thil makmaw tinreng daltu hai hi a hnawtdawk a tul ding ani si a.

A biktakin Thalai huna hin hiengang lungrila harsatna tuok hi a um nuom zuol bik hle bawk, asan chu ei vanglai hratlai hun hi thawveng taka eiin hmang thei hun ani bawk leiin Setan khawma a remhrietna po po hmangin, ei nuomzawng Pathien uksak lova mani inhawitirna tehlem hi min thlakhla tir hi a tum ropuitak a ni hrim anih.

“Piengthar ka hung ni chun ka pei naw chang khawma inkhawm hai ka fe tul a ta, ka harsat lai khawma fund ieng ieng amani pek tul ding ana, thei naw sasa a kan ngaitlawm tul a ta.” ti a suonlam khawp taktak tlinglo le awmlo tamtak hmangin “Isu Ka rama hung naw rawh” ti a a min hnawltir el châng khawm hi a um tam ve chieng khawp el. Chuong ani leiin hiengang a lungrila harsatna i lo nei a ni chun hmelmapa Diebol thilthaw ani zie hi hriechieng ei tiuva, do let in thangkhaw ngam ei tiu. Hnena chu Lalpa ta ani si a.

Isun mi hung kan a, ei nia inthiengnawna umhai ei lungril a damnawna le felnawna popo hnawtsuok dinga ami hung pan lai hin, “ Isu ka lungril a hung la; i hmun ding ka lung ril a a um” tiin, huntha ei nei lai hin einia felnawna hai hi Ama in phurhmang tirin ama felna in inthuom ei eiu khai. Gadarin ram kha Isun a sirnawk thu ei hmu ta nawh angin, hun eiin khelpui chun Isu hin ami fe liemsan hlau chun a pawi hle ding anih, kokir thei ni naw ni. Hun lawmum a ka ngai thlak che a, sandamna ni a ka thangpui che a ti lei ringawt hin thlamuong nawng ei tiu. A kotuhai chau a ngaithlak a, a zawngtuhai chau ani a thangpui ding, zawngnawtu kuoma thangpui an tiem nawh anih.

Chuleiin vawisun hin I nuna chan tul a um khawma inro naw la, hi khawvela inhawitirna tehlem hi chu sawtnawte a ding chau a ni, inhawi ding angin inlang sienkhawm, a tawp chuh lungngaina thovin a tawp ding ani, chuleiin in ngaituo fel ei ta, bansan tul bansan ngamin “Isu Ka rama hung rawh” tiin ei ni a hin inleng tir ei tiuva, ei mizie hrim nilova mi suk hmelhemtu Setan a thilthaw khawhlona le thiengnawnahai hnawtsuok dingin ama ko ei tiuva, eini a chenga mi sukfel famkim dingin.

Lalpan malsawm raw seh.

Facebook Comments

Leave a Reply