Sermons

EI LALPA ISU KRISTA TUORNA MAWL KHA (Luke 22: 39-46, Mathew 26:67-72)

By: Johny L.F. Tusing

Jesus Died for You!

Jesus Died for You!

Tukum Good Friday chu danglam takin ei Lalpa tuorna fietakin ka hmu thara, danglam le mak ka ti em em, hriet zuol nuomna ka nei el khela Bible nasataka Study nuomna ka nei pha bawk, lawmum ka tih. Ei Lalpa Isu Krista kha eini misuolhai mi’n tlanna ding, ei damna ding, thiem ei chang na dinga, a thisen far kang rawtin a hung thi a, a tuorna le intlanna sin a hung thaw dan hi a va ropui ngei deh!!!!! hi hrietthiem tu hai chu an lawm naw thei nawh, lawman leiin mitthli a tla rawp hlaka a tadingin an hring lem hlak.THICHIL HMANGAINA ANIH.

Isu thina le inzawma a tuorna hai hi a lo va rapthlak ngei deh, ei damna dinga lampui a hraw hai leh van khuo le tui ei chang theina dinga intlanna sin a hung thaw dan hi hmangaina khawm a tawpkhawk chu alo ni ngei. Hieng ang hin thetawp ei tih:

(1) In man tira a um zan khan Gethsemane huona thi khawp rau in a lungngai-

A lungngai zie le a lung an rimzie Luke 22:44 a ei hmu “ A lung an rim bek bek leiin…….a thlan thi far lientak angin hnuoiah a zuk far a…” BFW chun “thisen lientak” tiin a zieklang kher. Hieng ang khawpa lungnaina hi chu a vawrtawp ni ngei atih. Thlan thisen far lientak anga far thei chu!!!! Hi chang hi a hma chun ka hrietthiem ngai nawh, amiruokchu mithiem hai chun hieng anga thiltlung hi Hematidrosis antih a, lungngai taluo, beidawng le lung inrim taluo-great emotional trauma/distress/deep agony leiin a tlung thei(hlak) thil tlung inzing ani nawh. A tuok ding hai a hrietsa vawng, hun sawt nawte a a chunga a hung tlung ding hmulawk vawng ani leiin “ Aw Pa a thei hram chun hi no hin mi khel lul raw se, nisienlakhawm keima thu ni loin nangma thu thu ni lem raw seh” tiin a tawngtai ani kha.

(2) A inchuktir Juda Iskariot in a zawr-

Mani hnungzuitu, thuoihruoi hai ngeiin an hang zawr el ta chu a lung a va na awm deh!!!!. Sakhuo tienga thuoitu-Pharisai, Thiempu Lal, midang deu dam ni hai sien a hrietthiem um deu ding ana. Ei hnungzuitu, ei naupang hai(student) ei inchuktir hai in midang kuomah mi zawr ngat hai sien, eini rawi iem ei chang reng, ama chun a la fawp ani kha….a thiltuok hai hi chu a lo va rapthlak ngei.

(3) A inchuktirhai laia a I ringzo tak Peter in anphat-

A thuoihruoi pakhatin a zawr khawm a hun tawk vei le, a I ringzo tak khawmin vawithum lai an phat el chu ava rapthlak ngei.Mani hnungzuitu ringuma ngai, ei inthlawppui tak le ei I ringzo tak haiin “ Ka hriet nawh” an mi tisan el chun in ngaisie a um awm ngei. Chu mihriem chu ka hriet nawh tiin inkhamin Peterin an phat(Matthai 26:72). Mani ngaizawng hai mei mei in an min phat khawmin ei lung a na ana, ei hang inchan sina natak chu anih.

(4) Nuizat siemna’n hmangin hmusit takin an sawisak-

A mit antuoma “Hril raw tu in nam a vuok che an indawn, ahmaia chil ansaka, an ben” (Mat 26;67, manmi haiin chel pumin an ben sawk sawk (Mark 14:65), HOSSANA ti a khek in ri rum rum tu hai ngeiin hemde raw tiin an sunzawm el ana, mihriem nina famkim nei ani leiin in ngaisie hleng atih.

(5) Vuok thidukin, siel angin an sawia, Hling lukhum inkhumtirin an hemde na ding Kross an in put tir-

Rom sawrkarin mi a hremna dinga hruihruol a hmang hlak hi chu mi hrisel pangngai hai khawm an chau pui rawp hlak anih. Hruihruol hmawra thir kuol inzum an in buk hlak, FLAGRUM (latin)ti anih-(Flesh tearing whip/scourge which has several thongs fastened to handle), an vuok hmasatakin taksa vun a phir thlenga thisen tamtak a suok nghal ding ana, an vuok nawn nawk pei pha chun vun hnuoia taksa chen phirthlengin taksa bubitna (Muscle) hnuoia thisen zam(arterials veins) phir darin thisen tam nawk zuol a suk suoka, mi hrisel pangnai hai khawm an chau ngawi ngawi hlak, Isu Krista kha a hriselna a tha tawk hle, a pa Joseph fakzawngna (sin) carpenter kha athangpui hlaka a taksa hriselna dinga sin hun tawk anih, Jerusalem le a se vela an fak hai khawm kha khawvela fak hrisel tak-Mediterranean Diet fa an ni el khela a rawngbawlna an zin fe le hung na kha hriselna dinga tha huntawk anih. Siel angin an sawi el kha chu a chau ngawi ngawi el anih, vel tamtak an vuok ani a taksa sunga thir zum lut an hei phi dawk nawk pei kha chu natak ning a tih, Rom sawrkar danin intang hai hrim hrim vawi 39 ( Jewish Mercy plea 40 minus 1) bak kha vuok(flogged) thieng lo ana. Hieng hai popo a tuor baka, Gethsemane huona a tawngtai zan khan khawvar zak ani bawk a tuor a sa ngei, ngir khawm a ngir hlei thei ta nawh pummel stand sap ha’n an ti ang ela ngir an tah.

Hling lukhum( 2-3 inches vel niin thenkhat chun anhril) an inkhumtir nawk ta deu deu, hling lukhum an in khumtir khan a lu anthawk thisen tamtak a suk suok nawk ding ana, ei lu(scalp) hi ei taksa bung a thisen zam tamna tak aniha, hling kha tuor(toxic) nei ngei a tih, thisen tamtak a suok el ni loin a tur vut vut ring a um. Hieng popo a tuzo hnungin an hemde na ding thing kawkal(cross) anlan put tir nawk ta deu deu. Cross kha Kg 34-57 inkar ni dingin anring, crossbeam(patibulum-Latin) hi a renga a rik dan chu Kg 136 (300 punds) vela ngai anih, bible a zieklang ta naw leiin a rik dan hriet antak, amiruokchu sawisak zek hnung le thisen tamtak suok hnung Kg 50 vel put chu harsa hle ning atih vawithum lai a tluk pui tawp ani kha.Ei tadinga a lampui hraw hi chu a va rapthlak ngei.

(6) Luruhmun ( place of a skull), Golgotha(Hebrew) ti ni bawk antlunga, a thal zawnga inzalin a kut le ke hai thirkilna inches 5-7 vel a lienin indawina um der loin hemde a hung ni nawka, kut le ke hi sensory nerves bubitna ani leiin ana hle ding anih, khaikang ani hin motor le sensory nerves(peripheral nerves) hai a tawk leiin sa pap pap khawpin ana ding anih, hieng ang natna hi CAUSALGIA an tih, khaikang aniha, a kut khingtieng ve ve le a ke kil bet ani leiin, a taksa rikna in a buk rika, inthuok harsa titakin a um ding hrietsa anih, thuok pangngaiin anthuok thei ta nawh(suffocate), rinum hleng a tih. Mi an hemde hai hrim hrim anthi na dingin an ke ru an vuok tliek pek hlak, ke an vuok tliek hnung lem chun taksa rikna popo hnuoi tieng keithlakin a um a, thuok a tawp top hlak leiin thi ngei ngeina anih, hi hi CRURIFRAGIUM antih. Isu ruok chu an vuok tliek hmân a lo thi hman tah, a thi vat nasan chu a taksa a chau hle ta a, thisen a suok rawn taluo el baka boruok tha (oxygen) a hip lut hlei thei ta nawh lei ani ring a um, Ava rinum awm ngei deh.. “Ka Pathien, Ka Pathien iengdinga I mi maksan am ana? Tiin a thlarau an thla ta a…..Ziektu ṭhenkhat lem chun “ after hours of this pain, cycles of twisting, joint-rendering cramps, abnormal breathing Jesus slips into unconsciousness ….” Isu kha nikhuo a hriet ta nawh-hieng ang ngirhmun hi ASPHYSXIA antih.

 

A dang a charin uoin thur an peka( Psalm 69:21” Ka bu dingin thil kha an mi pek nawk nghala, ka dang a char hlakin uoin thur dawn dingin an mi pek a” tiin alo ziek) uoin thur(wine ninegar) hi pain killer a an hmang hlak ke/taksa ngawi sawkna damin, amiruokchu ei Lalpa Isu Krista ruok chu, chu uoin thur natsawkna khawm chu hnawlin a tawp chenin a tuor muolsuo zo ani kha..

In hemdena (Crucifixion) hi Persians haiin B.C.400 bawr vela an lo ṭan Alexander the Great khawm khan Egypt le Carthage a hai ah alo hmang ve hlak anih, Roman haiin an hung inchuk tung peia, in hemde dana thiemna insâng tak(a high degree of skill and efficiency) hung nei an niha, a hmang dan le mi hrem dana khawvel i hriet khawp raua hrie hne le hnesaw an nih. Emperor Constantine in 4th century A.D khan a suktawp chau anih. Inhemdena hi in hremna nunrawng tak, natak le insuk muolphona tawpkhawk inhremna anih. Jews hai Historian ropui Flavius Josephus chun “ Thina lungngaium taka inhremna” a ti tawp. Roman Philosopher ropui le Nero advisor- Seneca khawmin “Cross a in hemde na nunrawng taka thi nek in mitamtakin mani inthat an nuom lem” alo ti hiel.

Roman Politician, philosopher ropui le thuhrilthiem hmingthang- Cicero in “ Inhremna nungrawng le insukmuolphona ani leiin Roman mipui hai anthawk lakhmang/suktawp chau ni loin, ei nakawr, mit anthaw khawmin bohmang sien suok(slave) hai chau kuoma hmang ni raw seh” atih tawp el ani.

EI LALPA TUORNA MAWL KHA a lo va rapthlak ngei nang le kei min tlanna ding ani mawl sih a, harsatna, beidawngna, thlemna le lungngaina, vangduoina ei tuok chang hin ama mawl hi en ei tieu, ama ei en sung phawt hlimna le lawmna hmung ei tih. A mi hmangaina leia a kut pahni phara ei aia thi khawp raua min tlantu thupek ropui tak “ Pa’n kei ami tir ang bawkin ka tir cheu hi……..KHAWVEL POPOVA FE UNLA, THIL SIEMHAI POPO KUOMA CHUN CHANCHIN ṬHA HI HRIL RO” ti hi changchawiin (theinghil ngai loin), hnungsawn le zam lovin huoisen tak le ami hmangaina hrezing in Krista tadinga Ṭhalai hai pen suok ei tieu.

Mari Khawte Nunghak Satlie kha!!

By: Rev. Lalrosiem Songate

Mari

Mari, Khawte Nunghak

Khawvel kohran ṭhenkhat Isu piengna nu Mari hi suolna neilo, Pathien ang tluk hiela inchuktir khawm an um hlak. Amiruokchu Mari hi Bible in a hril dan taka en chun chuong ang zawng chun a hrilnaw reng reng. Galilee rama Nazareth thingtlang khuote pakhata nunghak satlie ve mei mei, amiruokchu Pathien laka a ringumna leia nasa taka chawimawia um chau a ni lem.

Mari hi nunghak satlie ve el anih, ei zuk ti theina chu nunghak pangngai anga tlangval fel tawk tak le hmelṭha tawk tak in ngaizawng puia, inhuol puia, a tawpah innei puia nau le te malsawmna tamtak dawnga sungkuo ditum tak indin suok dinga ngaituona lo nei ve hi a nih. A san chu ama tawkah a lo tawng ve tlangval fel ve tak Joseph le inhuol lai an ni tlat a nih.

Pathienin mihriemhai hi nuhmei pasal inneia inthla pung dinga a mi ti lei khawm ning a ta, tlangval phawtin ngaizawng ding an zawnga, nunghak phawtin tlangval an ep a. Nunghak haiin an inlau tak laia pakhat chu lengṭul hi a ni rawp hlak. Lengṭul inlauna leia a hun le hun lo khawm ngaisak loa pasal nei rawk rawk khawm ei tam. Lengṭul inlau leia baw suol pawl le baw fuk pawl khawm ei kat nawk el. Mari khawm nunghak hnakhat ve tho, pasal neia naulete leh sungkuo indin ve dinga lo in singsa ve a nih.

Mari Danglamna:

Mari hi nunghak hnakhat ve el nisienlakhawm a danglamna chu Pathien hre mi a nina hi a nih. Vantirko a kuoma a hung inlar laia a chibai bukna ṭawngkam ei Hmar ṭawnga an ziek dan hi ṭawng upa an hmang lei am a nih a chieng tawknaw vieuin ka hriet. Hienghin hang inlet in la, “Chibai, Mari, nasa taka ditsakna dawngnu, Pathienin a umpui che..”  (Luka 1:28) a ti a nih. Chun a khel met chang 30 na ah “Pathien ngaisak zawng i nih” ä ti nawka. Hi taka Pathien ngaisak zawng a ti hi ama Mari hi Pathien ngaisak mi a tina niloin (Pathien ngaisak mi chu a ni tak meu el) Pathien i hrietfuk mi, Pathien mit la mi a tina a ni lem. English King James Version a chun  “… thou hast found favour with God..”  a ti a, chu umzie chu Pathien ditsakna dawng tu tina a nih. Pathien ditsakna dawngtu anina san chu dawng tlakin Pathien a hriet hlak tina a ni bawk a nih.

Mari hi Thuthlung Hlui le Thuthlung Thar inkar sunga Juda nunghak satlie ve el  amiruokchu Pathien ṭi dek a Pathe ram beisei tu tlawmte hai laia mi a nih. Mithiemhai hril dan chun Thuthlung Hlui le Thuthlung Thar inkar hun hi kum zali lai niin an hril a. Chun hi hun sung hin Thuthlung Hlui hunlai anga Pathien inlarna le Zawlneihai hmanga Pathien inpuongna khawm a um ngai naw a, The Silent Period (Pathien To Ṭawk Ṭawk Hun) an ti hiel a nih. Hienga Pathien a re ṭawk ṭawka a mipuihai laka a hmai a thup lai khawma Lalpa an Pathien a kawp tlat chu thil inhawi le hlimum chu ninaw tawp a tih. Revival huna hlasaka lam dup dup chu inhawi tak a nih, amriruokchu ṭawl hun le inhil hun khawma Lalpa laka hlim zing chu thil awl-ai an nawh.

Israelhai chanchin a mak ve tak pakhat chu a ram khawpheka Pathien laka hnungtawl hun an nei hlaka, chuong huna hai chun a mahla (Remnant) Pathien laka ringum taka um tlat tlawmte Pathienin a hla hlak a nih. Lal Ahab le Lalnu Jezebel in Israel rama ro an rela a ram mipui Pathien laka helhmang puiin Baal pathien an biek mup mup a. Chulai chun Elijah beidawngin ”Lalpa, I zawlneihai an sukhluma, I maichamhai an cho chima, kei ka khat chauin ka la um a, Keikhawm mi sukhlum an tum a nih,” tiin beidawngin Pathien a ko laia Pathien hung dawnna chu “Baal hma a la dingṭhaṭhuon ngainaw mi sang sari ka ta dingin ka la hla a nih,”  a hung ti a nih. Chuonghai chu a ram khawpheka an hnungtawl lai khawma a mahla Pathien a kawp tlat hai an nih.

A mihai suolna leia Babylon kuta Pathienin a mihai a pek suoka, hmelmahai suksiet ding le sawisak dinga a nghatsan lai khan zawlnei Daniel hai, Shadrak, Mesak le Abednago hai ang Pathiena kawp tlat mi an lo la umnawk pei a nih. Pathienin an ram a nghatsan tak leia Pathien laka lunghnuol el loa Pathien ta dinga an in suk thienghlim tum tlatna hai (Daniel 1:8), mi po po Lal pathien lim hma a kun dinga an ti laia kawng suk ngar tlata, Lal meipui lum taka peilut khawm ngam khawpa Pathiena kawp tlathai kha ropui tak an nih. Nunghak po po an ṭhalai hun chena khawvel nunkhuo an pham laia mani tawk tawka Pathien lo chelde tlattu Mari kha a ropui naw theinaw a nih.

Pathien Hremihai chu an Beiseina Khel ah Lalpan a Ṭhuoi Hlak:

Mari kha nunghak satlie ve el ani ve leiin nunghak danghai ang tho a pasal neia nau le te neia sungkuo ditum tak indin ding ti kha a beiseina (future plan) a ni ve a nih. Thlarau mi ni lei seka nunghak tlangval ta dinga ngaizawng neilo ding tina an nawh, amiruokchu tulaia ngaizawng ei neidan hai, a bikin mawilo taka umkhawm hai, sex hmang khawm hai ruok hi chu a thlarau mi thaw chi naw a nih. Eini hai kalchar a thlarau mi ngaizawng nei dan ding chu hmatienga nuhmei le pasal ding inzawngna a ni lem ding a nih. A san chu tienlai anga nu le pa hai suktuo fawm kha ei thaw ta ngainaw leiin.

Mari chungchang thu a ropui bek bek chu a beiseina (future plan) khel tienga a ta dinga Lalpa remruot (God’s Future plan) hung inlang hi a nih. Hiengthu Lalpa vantirko in a kuoma a hang hril meu chu awi harsa a ti taluo a, a ka awk awk el a ni kha, A hang hriet chieng meu chu vantirkoin Lalpa ditsak hlawnu a ti chau kha ni ta loin ama ngei khawmin “Ṭhang hung thar peihai khawma mi hamṭha mi ting an tih!” (all generations shall call me blessed!) (Luke 1:48) a ti hiel a ni kha!

Mari zarin khawvel chanchin (world history) chau a danglam niloin khawvel mihriem chatuon chanchin (eternal history of mankind) a suk danglam pha vawng a nih! A ropui lawm lawm ngei! Pathien ang tluk hiela be nuom pawl an lo um khawm hi Pathienin a chawimawi lei a nih. Zawlnei Daniel, Sadrak, Mesak le Abednego hai khawm Pathienin a hang chawimawi tawl meu chu lalṭhungpha tieng an in vawr kai tawp tawp el a ni kha! Zawlnei Elijah lem chu van chenin an vawrkai tawp a ni kha maw!

Vawisuna nunghak tlangval Pathien ṭi deka nun hmangtuhai, ieng ang remruotna (future plan) am in nei ka hriet nawh. Amiruokchu Lalpa ṭi deka nun hmangtuhai chunga Pathien thilthawhai ei hei en hin nanga chunga khawm ieng thil am a hung thaw ding ei hriet nawh-

Just be prepared for a change of plan, for God is going to do wonders in your life!

 

 

LIFE’S STORM (Hringnun Thlipui)

By: Rev. Dr. H.M. Songate

“Chun, an lawng kar chu an lung a zîng hlein a hmu a,…….” (Mark 6:48; Math 8:24)

Zemanta Related Posts Thumbnail

Rev. Dr. H.M. Songate

1983 kum khan Guwahati-a inthawkin Imphal panin tienlai vuongna Boeing 737-in ka vuong a. (Boeing 737-hai kha a ‘flying hours’ (vuongtheina tiem chin) a tawp hnung khawm a, Imphal, Silchar, Guwahati le Patna haiah an la’n vuongtir ti thu news-a ka tiem fùk leiin, nasa takin an  engineer-hai kuomah ka complain a). Khâ nî khan khawmuol a ṭha leiin inhawi deuva chawlhadam malama Imphal tlung dingin ka’n ngai a. Ka ṭhungna hnungtieng Pu H V Lalringa, IAS (retired) hai sung khawm an lo inṭhung ve a. Kan inring hmain thawk-le-khatin ‘Thlisie’ (turbulent storm) kan tuok ta thut el a. Pilot-in inhmaw mangkhêng a, “Fasten your seat belt” a hung ti chu thlâ a sukphâng ngei el! Chu zo zet chun lampui ṭhalova Autorikshaw chuong ang el kan ni tah. A mi vawr let hne ngang el. ‘Amen’ khawm ‘Amen’ hman mang lovin, ka ṭawngṭai vê chùl el niin ka hriet! A ṭhen an ṭap a, a ṭhen an khèk a, a’n hnem thei bik khawm kan um nawh! Tuhai tidanin amanih, ‘piengthar, piengthar naw thu a’n nawh’, ṭi a um a nih! Dám le himin Imphal Airport (Tulihal Airport) chu kan baw ta hràm a… Dam taka Imphal Airport kan zuk tlung chu, kan lâwm luotin ‘hmelhriet, hmelhriet naw kan ti nawh; ‘kawr le vai’ khawm  kan ti bawk nawh, lawm luotin kan inkuo tawm tàwl zâk el a nih! Dam hi chu lawm a lo um bàk el ie!

Peter le a ruolhai ‘thlisie’ tuok nêkin kan thlisie tuok kha ṭi um lem  dingin ka ring! Keini chu inban tangna ding chite khawm umlo kha a n’a. boruok insang deuva inthawka tlakthlâk vang vang el ding kha a ni leiin, ṭi a um dàn kha a’n ril a nih. Eltama angin, Pater hai kha chu an lawng kha lo se vawng sien khawm, a thingpek kawia hai dàm inbán tàngna ding la um a t’a! Inhlieu dàm an thiem lem chun chuong bèka zuk thlaphângna ding, a um di’m a ni aw ..? ka ti deu a nih! Amiruokchu, Paul-in ‘tui chunga thlisie le lawngsiet a tuok thu a’n zawt dàn ka hmuin, a lo thlaphàng thlâk hle tho ding chu ni’ng a tih! Boruok khawm ni sien, tuipui chung khawm ni sien, ‘thlisie’  tuok chu a thlaphâng thlàk hrim hrim! Thlang bik ding a um ka ring chuong nawh! Ieng leia ei hringnun hi ‘Life’s storm’ (Hringnun thlipui) hin a mi nuoi zek el hlak am ni’ng a ti aw? Ieng leia nun hi, thlaphâng taka ei hmang rawp el hlak am a ni ding chu..? Ieng leia thlaphângna hmun le, ṭi dawr dawrna ding hmunah ṭhuoiin ei um vet hlak am ni’ng a ti aw? Ieng leia ei thu le hla ni lova ‘Hringnun thlipui’ hin a mi nuoi zek el hlak am a ni ding chu..? Ama mi kona anga kal ei chawi hlak khawm a, ieng leia hieng ang thil hi a mi la’n tuoktir tho hlak am a ni ding chu…? Hringnun Thlipui hi pehêl dàn a um naw ‘mani aw….! I hringnun thlipui bo na dingnin tawngtai nawla, sel taka I do zo theina dingin hni lem rawh!

Harsa em êm puma ‘Hringnun Lawng’ ei kar hi, Pathienin A mi hmu zing a.  A mi lunginsiet em em el a nih. ‘Hringnun Thlipui’ hi kawng hran hranin ei tuok hlak! Pathienin mani mihriem chanpuihai hmangai dinga A mi dit leiin, ‘Hringnun thlipui’ ei tuok hi a phal hlak a nih. “Ṭaphai ṭappui a, lawmhai lawmpui ding” a ti khawm hi, hi thlipui tukvera inthawk bawk hi a nih. Ei thlipui tuokhai ruok chu a’n ang vawng ngai nawh. 1997 lai khan Manipur, Bishenpur bulah unaupa (ECA member) pakhatin, Pathien kohran dan thienghlimin nuhmei a nei a. Moneitu chun innei an zo charin, a  ruolhai truck-in,  a nuhmei sunghai a va’ n thla a. A va’n thlana lampuiah lamthlang tieng an truck a’n hlumthla ta hlau el a. Moneitu chu a ringa  inthawk a ke chen a zeng vawng nghal a. A chang thei ta nawh a. Imphal-a doctor haiin thaw ngaina an hriet ta naw phingin, Guwahati-a Neurologist pan dingin an hung tir a. Chu tlangval (moneitu) chun a mi lo hriet hlak leiin ṭawngṭaipek dingin a mi beisei a. Chu thu an mi hung hril chun, nasa takin ka lungril a’n rum a. “Pastor lo ni naw lang aw…!” dàm ka ti hiel a nih!

Moneitu le a mo, hlimtaka an innei zo char a, thlisie nunràwngin a nuoi zek a ni thu ka hei hriet chun, ka ṭawngṭai ngam nawh a. An mi hung ko sen leiin an hotel-ah ka va fe ta khawng khawng a. En a’n tak ie! A nuhmei (mo) chun spoon-in bu a lo inba a. Moneitu’n a mi lo hmu chun, “Pastor,chibai” tiin a mi lo dawngsawng a. A kut ruok chu a tir thei nawh! Ka hrietngailo an nia chu, ṭappui naw chu thawthei ka nei ta nawh. Chu ni chu ka ta ding chun ṭapna le lungngaina ni a ni a. “Ieng lei a? (why?)” tia ka’n rumna ni a nih. Mo thar inlawm hman lohaiin, an nupa a, CBCNEI Guest House-a an mi ṭap khum nî kha, ka damsùngin theinghil thei ta ngai naw ning! Hringnun thlipui hin, a nun a lo va ràwng de aw…! “Amiruokchu, an lawng kar chu an lung a zing hle in a hmua” Bible in alo tih tlat el! Kha hai nupa lung inzing khawm kha alo hmu zing alo na! Nang le kei lung inzing khawm ami lo hmu zing ana! A va thlamuong thlak de!

Dr. George Samuel, Indian scientist hmingthang, Pathienin a ko lei a, NASA hai kona hnawlpa khawm khan, thlipui a lo tuok nasa ve ie! Haggai International-ah rawng a bawl a. World Vision International-ah Board member a ni a. Nau pahni nuhmeite le pasalte a nei a. Vun (skin) natna mak tak le vâng êm èmin an na ve ve a. Kum 20 tling hmaa thi ve ve ding an ni a! An nauhai chu kum 20 vel an hung tlingin, a dawt dawtin an thi a. Chu zovah mak takin a nuhmeiin a hei thisan nawk thut a. Ngai ngam le en ngam an nawh! Upat tiengin a khat chauvin a hei um nâwk nghal a. A khawvel thil maksan hi a ropui èm êm vei leh… Chulai chun World Vision of India office-ah (1986-87 lai vel kha niin ka hriet) Pathien thu a hung hril a.John 3:16 “Pathienin khawvel a hmangai em em a. Chuleiin a naupa khat neisun chu a pek a” tiin a tiem a. “Unauhai, Pathienin a mi hmangai hi a va ropui de aw” a ti a. A meng ngam tû khawm kan um nawh! Sermon laia a ropui naw pawl tak ni ding a n’a. A tawi a, hrietsa vawng a ni nawk nghal a! Amiruokchu, kan hringna po po kha a zawp thla vawng el a nih! A ‘Hringnun Thlipui nun’ a hril leiin kan mitthlihai kan dang zo naw a nih! Krista pasalṭhahai ka hmu hin ‘ka thlipui tuor vehai hi’, hi khawvel damsung ngei khawm hin  ka’n sit hlak! Nakie Lalpa hmaa ka tlungphâ lem chu ka va’n sit awm de….! Ieng ang ‘thlisie’ khawm tuok hai sien, Lalpa ṭituhai chu ‘hnèmin’ an lo um rawp hlak a nih. Thlisiea inthawka Lalpa sansuokna che kha a ropui maw! Inruk a ngai nawh a, intham fàwm khawm a ngai nawh. Thlaphâng taluo bêk bèk khawm a lo ngai nawh. Ama a hung inlang khan ‘thlisie’ kha a re duok el ding a nih. Thlipui a re hnung khan chu Peter hai rawi kha, intihuoisen hle ta’ng an tih! An lungrilin ‘vawikhat hung thaw nawk sien aw…’ dàm an ti ka ring!

Chuleiin, unau ieng ‘thli, thli’ am i tuok ta aw? Tulai teh, ieng thlisiein am a nuoi che a? Ei inzinna ram hi ‘Thlisie kawngin’ a sip a nih. I thlisie tuok a khan Lalpa aum tlat chu tie! I natna, I harsatna, le thi hmun I suolna hmun haia khan Lalpa alo um anih! Ei tuok ding hrim an ni a. Amiruokchu, a mi sansuok theitu pakhat a um a, chu chu Isu a nih. Isu ko a ngai hlak. Ei suol lei le thu ei awi naw leia ‘Thlisie’ ei tuok chàng um a ta. Ama’n ‘thlisie’ a mi siempèk khawm um bawk a tih. Thlisie fe thleng râwn ràwnin Pathiena an ringna an siem nghet ting el hlak a nih. Chuleiin, ‘Thli le tuipuihai chena a thu an awipa’, ko phâk chauva a um zing hi ko a ṭha. SMS khawm ngai lo, STD, ISD khawm ngai lo, Email le facebook ngai bawk lo; ring puma ko kha a ni tawp el a nih. Unau, ko rawp raw khai! “An lung azing hlein a hmua” .Lungzing puma I lawng kar kha Pathienin a hmu naw che ring naw! Ko phak elah hnaiteah a um zing a nih. Amen!