INSÛNG INHAWI HI THLÂKHLA A VA UM NGEI!!

Ruoivel Pangamte

Sungkuo po povin ei inhnar tak chu ‘Insùng Inhawi’ a ni ka ring. Insùng inhawi chu iengtin am indin thei ei t’a ? Hi hi zawna po pova zawna pawimaw le intak tak niin a’n lang. A dawnna hi Bible-ah a lo um miel el di’m? Hei en ei tih….

Bible pumpui hi a tha a, tiem vawng ding a ni laiin, Sam le Thuvarhai hi hringnun khalnaa dingin an tha bik zuolin ka hriet a; ka tiem rawn bik hlak. Thuvarhai vel 60 tiem suok hnunga zu la dawn zawm zing dâm, tha la bo êm êm el dâm, nau le te enkawl dan la hre lo dam, nu le pa inza le chawimawi nachang la hre lo dam, lungsen le hrang le chier ching dâm, mî sietna le mî thatnawnahai la hril la hril nuom dâm, mani nunghak thienghlimna le mani tlangval inzaumna la vawng thienghlim zo lo dàm ei um a ni chun, ‘a va vangduoithlak de aw..!’ ti bak chu hril ding um naw nih!

Thuvarhai 4: 13-18 dàm hi a ropui a nih! Varna thuomhnaw chu tangka thuomhnaw neka tha lem a n’a; rangkachak inthieng neka tha lem le lunghluhai neka hlu lem a ni bawk. Ieng thil le khawm hrilkhi ruol an nawh. A kut changtieng chu nîhai seina; A kut vawitieng chu hausakna le inzaumna; A lampuihai chu inhawitirna; a lampuihai po po chu thlamuongna; Ama cheltuhai ta dinga Hringna Thingkùng a nih!! Khawvela ‘zawna’ intak tak ‘dawnna’ chu Bible-a hin a lo um zing annawm. Lekhainchùktu ta ding khawma inchûknaa hlawtlingna thurûk a’n ziek a. Kutsin thawtu ta dinga kutsin inrim ra sìk theina thurûk a um bawk a. Inkhatnû hlawtlingna le Inkhatpâ hlawtlingna thurùk a um bawk a nih. Harsatna le mangangna tuok huna khawm, Psalm le Thuvarhai tiem hlaktu le tiem ngai nawtu chu an indang dai hlak!

Chuleichun, ei insùnghai pàr vul sien ei ti a ni chun, Pathien Thu nèka insùng sukpàrvul thei ding hih, kei chun ka hriet nawh. Pathien Thu leia insùng pàr vul ding ni sien, ‘Pastor le Kohran Upahai insùng a va pàr vul nasa àwm de…!’ i ti a ni thei!! A dawnna sei tak ka hriet nawh. ‘Pathien Thu hi a hrila hril le a hmanga hmang hi an ang nâw èma a nih!’ ti chu ka dawnna ni el sien! Pathien Thu hi a hrila hrilin a thilthawtheina a suok ngai naw a; a zàwma zàwm hin a thilthawtheina a suok chau hlak!

Thanga nu le pa chu khawtlâng le kohrana mi hming tha le ban pawimaw tak, mîha’n an felzie le an inpèkzo zie an hril huoi huoi hlak a nih. Ni khat chu Police Station-a inthawkin Thanga pa chun, “ I naupa kan kutah a um a, lung ina kan thawn hmaa inhmupui i nuom a ni chun inhmaw takin hung rawh” tia kona a dawng ta tlat el !! “Bawipu, iengtizie am a ni ta a? Kan hmu dàn che chu a va mak danglam ngei deh…! I nu le pa hin hienga hmu che hi chu kan inring ngai naw a, nuom khawm kan nuom ngai nawh a’n sawn naw mie….! Hieng ang ngirhmun hi i pumpel kan nuom leiin, tûk le zànin sungkaw maichàm kan buotsaipui hlak che a, i ta dinga tawngtai khawm kan bàng ngai nawh…! Annawleh, thu tha kan inchùktirhai che le thil tha kan hrilhai zozai che kha i lungrilah a lùtin a lo lût ngai naw hrim hrim el ni’ng a ti maw?! A va makin hrietthiem intak ka va ti ngei…!!” tiin Thanga pa chu a tap ta thlawk thlawk el a.

Thanga chun harsa ti takin a nu le pa kuomah, “Nu, Pa, mi ngaidam ro! Hienga ka um hi inzakum ka ti ve hle a nih. Chun, kei chau ni lova nangni chen ka suk muolpho cheu hi pawi ka ti taluo! Ka pa’n a ti ang khan tûk le zàna sungkaw maichàm in mi neipui le thu tha, thil tha in mi’n chùktirhai kha ka lungrilah a châm zing a; Bible chàng in mi’n chùktirhai khawm kha pakhat khawm ka la theinghil nawh! Amiruokchu, nâ ka ti êm êm le pawi ka ti tàwp thei lo chu: in mi’n chùktirna nêka in nungchang ka lo làk lem mawlh hi a nih!! Nu, Pa, mi hre thiem hràm ro..! Pathien Thu hi hril ding, hmang ruok chu hmang tak tak lo ding ti hi, nangnia inthawka ka lo inchùk dawk a ni a. Chu chu lungrilah ka pai zing a, puotieng mawi taka khawsain, sûngril tieng ruok chu nangni thaw angin suol ka lo thaw ve zar zar hlak a nih. Vàngduoithlâk takin vawisun hin man dawkin ka um ta a mei a nih..! Hieng ang inzakna ei sùngkuo’n a tuok hi insiemthatna’n hung hmang unla ka nuom..! Keiin hieng ang thil muolphothlâk tak ka tuok leia ka nu le pa in hung insiemtha a ni chun, lawm hle’ng ka tih. Kohran le khawtlâng hi hlèm thei hlak unla khawm, Pathien hi chu hlèm thei ngai chuong naw ti niu..!! In insiemthat theina dingin ka hung intàng ding a nih. Mi hung làk suok túm dèr naw ro…” tiin a kûn a, a tap ta thlawk thlawk el a!

Hi chanchin hi ka phuok fàwm el a ni naw a. Hming ruok chu ka sukdanglam a nih. Missionary, Pastor, Evangelist, Kohran Upa le Tuolsung Kohran thuoituhai hi, mipuiin CHANCHINTHA BU NGANAA an ingai, entawn taka an ihmang hlak an ni a. An ni ding hrim khawm a nih. Bible nei naw hai khawma Bible aia an hmang ding hai an nih. Nu pakhatin, “Ka pasal hi ka Bible a nih” a ti hi, ropui ka ti hlak. Chu chu ka nuhmeiin a mi hriet dàn le a mi hmu dàn ni ve sien ka nuom hlak.

Thudik hril leiin mî theida ka tuok zeu zeu hlak a. To tawk tawk ka nuom hlak. Amiruokchu, Jeremi’n, “Ka chipuihai naunu suknata a umnaa chun suknatin ka um ve a” a ti angin, ka chipui le ka hnampuihai natnaa hin suknatin ka lo um ve hlak si! Vawikhat chu ka kepui hi ka sukpawp a. Hnai a lo làk a. Zàn khat lem chu ka inpui thei nâw deuthaw a. Zingkar inhma taka thovin doctor ka pan a. Àt lo khawma a nat em em vei leh, a chemte ngei ver vawr a hung kei dawk a. Ka kepui hnai làkna tak chu a zuk àt ta pawp el a. Lungsen thei hlak ni lo! Ka kepui a zuk àt lai lem chun, ka theidain ka hmupei naw em em a. A nakie deuva a hnai a hung suok hnung ruok chun, ka kepui nà chu a hung dam ta huoi el. ‘A lo àt naw pal pal’ ti dingin a hung um lem ta a. Doctor chun a mi hmupeinaw lei le a mi theida leia ka kepui natna kha a àt a ni naw a. Ka kepui nat kha, a hnai a um leia nâ a nih ti a hriet a. A hnai a át dawk chun, ka natna tuor kha a dam ding a nih ti a hriet lei a, ka kepui kha, indawilo ni âwm taka a át el lem a lo nih.

Chuong ang deu chun, kei, mi naràn el, Missionary, Pastor, Evangelist, Kohran Upa le Local Committee Member khawm ni phâk lo hin, Pathien ka ti leia ka thaw ngam ngai lo, a chunga ka lam haiin an thaw pawisak ngai naw hi, ka hmu ràwnin ka va hriet ráwn ngei! ‘Hi lei hi’m a ni ding aw… hieng lawma ei ram le ei hnam a tlàkbal el ta hih?!’ ka ti hlak. Chu chu ka ti leiin, Missionary, Pastor, Evangelist, Kohran Upa le Local Committee Member hai po po, ‘chuongchun an um’ ka tina a ni dèr nawh. Pathien tímì Missionary, Pastor, Evangelist, Kohran Upa le Local Committee Member tam tak an um ka ring. Chuonghai zàr a, ei hnam hi la boral naw mei mei khawm a ni el thei a nih.

Amiruokchu, Sodom le Gomorra chunga thil tlung ang khan, Isai 60: 12-a ei hmu, “I rawng bawl nuom naw ram le hnam chu, a bohmang âwm si a! A nih, chuong hnamhai chu suksiet dèrin um an tih” ti hi, ‘ei hnam chun tuok ve naw’ng a tih’ ei ti thei bìk ding am a nih? Pathien tîmì ei tlawm talaw chun, mi tlâwmtehai zàr hin, ei hnam hi a him zo bìk zing da’l thei a nih ti hi ei ngaituo hlak ka nuom.

Thuvarhai ei tiem chun ‘khèk rak nèkin nungchangin thu a hril inring lem’ ti ei hmu a. Ei insùnghai a pàr vul thei nawna san hi ei nungchang nêka ei thuhrilhai an khèk inring lem rawp hlak lei dàm hi a ni el di’m..?! ti dàm ka ngaituo hlak. Ei muolphopui ding a ni khawmin, ei retheipui ding a ni khawmin, ei chàn phà ding a ni khawmin le, ei inhnuoi phà ding a ni khawmin, Pathien Thu hi, a thu el ni lovin, a tak takin ngirpui ngam seng hlak inla chu, ei insùnghai chau ni lovin ei kohran le ei khawtlànghai khawm hung pàr vul ngei a tih ti hi ka beisei tlat a nih.

Facebook Comments

2 thoughts on “INSÛNG INHAWI HI THLÂKHLA A VA UM NGEI!!

Leave a Reply