Sermons

1 3 4 5 6 7 28

Tirko Paul- Thlarau Chang Indik

By: Rev. Lalrosiem Songate

Apostle Paul

Apostle Paul

Tirko Paula in Pathien kona a chang hnunga Antiokei kohrana hotuhai laka an tuklut dan hi ngaituo chun thlarau nun hi a lo hmu fuk vang vang khawp el. Eini rawi chu revival ei hang chang dek deka, ei kohran pastor le upahai hmusit ei ṭan nghal- Nuizat um tak chu ei ni tawl!

German Bible Scholar pakhat Fridrichsen an ti pa chun Apostle indiktak chu pahni chau an uma, chuonghai chu Peter le Paul an nih, tiin a hril. Aman a hril dan chun Peter hi Judahai laia ding bik a na, Paul hi Jentel hai laia ding bik a na, tirko danghai kha chu a thlawptu mei mei an nih, tiin a hril a nih. Chu ngaidan ei thlawp le thlawpnaw chu thudang nisien, Pathien rorelna dana Paul a ropui zie ei hriet theina dingin Apostle ti umzie hang hrilfie hmasang ei tih.

Hi thumal “Apostle” umzie tak chu “Tir a um” (One who is sent) nisienkhawm Pathien in relbawlna dan (God’s Economy) a chun technical meaning a nei a, chu umzie chu Isu Krista in a rawngbawlna sunzawm ding le a kohran keikhawm tu dinga thuneina a pekhai tina a nih. Apostle ni dinga khualifikason chu Isu hmaisana hmu ngei anni ding a na, chun Isu in a ruot ngei an ni bawk ding a nih. Ei pawm dan tlangpui chun Isu a damlaia a ṭhuoihruoi sawmpahnihai le Tirko Paul an nih. Hieng hun laihin tulai anga nghaisan ding bible ziek a la umnaw leiin Apostle hai thuhril phawt chu sel ruolloa pawm a ni hlaka, chu dinga Pathienin a ruot anni bawk leiin an dik hlak hrim bawk a nih. Anni kha Krista Kohran lungphumhai chu an nih.

Chuong ang ngirhmun insanga Paul, Saul ni hlak, ringtuhai man ding le that dinga zawng hlaktu, a piengthar khawma zani lai ela piengthar hlim Pathienin a Tirko (Apostle) ni dinga a hang ko ngat chu a ropui bawk a nih. Tulai ṭawnga dingin Isu meuin a hmaisana inlarin Tirko (Apostle) ni dinga Direct Appointment a pek ngat a nih. Damascus lama Isu an tuokpui chau kha niloin chu hnunga Arabia thlalera hai Pathien inpawlpuiin inlarna nasatak khawm a dawng zie ei hmu (Gal 1:11-24). Korinth lekhawthawn pahnina bung sawmpahni ei tiem lem chun inlarna a hmu ropui zie a hril a, a ropui em leia an ngaihlutnawna dinga Pathien khawma a taksa a hling a pek pha hiel a nih.

Hieng ang khawpa tu kohran le Assembly rorel hrietpui khawm nilo, Van Pathienin direct Apostle appointment a hang pek el le inlarna ropui tak tak a hmuhai lei khan in ngai ropui vieu ta awm tak. Antiokei kohrana a hung lut a, chu local kohrana ṭhuoitu mawl tak tak le zawlneihai thuneina hnuoia a hung in tuklut a. Anni laia khawsa in anni hai rorelna hnuoia le an kut innghatna hnuoia intukluta Pathienin a ruotna Apostle rawngbawlna a hang ṭan el dan hi ei hang ngaituo chun ropui tak a nih.

Mihriem thil taka ngaituo chun Pathienin khang lawma a inlarna le hrietna le thlaraua an thuom ta hnung chun Antiokei kohran tlawmte hai kha ienga khawm ngai ta naw awm tak. Chuong ta nekin kohran thuneina ah an tuklut a, a lu chunga an kut an innghata, Thlarau Thienghlimin a ruotna anga rawngbawl dingin kohranhai I tir suokin a um ta a nih.

Eini rawi chu mi revival hlek tla ei dawng met leh ei inper a, ‘ka thlarau mi tak ta rawm’ei inti a, kohran in relbawl dan hai ei sawisel a, kohran upa le pastorhai ei hmusit a, Tirko Paula le chu ei kar a hla vang vang hle! Ei hlim met leh kohran inrelbawlna dai ei nêr a, a dung a khangin ei tlan inlawn a, “Revival Speaker” ah ei inngai nghal! El thlarau changhai hi an fuknaw hlak chu ning a tih.

A tawpna ding aka hril uor nuom chu Pathienin a sin hmabak thaw dinga khawvela mawphurna a pek chu a kohran hi a nih. Kohran ka ti hin kohran pawl hai ka tina an bawk nawh.  Ei ramin ei mamaw pakhat chu Pathien kohran le kohran pawl ṭhe hran thiem hi a nih. Ringtuhai ei piengthar le inruola vanram ei fe el nawnasan chu hnuoia thaw ding ei nei lei a na, chuchu Pathien sin hmabak sunzawm hi a nih.

Kohran hi hnuoia um a ni leiin hnuoi dana inrelbawl a ṭul ve a, chu inrelbawlna Dan hnuoia chun ringtuhai an intuklut ding a na, ieng anga Revival chang insang khawm nisien a mi huom vawng a nih, ti hriet a ṭha.

VAWK AM ISU? (Pig or Jesus)

By Rev. Dr. H.M. Songate

Rev. Dr. H.M. Songate

Rev. Dr. H.M. Songate

“Chun, chuonghai chun Isu chu an rama inthawka suok dingin an ngen tah a”. Mark 5:17

Bible chàng vangduoithlâk taka (saddest) ngai chu a chunga thu khi  a nih. Iengkim neitu Isu, mipuiin an zui huoi huoi lai zing, lo hnawl dawk el kha chu thilmak tak a nih. Isu ditnawtu mihriem le khuo chu vangduoi tak an nih. Dr. Savidge le Rev. Lorrain hai kha Mizoram an lut hmain, Arunachal Pradesh-ah an lut a. Adi hnamhai lai rawngbawl an tum a. Amiruokchu, Adi hnamhaiin an lo hnawl tlat leiin sawt um thei lovin Silchar tieng an pan nawk a nih. Silchar-a Mizoram mi sumdawnghai an hmu a, damte tein an tawng an inchuk a. Chu zovah Mizoram an va lut a nih. Pathien thu leia Mizoramin malsawmna, thiemna, varna, hausakna le thildang dang an dawng rawnzie hril ngai lova hretu hai ei nih. Adi hnamhai lai hin Mizoram Baptist hai ngeiin kohran an va phun nawk ve tlat. Tangkhul hai chenin missionary an tir. Nasa takin thlarau ramah mî hnung hnawt an nih. Ringtu tlawmte chau an um. Gadara khuoah harsa sa sain thlipui le ruopui karah an va fe a. Malsawmna le damna intlun beiseiin an hung kai a. A khuo phekin an ti sim tak ‘Nuoia’ (Legion) khawm a sukdam pek a. Nu le nau thlaphang taka um hlak, inngup mata an um ding phingin, lawm a nekin an ning innuor el a. Mi kawi le khaw danglam tak chu ni ngei an tih. Isu kutah khan damna, thilmak thawtheina, muongna, inremna, malsawmna tinreng le thilpek chi hrang hrang tamtak a um a. Natna chi dang dang a sukdam zing a. Hi khuoah hin thil dang tam tak khawm thaw nuom a la nei ring a um a. Sukdam ding le hringna pek ding tam tak an la um zing lai, Isu kuomah an hung a, ‘suok dingin’ an hung ngen chawt el a na. Mak chu a mak tho ie! Isu kha, thiemtak le ‘polite’ takin an hnaw dawk a nih! Inrum tak ni lovin, var tak le inngaihnuoi ni awm takin, a ngenin an hung ngen a nih. An nuom chun “Isu kan hnawl nawh. Fe dingin kan ngen chau a nih”! an ti thei. Ieng leia Isua kha an hnawl am a na?

Vawk ruol (pigs) lei a ni kha! Damna nekin Vawk an dit lem a! Khawhri hnawt dawk nekin Vawk nei an nuom lem a! Malsawmna tam tak nekin Vawk an dit lem! An venga damnaw umhai nekin Vawk ruol an ngaina lem a. An venga retheihai nekin Vawk ruol an ngaina lem bawk. An venga misuol umhai nekin Vawk ruol an ngaina lem a. Chanchintha nekin Vawk ruol an ngaina lem. Thlarau bohmanghai nekin Vawk ruol an hmangai lem a. Inremna le inhmangaina tluotling nekin Vawk ruol an dit lem. An khuo damna le thatna ding nekin Vawk ruol an thlang lem a. Vawksa kha an du hle mani ding maw! Juda mi chu an ni naw ni ngei a tih! Iengkim nekin Vawk kha an ditlem a ngai thei a nih. A khuo mihai kha “Vawka hai khuo” ti dinga tha an nih! An nauhai hmingah ‘Lalvawklawm’ dam, ‘Vawkduthang’ dam inbuk hai sien tha ding! Vawk ruol kha an sum hnar a ni lei tak ni ngei a tih. Thil dang po po nekin ‘Sum hnar’ kha an ngaipawimaw lem tina a nih. Chuleiin, an hming dingin, ‘Sumduthang’ ti khawm inbukpek thei an ni ring a um!

Thil ngainat suol hi a pawi em em a nih. Ngainat lo ding ngainat hi sietna dam, thina dam chen an tlun thei a nih. Isu chanchin kha an lo hrietsa a ni ring a um a. Amiruokchu, an Vawk (sum) ngainatna kha a’n sang em em a nih. Pathien thuin “Tangka sum ngainatna hi suol tinreng bul a nih” a lo ti tawp el kha a na. An va thaw fuk naw de aw. Isu hi, hnawla a umna khuoah a châm ngai nawh. A fe hmangsan vang vang hlak a nih. Isu hnawlpal hi inlau a va zuk um de…! Vawk le sum du taluo leia Isu hnawl hiel el chu a mak ngei! India bollywood nunghak Ziah Khan a’n awkhlum le inzawmin Shah Rukh Khan-in hieng ang hin a hril a. “Khawvelah hringna a hlu tak a, chuleiin, thalai le tleirawl tukhawmin in hringna la hmang naw ro” tiin. Hi khuohai hin hringna nekin Vawk le sum an thlang lem a. Isu nekin bo nawk el ding vawk (sum) an dit lem a nih. An thaw suol nasa em leiin kha khuo hai khan a hnungah  insirna an la nei el naw di’m a ni aw…!

Anleh, eini rawi hin teh ieng am ei ngaina tak a? Iengin am ei nitin nun a mi thuoi a? Ei mimal hringna le ei insung hringnahai hi iengin am a mi thuoi aw..? Kohran le khawtlang hringna iengin am a thuoi a? Iem ei ngaina tak a? Ngaituo chet chet chun, ei insung, khuo le tui haiah, Isu hi fe hmang dingin ei nawr ve tlut tlut nisien a hawi bak a? Isu hmel angna a vang deu ta naw maw? Mimal, insung le kohran nunah Isu ei ngaina chie de’m? ‘Polite’ deuvin Isu ei hnawl dawk an naw maw? Isu chengna hmun a va hawi naw de! Isu hnawla a umna taksa, Isu hnawla a umna insung, Isu hnawtdawka a umna khawtlang, Isu hnawtdawka a umna kohran, Isu hnawdawka a umna hnam ei hawi zo ta naw maw? Isu nekin Vawkin (sumin) ei mimal, ei insung, ei kohran pawl le ei khawtlangah hmun a chang lien lem an ta naw maw? Vawk ngaituo pumin biek in i pan mei mei a ni ta naw maw? Vawk ngaituo malama zing tawngtai fe mei mei i ni el naw maw? Isu chu, an hnawlna khuoah a cheng ngai nawh. Isu hnawla a umna lungrilah Isu a cheng ngai nawh. Isu hnawla a umna insungah a cheng ngai nawh a. ‘Vawk’ ringawt ngaituona khawtlang le kohranah Isu a cheng ngai nawh. Isu hnawla a umna Hnamah Isu a cheng ngai nawh.

Kei khawm kum tam tieng ka lo ni ta leiin, penson nei bawk lo. Vawk ka lo ngaituo vung vung chang a um hlak ti ka man suok! Ni khat chu chawkidar pakhatin “Pu, I penson hnai ta chun, ‘penson hlaw’ in nei am”? a mi tih a. “Kan nei nawh. Bei a sukdawng chang a um hlak” ka zuk ti thla ringawt a. Ama chun mak ti taluoin, “Pu, Penson nei naw leiin nang chen i bei a dawng maw? Pathien i ring an naw”? a ti ta el a. Kan zak em em! Ka tuok suol hlein ka hriet. Vawk ka lo ngaituo lai tak a mi’n dawn fuk a ni ka ring! Vawk, sum, penson ngaituona nekin Isu hi ngaituoa thlang lem ding a nih. Unau, nang khawm inthup mawi naw ta! ‘Vawk’ a ni kha maw, a sun a zana i buoipui hlak chu! Isu ‘ka hnawl’ ti nuom si lovin ei laklut naw chu a ni hi! Isu’n “A ram le a felna chu zawng hmasa unla chuong po po chu a pek belsa ding cheu a nih” a lo ti a ni kha. Unau, Krista hnawl hmang lul naw, Vawkin hluo bit pal a che!

A BRIEF MESSAGE FROM THE BOOK OF REVELATION

By: Samuel L. Songate

The Holy Bible

The Holy Bible

Introduction: The book of Revelation is like a bright light at the end of a long and dark tunnel. For believers, it is the book of hope. I’ve chosen only three points (though there are many more) to boost us up while we are passing through enemy’s hostile territory on the road to our eternal glory.

 

(i) Letters to the seven churches in Asia

The encouragement, criticism and warnings in Chapters 1-3 are as much relevant to the churches in the 21st century as to the 1st century A.D. Like these churches, today’s churches also need to be refined from all the social, cultural, and traditional contaminations. We need to return to our first love.

 

(ii) The multitudes in white robes

The multitudes in white robes referred in Chapter 7 very clearly tell us what’s in store for those who have gone through trials and persecutions for the sake of Christ. Those soothing words like – “Never again will they hunger, never again will they thirst..the sun will no longer scorched them…he will lead them to springs of living water…the Lord shall wipe away their tears from their eyes…”  aren’t enough to describe the joy, the love, the comfort and the bliss that awaited the saints. Therefore let these verses always encourage us in times of pain, hardships, trials and temptations.

 

(iii) The Second Coming of Jesus

In the concluding verse of Chapter 22, John exclaimed “Amen, come Lord Jesus!” after he had seen and heard everything that had been revealed to him about Christ’s return. John, who had been undergoing immense hardships and persecutions at that time, was so excited and eager to see the Lord Jesus’ return. What about today’s churches? How much have we long for our Lord’s returning? Or is it that we’re so comfortable and preoccupied with our missions and projects, denominations and organizations that we hardly have time to ponder about our Lord’s returning?

 

Conclusion:  No matter how much the world despised us, as believers, our Lord Jesus Christ is coming again. And unlike his first coming, this time He will come in full glory and power, every knee will bow and every tongue will confess that He is Lord; and all nations on earth, even super powers, will tremble before Him. “Amen, come Lord Jesus!”

1 3 4 5 6 7 28