Sermons

I TI NAW NA!! Part-I (Math 21: 28-32)

Rev. Dr H.M.Songate

Ei bible thu thlang dawk na pa hin nau pasal pahni a neia. A upa lem pa le a naupang lem pa nungchang hi an ang naw khawp el. Hi hai nungchang hin ei ram kohran nungchang le mizie indiktak a tarlang in ka hriet. A hmasa lem pa in “AW EI” a ti kha ‘ati naw na a nih’! “Aw ei” a ti de naka chu a lungril a thlakthleng tlat hi thil ropui tak a nih.

Second thought a nei leiin mi hmingtha le thu awi ani pha. A nuhnung lem pa ruok chun awlsam tak in “Aw ni raw se pu” a ti et a. Iengkhawm a thaw lem nawh. A nuhnung lem pa hi eini rawi leh in ang kati hlak. In ngaituo set set loin, a sie a \ha dawn loin “aw ” a ti a. Ati ang khan a um lem nawh. Eini rawi khawm ei piengthar hlim lai le hlim ni khuo ah ramtin ei inzawta, ruo muolkhawi ang el in ei in ri huou huou a. Sawt chu dai lo. Ei intiemna popo hai kha ei hriet fuk sawt ngai nawh. Favai a inzun ang chau a nih. Ari a nasa a tui ruok chu hmu ding a um ngai nawh!

Chu umzie chu, ei ringum tawk naw tina a nih. Ei thutiem ah ring ei umnaw chun, mi depde ei ni tina ani bawk. Mi ti ti lo ti ve el hlak hi insuk polite na ah ei ngai khawm ani el thei. Ei phing a tam hle khawmin ‘a tam rak nawh’ ei ta; ei insuk pal na deu khawmin a na sain ‘ana nawh’ ei ti hlak. Chuleiin, ei tawngkam tamtak hai hi ‘ei ti nawna’ anni tlangpui leiin, ei inring zo tanaw a nih. Min an min pak rak khawmin ei awi chuong nawh a, an mi dem hrep khawmin ei awi chuong bawk nawh! Asan chu ei tawngbau suokhai hrim hrim hi ‘ei lungril nilo ei inhril hlak lei a nih’. In ngaitlawmna indiknaw chau ni lovin khel hril ei nih. Hi Pathien thu le inzawmin thil 4 (pali) hril ka nuom:

1) Lungril inthlak danglam: Inthanglienna daltu lien tak chu ‘lungril inkhar’(closed mind) hi a nih. Mi a lungril an khar tlat chun an thang lien thei nawa, hma a sawn thei bawk nawa, a ngaituona a thleng thei bawk nawh. A ngaituona bang chite kil li sunga khan an tawm kumkhuo hlak. Bible thiem haiin Isu le Pharisai hai in mil theinawna lien tak chu ‘an inthlak danglam thei naw lei kha’ ani an tih. Dan hlui an hriet kha an kengkaw fun funa, an thi pui el a nih.

Eini rawi khawm hi khawvel thil khawm nisien, Pathien ram khawm nisienla, lungril inthlakthleng nachang hrelo ei ni chun iengtik lai khawm hma sawn naw mani. Mizorama kan ruol hlui officer ni mekin a pu (high school teacher) chanchin hieng ang hin a hril rawp hlak “Black board ah in hum tar ka tum lo hrim hrim” a tia, IPS hun sawt naw tea, a hmu thu a hril hlak. ZPMK (Zoram Pawn Mizo Kohran) a kan inkhawm lai, kan member chanpui (a hming hei thup ei tih) IPS, SP a um vea. A hma chun teacher a nih. A nuhmeiin “Teacher a imi tarpui el chun ei nauhaiin ruol an inhnar zing el ding ana” a ti vet a, civil service exam dingin a nawr hlak leiin, IPS a hmu ta khawng khawng a nih. DGP borders in a pension a, tu khun Mizoram sawrkarin an la sawr. Kohran ram ah khawm lung inher mi, lungril inthlakthleng thei mi, ngaidan hlui thleng thei mi, thu awi thei le inngaitlawm (servant leader) ni ei tum a ngai. Chuong ang mi chu an hlawtling rawp hlak.

Nang te, mani ngaidan ringawt kengkaw tlat mi I ni? Second thought neia ei Bible tiema mi pa ang khin lungril inthlak danglam ding ei nih. Pathien thu awi le inza tuona nei ei tul

2) Thilthar do hlak: Hnam inthang lien theinawhai in an ti tak chu ‘thil thar, idea thar, thawdan thar, ngaidan thar’ hai hi an nih. Tienlai khan Jonas Hansway in Nihliep (Umbrella) hi a hmusuoka, a lawm em ema. Tuol ah a hung khum dawk chun mipui in ‘an vet ani’ an ta, pil le chirhakin an lo deng mur mur! Sap hai khawm ieng uol chu an lo ni nawh! Chuong ang bawkin ‘school uniform’ an hmu dawk hlimin, London mipui an lung a sena, ‘iengtinam ei nauhai hre hrang ei ta’ an tia a hmusuoktu pa lung leh an hnawt! Chuleiin, Pathienin Israel hai kuomah “Mi ko unla, thilthar le ropui inla hriet ngailo thawpek kati cheu” Jer 33:3 ah a lo ti a nih. Pathien in ei fedan ngai ngawt ngawta fe zing ding le umdan ngaia um char char dingin ami dit nawh. Inthang ding le hmatieng fe pei dingin ami dit a nih. Pathienin Joshua kuomah “Vawisun hin Aigupta phurrik chu kan hlum hmang pek ta cheu” Joshua 5:9 ah a lo tih.

Aigupta phurrik ei la phur zing tawl el hi in siemthat a hun ta hle. Mani mimal hringnun, insung khal dan ding, khawtlang, hnam le kohran khal dan ding kawnga Pathien in ‘thilthar, lampui thar, thawdan thar le thalem’ ami pek nuom a, chuchu ei zawng a ngai. Chu ding chun ‘thuawi intuo’ le ‘Pathien thu zawm’ a ngai.

3) Thabo, teirei peilo na le Inza tuona umlo: Tukuma HSLC result Tipaimukh biel tienga a tha thu kalo hrietin ka lawm em ema, Bawng that ding nei lang ka that ka ring! (Hmasawnna thar through in an teacher hai popo ka ditsakna le lawmpuina chibai ka thawna, ei naupanghai ta dinga malsawmna hnar hung ni pei dingin ka ditsakna kan hlan tawl bawk a nih). A naupa naupang lem pa hi mi thabo, mi zawmthaw, tawng mei mei, mi inza nachang hre lo, tha hawi vieu si lulul tak a nih. Mi’n Pathien ina taktak an nei naw chun, mani inzana (self respect) an tlasama, midang khawm iengma lo a an ngai hlak. Thaw ding tisi thaw lo. Intiemna nei ta si thaw zawmlo. Takna neilo, tum runa neilo ringtu hai hi hmangna ding an vang emema, mi hnawksak an nih. Entirna dingin eini rawi lai, chanchinbu, magazine dang dang ieng zam suok tang a ti aw!

An suok ruol ruol in an thi nawk hlak a hawi!! Chanchinbu hrim hrim a lak man advance a pek lo a tha!! 1978 khan layman inti iemani zatin ‘Laymen Gospel fellowship” kan ta, kan indina (an hminghai hei thup pek ka tih)!!. Magazine a hming “Bethlehem Arsi” kan insuoa. November thla in a suoka. A tiem phawtin tha an tih a. Tukum hi a kum 33 tlingna an taa, amiruokchu, second edition ala suok naw zing!! “Va ra ding le in ra a umzing dingin” Isu’n alo ti ani kha. Teirei peilo hai eini leiin ei ti hai kuhi ‘ei ti naw na’ ani ringawt el! Tak inning taka mani sin thaw ding le Pathien thupek ngaituo zawm hi ei tul takzet an tah.

4) Tukhawm tluklo hai: Chuleiin, Isu’n in tawng angin in umnawa, in lungril inthlak danglam theinaw leiin “nawchizawr hai le siekhawntuhai in Pathien ramah an khal ta cheu” tiin a hal a nih (Verse 31). Eini rawi ami halna a ngai a tha. “In lulul a, fel le tha in intia, in chapoa, lungril inlam let nachang in hriet nawha, in sim tak tak naw leiin ruol hnung in hnawt an tah” ami tina a nih. Ei lulul lei le ei ti angin ei um ngainaw leiin, ei hnam, ei kohran, khawtlang le tuolsung a sie zo der an tah! Isu tawngbau ngeiin, ieng lova in ngai haiin an khal ta cheu a mi ti a nih. Hnam chin lem, hnam hnuoihnung lem, fello le indiklo lema ei ngaihai hnunga ei lawn dut dut an tah.

Pathien thu awi ei tiua, ei thu ring pawm tlat ei tiu a, ei tihai hi ‘ti nawna’ ni lovin ‘ti taktak’ ni ta lem raw se, chuong naw chun iengtinam Vanram chabi kawl thei ei ta? Vanram chabi kawl dingin ei kualifai ta hlawl naw hi a pawi a nih. Unau, I lungril thlak danglam la Lalpa Grep huona sinthaw dingin hung ve ta la. Chuonga ei um pha midang hai khal zar zar el ei tih. Amen.

KA HMING CHU NUOIA ANIH (MY NAME IS LEGION)

Healing of Legion

Mihriem hin ei nuom tak chu zalen taka khuokhirna um derloa mani nuom ang anga um hi a nih. Khuokhirna hrui le Dan hai hi ei nghawka, ei nuom nuoma uma khawsak hi thil inhawi tak dingin ei ngaituo rawp hlak. Hilei hin nunghak tlangval tamtak nu le pa thununna laka inthawka hela, mani nuom nuom ruol va pawla, nuom nuoma va khawsak hi inhawi em em dingin ei ringa ei thlakhla em em bawk anih.

Amiruokchu a ni ngai kher nawh!

Marka 5:1-20 inkar sung hin mi pakhat a hming “Nuoia” tia hriet el pa chanchin ei hmu a. A hming Nuoia ti khawm hi miin an phuok pek niloin ama ngeiin a phuok a nih. A san chu Isun “I hming iem a na?” tia a hang indawn khan “Nuoia ka nih, tamtak kan ni si a” tiin a dawn a nih. Chu umzie chu a sunga khawhri tamtak an um leia a ti a nih. Rapthlak tak a nih.

Hi mipa changzie hi ei hei ena, a mak khawp el. Thununna hrim hrim a dit nawh a, an thununna dinga thir hruihruola an khuopna hai khawm chu a pawt chat vawnga iengkhawmin an khuop hne nawh. Tu thunun theiloin a nuom ang angin a khawsa el a nih. Hihi tulaia thalai tamtak nu le pa le khawtlang kohran khuokhirna hnuoia kun nuomloa an nuom a ninga nunkhuo pham hai ang a nih.

Mr. Nuoia hi tu khuokhirloa a nuom nuoma a um laia a thaw hlak chu thlankhur sungahai uma, lunghai laka ama le ama in sun pawp a, hliem nengnunga ama le ama in sawisak hlak a nih. Hienga a um angin um pei sien chu sawtnawte ah ama le ama in sukhlum ngei a tih. Mihriem nulepa le khawtlang kohran khuokhirna hnuoia um nuomloa mani nuom ang anga nunkhuo hmanghai hrim hrim hi Mr. Nuoia anga anni le anni chunga sietna an intlun rawp hlak.

Nulepa thuawilo tu chun sin a thaw naw a, pasietna a hmabak a, zu le sa an ruia, a nunkhuo a tawi a, Number 4 le drugs hai a hung thaw meu chun bawta puon sawp hung hul intawm ang elin a hringnun chu tawiterek in an tawma a thi nghal el hlak a nih.

Keima nun ngeia khawm ka taksa nuom zawng anga ka zala, TV ka en a, annawleh kan vak kuol mei mei hin lawmna a mi pek nawh a, rinumna inhawi ti nawna a mi pek lem chu tie. Ei taksa in a pei raknaw khawma sin ei thaw a, Bible ei tiema, ei hang tawngtai tawk tawk hai hin hlimna a mi pek lem tlat. Sunnithlaka ina ieng thawloa um nek chun sin sawl deua ei hang thaw hin lungril taka khawm sense of accomplishment a min nei tir a, lung a awi hlie hlie hlak. Taksa sawizawina khawm a ni bawk leiin a tha hle.

Kum iemani zat liem ta khan zanah lamliena ka lawn lai zurui pakhat kan tuok puia, a beidawng thu a mi lo hrila. “Ka nun ka nghawk a nih, thi pawt pawt ka nuom a nih…” tiin tawng sechier malamin a nun hlimnaw thu a mi lo hrila. Zurui a ni bawk leiin ka biek zawm pei raknaw leiin ka fe sana. Chutaka lamliena ka ngaituo zui chu hihi a nih.

Hi mihriem pa hi khawvela inhawi titak ding chu annaw dim a nih? A nuom dan dana um a na, a sunghan skul kai ding an ti khawma kai nuomlo, khawlai lenglo ding an ti khawm leng tho, zu dawnlo ding an ti khawma dawn tho. A umdan hai hi tu in umtir niloin ama a nuom dan ang taka um a ni chu tie. Anachu, inhawi ti ta nekin a beidawng luotin thi hiel khawm a nuom a ni chu tie. Mr. Nuoia laka danglamna a neinaw hle.

Khawhri a nuoi telin mi chenchil nawhai sienkhawm, mani nuom zawng chaua khawsa mi ei ni chun Nuoia le ei kar a hla biknaw hle a nih. Chuonga ei um zing bawk chun ei hringnun khawm seinaw hle bawk a tih.

Pathien thuneina le a thutaka intuklut hin hringna le hlimna tluontling a um tak a nih. Hmangaina hi dan zawm famkimna a nih, ti ang deuin Pathien thua intuklut chun ieng anf khuokhirna hnuoia khawm ei um thei vawng bawka, chuleiin Pathien hnai hi mihriem ta dingin a tha tak a nih.

Lalpan a hmangai che!

 

 

 

Isu Kros Lera a Thi khan a Pathienna a Thi Am?

A God forsaken by God, who can understand? Martin Luther

Isu Kros Lera a thi khan a Pathienna a thi ve am?

Isu Pathienna le mihriemna thua inselna hi Church Fathers hai hun lai daia kha an lo ṭan ta a na, tawp in tai a neinaw ding khawm ning a tih. Chuonghai laia an lar tak pakhat chu Gnosticism inchuktirna hi a ni a. Anni hril dan chun Matter is Evil, Spirit is Good ti inchuktirna ṭhangsanin Pathien chu thlarau, suolna neilo a ni a, Isu mihriema (matter) hung inchang hi a Ṭha a Suola hung inchang tina a ni leiin thil theilo hulhuola ngaiin Doctrine of Incarnation hi an hnawl thuoi el a nih.

Doceticism hai ve thung chun Isu mihriemna kha hnawlin Isu kha Pathien a na, mihriem ruok chu an nawh. Mihriem ei sawn kha mihriem anga taksa neia hung inlang mei mei a nih, an ti ve nawk tlat a nih. Hieng an buoina hai inṭanna tak chu Isu a Pathienna le a Mihriemna the fel tum taluotna hi a ni deu vawng.

Iengkhawm nisien Isu chungchang a hin ei chelde tlat ding chu Isu kha Mihriem famkim le Pathien famkim a nih. Chu chu Isu kha 50% mihriem le 50% Pathien personality pakhata insung khawm tina khawm an nawh. 100% mihriem le 100% Pathien sung kawp chu 200% personality khawm niawm tak a na, chu khawm chu a ni chuong bawk nawh. 100% mihriemna le 100% Pathienna chu 100% personality pakhata an sung kawp tina a ni lem. Tak tak a ni le a ninaw ka hrietnaw a chu samak thisen glass khat hi zu glass khata ei sung kawp khawma a liem chuong ṭhaknawh an ti ang deu hi niawm tak a nih. Isu kha Mihriem famkim ninawna iengkhawm a neinaw angin Pathien famkim ninawna iengkhawm a nei bawk nawh.

Chu umzie chu Mari sunga naute (foetus) chitea a hung insieng ṭan lai le Palestina ram a suk a tunga bak inthir hrapa savun sandal buna pilvut laia phingṭam dangcharhai tuora an lawn an lawn lai khawm khan mihriem famkim Pathien famkim a ni zing a. Chu bak ah Kros lera natna rinum tak tuora an khai lai le ei suolna hai leia Pathien nghatsan tuora thina rapthlak tak isawr hluma a um lai khawm khan mihriem famkim a ni zinga Pathien famkim khawm a ni zing bawk a nih.

Chu umzie chu Pathien a thi thei tina a ni?

Pathien hi a nina tak a chu a thi thei nawh. Pathien hi chatuona inthawka chatuon chena um ding, inṭan hun neilo tawp hun nei bawk lo, chatuona hring zing Pathien a nih. Hi thu khawm hi nghet taka ei chelde ding chu nih.

Amiruokchu nang le kei sandama ei um theina dingin thi theilo Pathien chu mihriem thitheia hung insiengin a hung thi ta a nih. Chu kawnga chun a thi thei ma chu a nih. Anachu Pathien a ni tlat leiin thina in a chelsawng thei chuong nawh a a hung tho nawk a ni khah.

“Hi lei hin Pa in a mi hmangai a nih, lak nawk dinga ka hringna ka pek ding leiin.” John 10:17.

“…thil sethei, tangka le rangkachaka intlan in ninawh a, beramte hmelhemlo le inthiengnawna kailo thisen anga, Krista thisen hlu chun intlan in ni lem ti in hriet sih a.” I Pet 1:18, 19.

“Pathien kohran ama thisena a inchawk chu….” Thilthawhai 20:28.

Hi thu le inzawma ei buoina Bible chang ṭhenkhat hai chu a hnuoia hai hi an nih:

Isun a thi dinga “Ka Pathien ka Pathien ieng dinga I mi maksan am?” Mark 15:43 tia a khek kha a Pathienna in a maksan na angin ei ngai hlak hi an diknaw a nih. Hi taka Pathienin a maksan na hi nang le kei ei suolna hai leia chatuona hremhmuna natna rinum tak tuora Pathienin kumkhuoa a mi nghatsan ding ai kha Isun Kros lera a hung tuor lem a nih. Pathien in ei suolhai a phur leiin Pathien vekin a maksan a nih. Reformation lo ṭan dawktu Martin Luther khawma hilai thu hi mak a ti ngang ning a tih, “A God forsaken by God; who can understand?” a lo ti hiel a nih.

“Pa I kuta ka thlarau kan kawltir” a ti hi Isun a Pathienna an thlasuokna anga ngai pawl khawm ei um bawk. Iemani kawng zawnga ngaituo chun awmna tak a um. Isu kha mihriemna le Pathienna nei kawp a na, a thi a ṭul ta si leiin a Pathienna kha a thi ve theinaw leiin an thlasuok a ṭul a nih, tia hril chun awm ve tak a nih. Isu kha mihriem a na, taksa a neia thlarau a nei bawka, amiruokchu a taksa kha a mihriemna a thlarau kha a Pathienna tia bel hmet thlup chu tienlaia inchuktirna indikloa kohranhaiin an lo hnawl tah Apollinarianism an ti AD 361 lai bawr vela Laodikeia Bishop Apollinaris inchuktirna le thuhmun a nih.

Chun a taksa kha a mihriemna a ngaia a Pathienna ṭhanglo anga ngai hi a ni theinaw dan a um bawk. Hringna insieng ding reng reng hin nuhmei chi le pasal chi an kawp a ṭula, Isu Mari sunga an sieng ding ruok chun pasal chi a ṭhang nawh. Hmu theilo Pathien famkim kha Mari sunga taksa nei le hmu thei dingin Mihriem famkimin a hung insieng a ni lem.

A mihriemna a ei ngai hlak, a hnuoi taksa kha Pathien, taksa a hung inchang a ni leiin a Pathienna ṭhanglo anga ngai ding a ninaw a nih. Pathien immaterial bieng chu taksa material bienga hung inchang a ni leiin a Pathienna le a taksa siehran theilo a nih. Hihi va sie hran tum taluot pha chu Nestorianism inchuktirna a hung hnai el ta hlak a nih.

Nestorianism mi pakhat Nestorius an ti pa inchuktirna a ni a. Ama hi Syria rama pieng Constantinople a Patriach sin thaw a ni a. Ama chun Isu hin mizie (nature) pahni mihriem nature le Pathien nature a nei a nih, tiin an chuktir a. Chu dungzui chun Mari kha a mihriemna Nu a ni theia a Pathienna Nu ruok chu ni thei naw nih, tiin an chuktir a nih. A thu inchuktir hi kohran haiin an pawm theinaw leiin ama khawm hnawtdawkin a um nghe nghe a nih.

Isu kha Mari sunga naute chitereka a hung insieng ṭan lai khawm khan Pathien famkim a ni zing leiin a hringtu Mari chu Isu Nu a ni a, Isu kha Pathien a ni leiin Mari khawm Pathien Nu ti chu an diknaw hran naw a nih. Mari kha vana Pathien Nu, Vana Pathien hringtu a nih, ei tina niloin Pathien mihriema hung insieng (incarnate) Isu kha a hringtu a ni leiin Isu Pathien a Nu ti chu a pawinaw a nih.

Chuleiin kohran haiin ei fepui dan ding chun Isu kha Pathien famkim le mihriem famkim a ni a. Mihriem a nina in mihriem hai ai a aw thei a, Pathien a nina in Pathien pawm tlak inthawina an hlan thei bawk a nih, ti hi a nih. Chu inthawina an hlanna ding chun a thi a ṭul a, Mihriem famkim le Pathien famkim Isu chu a thi a nih. Pathien famkim a ni tlat leiin thina in a chel sawng thei naw a, a ni thumni khan a tho nawk a nih.

Pathien thisen meua intlan ei ni leiin ei sandamna hi a nep naw hle a nih, ti hrieng ei tiu.

Rev. Lalrosiem Songate