Isu Hmingin Anina a Tarlang (Isai 9:6)

Isu Hmingin a Nina a Tarlang (Isai 9:6)

                                By: Rev. Dr. Lalrosiem Songate

Zawlnei Isai bung 9:6 na hi Krismas hun haia Bible chang inlar tak laia mi a ni bawk a, Isu hming le a nina a tarlangnahai hang thlirnawn ei tih. Hilai thu hi Isu hung pieng ding hrillawkna pakhata ngai a ni tlangpui a, a sung thu hieng hin hang țhenawi in la.

  1. Isu Pieng Ding thu Hrilna (Isai 9:6a): Isu hung pieng ding thu a hrillawkna in naupang ti le naupa ti thumal pahni a hmang a, hihi Hebrai thilziek dana hril uorna a hmang a ni lai zingin Isu hi mihriem tak tak, naupang a ni a, naupang a khawm pasal naupang ngei ani ti a suk lang. Mihriemhai suolna a inthawka min tlan dinga hung hi vantirko khawm annaw a, Pathien hma a ei ai mi aw pek theitu ding ei mihriem chanpui ngei, suolna nei si lo dingin Pathienin ama Naupa ngei hung tir in mihriem in a hung pieng lem a nih. “Thiempu Laltak ei hratnawnahai mi hrietpui phak lo nei ei ni si naw a. Eini anga kawng tinreng thlêmna tuok tah, sul ruok chu suol lo nei ei nil em.” (Hebrai 4:15).
  1. Isu Thilthaw ding a Hrilna (Isai 9:6b): Hilaia a hril dan chun “rorelna chu a liengkoah chuong a ta” a ti hin Isu hi roreltu ding a ni zie a hrilna a nih. Isu nina laia pawimaw tak pakhat chu Lal a nina hi a nih.Isu a hung pieng khawm khan khawsak mivarhaiin a arasi an hmu a, Judahai Lal a pieng ti an hriet thei nghal a. Judahai Lal a nina chau hi Lal a nina an naw a, Isu hi hnuoi le van siemtu le roreltu a ni leiin iengkim chunga Lal a nih. Lal Isu thuneina hnuoia intuk lut seng ei tiu.
  1. Isu Hminghai Hrilna (Isai 9:6c): Isu hminghai chu Remruottu Mak, Pathien Hrat, Chatuon Pa le Remna Lal an nih. Eini mihriemhaiin ieng ang hming put inlakhawm ei nina a ni chuong nawh a. Saizakap chun sai zakhat a kap tina a ni kher naw a, Lallungawi ti hin iengkima Lalpa suk lungawi khawm a ni chuong naw a, Lawmnakim ti khawmin tu lawmna a suk famkim chuong bawk nawh. Pathien ruok chu a hminghai hi a nina pei an nih. Chuleiin hitaka a hminghai khawm hi a  nina an ni pei lem a nih, ti ei hriet a ngai a nih. A hma tiemin hang en ei tih:
  1. Remruottu Mak: Remruottu ti hi thurawn petu tina khawm a ni thei a. Chun Mak ti tak hi mihriemhai hriet baka hrietna le thiemna hrilna a ni bawk. Chuleiin Remruottu Mak a nina hin eini mihriemhai hrietthiem baka thiem taka rem mi ruot pek a, mi kei hruoitu a nina a tarlang a nih. Ei nun khalna kawnga hin ei hmu thei chin le ei hrietthiem thei chin dungzuiin rem ei ruot hlak a, ei thawsuol rawp hlak bawk a. Ei hmu thei bak le ei hriet baka hretu le hmutu remruotna a hin innghat inla chu thawsuol hi chu tlawm vieu a tih ring a um. Pathien hi ei hrietthiemna khela mak tak le danglam taka mi țhuoi rawp tu a ni ti hriet ding a nih.
  2. Pathien Hrat: Pathien hi ieng anga Remruottu Mak nisienkhawm a hratnaw chun a remruotna hai khawm a suk puitling theinaw ding a ni a. Amiruokchu Pathien hi Pathien hrat chau annaw a, iengkim thawthei khawpa hrat a ni leiin a remruot ang takin thil a thaw thei tina a nih. Chun Pathien hrat ani leiin ama neka hrat tukhawm an umnaw a nih. Thuthlung Hlui hun lai khan hnam tinin pathien an nei seng a, tu pathien am a hrat taka ti chu thil pawimaw tak a nih. Chulai chun Israelhai Pathien, Jehova ei Pathien hi pathien danghai neka hrat lem a ni bawk a nih.
  3. Chatuon Pa: Hihin Isu Pathien hi chatuon mi a nina a suklang a nih, Pathien chatuon mi a nina hi ințan hun neilo, tawp hun neilo tina a nih. Mihriem ngairuotna chun Pathien um hma in iem a um, ti hi ei ngaituo thei a, anachu Pathienin umhma a nei nawh, a ni tawp el a nih. Pathienin um hma a nei naw a, umnaw hun khawm nei bawk naw nih. Biel rinkuol hin ințanna le tawpna a neinaw angin Pathien hin um țan hun a neinaw a, chuong ang bawkin tawp hun neinaw bawk a tih. Hnuoi le van bohmang sienkhawm Pathien thu sunhang chikte khawm bo naw nih, Ama Pathien a bo naw ding tlat leiin.
  4. Remna Lal: Bible a remna/inremna ti hi Hebrai țawng chun shalom a ni a, hihi Hindi țawnga Salaam ei tihai le thuhmun a nih. Ei țawnga remna/inremna ei ti hin mihriem inlaichinna chau a kawk a, a umzie a phursuok hne naw deu a nih. Bible a shalom ei ti, Isu hminga Remna Lal tia ei inlet hi a ni a, a umzie tak chu thil a țhat thei dan ding ang taka um tina a nih. Chuleiin Salaam tia chibai an inbuk khawm hi a umzie tak chu I țhat thei dan ding ang takin țha rawh, tina ang a nih. Isu hi Remna Lal a ni angin mihriemhai chunga ei țhat thei dan ding ang taka mi thawpek theitu a nih tina a nih. Isu zui chun chân nei ding ti zawng hi ei inhrilhmu nasa a, ei inhril rawn bawk a, chân ngam khawm a țul reng bawk a, amiruokchu chuonga zui ngamtuhai chu khawvela chau niloin thi hnung chatuon hun chena khawm ei țhat thei dan ding ang taka mi thawpek tu ding a nih ti hrieng ei tiu.

Chuleiin Krismas ei hmasuon mek laiin Krista hung pieng ei ilawm bek bek hi a hmingin a nina a tarlang ang bawka ama ringtuhai chau niloin a nina sawrtuhai khawm ni tum seng ei tiu.

Facebook Comments

Leave a Reply