Facebook, Mihriem Inrukna Hmangruo

Victim of Human Trafficking

Nikhat lai el khan Nagaland nunghakte pakhat kum 17 mi chau Dimapur ah vuongna a chuong tum mek chu sansuok a nih. Chuchu Mumbai slum ṭawphnawk laia cheng, nga mana fak zawng fawm pakhat Facebook ah model inlar anga inhrilin a hlem a lo ni zing. Chun Defence Colony a dawrkai pakhat ve mei mei khawm, tlangval kum 25 vel sumdawng hausa tawntaw anga inhrilin India hmarsak nunghak pakhat a hlem bawk. Hieng ang thuhai hi India hmarsak state haia Police haiin Delhi Police kuoma report an hung pek ṭhenkhat an nih. Chu umzie chu India hmarsak nunghak tleirawl ngaituona hau manglo tam tak hi Facebook a inthawka an inhrietpui le an in ngaizawngpui hai Delhi laia hmu dingin an nu le pa hai hrietloin an tlanhmang rawp hlak alo nih.

Tuta thla thum liem ta sung ringawt khawm khan police haiin tleirawl kum 18 hnuoitieng vawng sawmpakhat lai zet mi hlema um an sansuok ta a nih. Hieng anga human trafficker hai hin Facebook fake account hai siemin model ang dama inhril in India hmarsak tleirawlhai an infriend pui a. Facebook ah iemanichen an infriend puia an intlangnel tawk pha leh Whatsapp tieng an in biekpaw pui nawk a. Hienga tleirawl lungmawl hlemtu hai hin Delhi chen an hung vuongna ding ticket khawm an lak pek el hlak a nih.

Nikhat lai ela Dimapura Delhi pana vuong suok tum mek tleirawlte sansuoka umnu khawm kha Police han an hang sui peia, a vuongna ticket la pektu khawm human trafficking tienga hmalatu taka hriet mi pakhat in a lak pek a nih. Thla hmasak lai el khawm khan Jorhat, Assam mi tleirawlte kum 16 mi chau Delhi a inthawka Chandigarh a pan lai lam laka sansuok a ni bawk. Hi tleirawlnu in a hril dan chun tlangval kum 25 mi, Call Center a Executive sinthaw lai mek, Facebook a inthawka a hrieta an ngaizawngpui ana, ama pa le inhmu dinga fe a ni. Chupa chu an hang sui pei chun pasal kum 45 mi, Chandigarh laia dawrte nghak ve mei mei a lo ni zing.

Second 30 zatin mihriem pakhat inrukhmang a nih

NGO pakhat Shakti Vahini enkawltu Rishikant, hieng anga hlema umhai tam tak lo sansuok hlak tah in a hril dan chun, “Human trafficker hai hin tulaia social media hieng Facebook le Whatsapp hai hi an hmang ṭangkai em em a nih. Kar hni liem ta sung ringawt khawm khan Jharkhand le West Bengal state haia hieng ang thil tuok tamtak an um a nih. Zani lai ela Dimapura sansuoka umnu chanchin khawm hi harsuokna khawp a nih. Hieng anga nuhmeite hlem hlaktu hai hin awlsam an ti taluo ringawt el. An ina inthawka suok khawm ngailoin an in sungah computer hmangin tleirawlte ngaituona hau raklo hai an hlem kuol zung zung el a lo nih.”

December thla khawm khan Delhi Police le Arunachal Pradesh Police ṭhang kawpin operation an thawna ah Facebook hmanga Arunachal Pradesh tleirawlte hlema inrutu Mumbai Dharavi slum laia nga mana khawsa ve mei mei chu man suokin a um a nih. Hi mi pa hin Korea nunghak thlalak pakhat hmangin Korea nunghak anga insalin Facebook account a siem a. Arunachal Pradesh tleirawlnu hi an friend pui ta a. Mumbai a hung dingin a ko thlak a, a vuongna ticket dinghai khawm a tum pek vawng a nih. A hung tlung hnungin a in ah ni 11 lai zet a khum hnunga sansuok ani chau a nih.

Delhi Police a Joint Commissioner ni lai le Nodal Officer for Northeastern Residents ni bawk Robin Hibu in a hril dan chun, “Facebook hmanga nuhmei tleirawlte inhlemna hi tulai a hung hluor em em. Hieng anga hlema um nuhmei sawm pakhat lai zet kan sansuok ta a. Chu neka tam dai ei hriet suoklo an um ding a nih. Chuleiin mi tukhawm social media a hai hin fimkhur ei tiu a, mi I hriet ngailo hai chu in friend pui ngai naw rawh,” tiin a hril a nih.

Hieng anga human trafficker haiin an hlem tahai hi chu an nuom tawka an chen zo pha nawchizawrna hmuna an zawr ta hlak a nih. Nikum lai ela Munirka laia nunghak a lu tan bawng hnung hmua um khawm kha mi pakhat Escort agency enkawltu pakhat Facebook ah an friend puia, sin zawngpui dinga hlemin Delhi ah a ko thlaka, chu hnunga kha ang thil kha a tuok a nih. Tulai hin Delhi Police hai chun tu ti hriet chienglo Facebook haia in friend pui mei mei lo ding a ni zie skul naupang, a bikin nuhmei hai lai inhril hrietna nasa takin an thaw mek a nih. Inchukna hmun za sari chuong zet ah fe in nuhmei tleirawl hai lai Facebook a mi infriend pui mei mei lo ding a ni zie an va hril tawl a nih.

Hieng thu hi mani in sungahai, Naupang Sunday School a hai le inchukna in a hai khawm hril rawn a ngai hle a nih.

Facebook Comments

Leave a Reply