Aw Nigerian Tlangval!

Sample Picture
Just a Sample Picture

Kum 19 chaua upa nunghakte ka ni laia inthawkin hmelthatna tieng khawm ruol phaknaw ka lo ni bik naw a, piengnal ve tawk tak ka ni hlak. Nu le pa nau nuhmei neisun chau khawm niloin an nau neisun ka ni bawk a. Chuong lai chun dawr chikte kan siema chuchun kan sungkuo kan in enkawl hlak a nih. Mihaiin “Nau Duot” miti hai sienkhawm indiknaw chuong naw nih, ka nu le pa nau neisun ka ni bawk leiin an mi duot hne em em a, minister hai nauhai khawm ka lo inhnar bik ngai nawh. Harsatna hi ka hriet fuknaw hrim hrim bawk leiin inhawitina chau hnawtin ka nuom nuomin ka lo um hlak a nih. Mi mizilna hrim hrim hi ka nakuo ah a lut theinaw tawp el a nih.

Ka hung nunghak hnung lem chun kei min chu leia tlangval ruol insuol khawm an um ta hlak bawk a nih. Ka hmelthatna leia tlangvalhai mit ka lak zie hai dam ka hang hrietin ropui kan tiin kan du deu deu hlak a. Zana kan ina mi hung leng ding khawm hi chatlak loin an um zing hlak bawk a. Chawlni haia fawrpui dinga mi hung phur dawk nuom tawk hlak hi an um zing bawk. A chang lem chun tlangval hai hi routine siem pek hiel el ding am a nih tiin kan ngaituo hiel hlak a nih. School le khawlai dunga hai khawm hin mihai enzui ka ni zing ti khawm kan hriet chieng bawk a nih. Chuong chu ka hmelthat lei le ka rohlu an enhla lei ani ti ka ringhlel chuongnaw bawk. Ka puonbil hai khawm a lo insing hlak bawka a nih!!! Ka rohlu nei sun (rangkachak le lunghlu neka hlu lem) awlsam taka hmu el thei ding anga ka sawisak hlak leiin  hlu bek bek ta lo dingin an ring tawl ni ding a na. Mi a nuom ta phawtin an pur kawtlawk thei chu a hlunaw hrim ding ani ti chu ka hriet, anachu keia thil nei le lo tekhi nachang ka lo hriet ngai naw a nih,

Indik taka hril chun ka rohlu tak, pasal ka nei huna ka pasal kuoma ka present ding tak chu tuhin a common zo ta hle! A neitu bik mumal khawm umloin “training center” ang el an ta a. Kei khawma pawisakna khawm ka nei ta bawk nawh. Mihai khawma thuomhnaw man tlawmna hmun an pan hlak leiin kei khawma “entry fee” tlawmte chau lain a rukin dawr ka hawng ve el ta hlak a nih. Hieng hun lai hin ka chapo em leiin ka hrietchieng naw leia mi ka lo hmusit em em dam hi an um hlak. Message hlak chu dawn senglo ka dawnga, ka phone khawm chu mi bie nuoma mi Call tu an tam leiin an ring zing hlak bawk a. Ka thil hril hai hi ka uor taluo deu lo sawn pal in ta, ka nun indik tak ka hung hril a ni lem. Tuta ka la hung hril zawm pei dinghai khawm awi inla awinaw inla, kei chau niloin midang tam takin an tuok ve mek a nih.

A chang chun kei chau hi khawvela nuhmei umsun ang ela in ngaina dam hi ka nei hlak a. Nun khawhlo tak pum chun Class X (BSEM)ka hung in exam ve a, ka hriet zawng a hung suoknaw lei khawm ning a ta ka hlawsam der el a. Nisienkhawm ngaizawng ruok chu ka tlasam chuong nawh. Ngaizawng hi a kawp a thuo dam hin ka nei a, inhawi ka ti ve em em hlak a nih. Valentine’s Day, Krismas le Kumthar hai dam hin thilpek ka dawng rawn thei em em a. December 31 zan ngat lem hi chu tlangval mi hmangpui nuom an tam em em hlak. Tlangval ienga ka ngailo deu haiin an mi hung “call” dam hin ka lak hram hram a, ka biek peinaw luotin naupang inhnel lai hai dam kan biek tir a, fiemthu thawna damin ka hmang tawl mei mei hlak a nih.

Lekha tieng hi ka fena ding chi a ka ngai naw leiin kan chukna khawm ka tawpsan ta a. Sawtnawte hnunga vairam tienga ruolhaiin an mi fiel leiin ka zu f eve a, Company pakhat ah sin ka zu thaw ve ta a. Ka nu le pa hlak chun an mi duot em leiin ka nuom dan danin an min um tir el hi a ni a. Vairam ka zu umtir chun vaitawng ka thiemnaw leiin ruolhai pang belin ka zu khawsa a. Kumkhat hnung chun ka hung intodel ta deu bawk leiin mani khatin in ka hluo a, tlangval khawm Lamka Tlangval mei mei ni taloin Foreign tlangval le ngat kan hung inkawp tan ta a nih.

Khawvel inhawina khawm hi ka chen hne ngang ning a tih, a hlieu hin kan hlieu a ni tak zet el. Ka sin chawlni haia ka ngaizawngpa hin a mi hung umchil zie bawk hlak a. Iemanichen hnunga lem chu Saphaiin “Living Together” an ti ang chi hi kan hung ni ta a, ka ruolpa ruok chun midang kuoma a mi hrilna ah “Living To Get Her” a mi ti hlak ka ring. Ka khawsak inhawi ka ti em em a, sin ka thaw khawmin ka thawnaw khawmin pawisa chu ka hlaw suok zing el ta a nih. Ka sinthawna company a ka hlaw nek khawmin keia mimal company a hin sum ka hmu tha lem a. Ka nu le pa khawm pawisa tam deu deu ka thawna an lawm em em hlak a nih. Chuong pawisa hai chun motor dam an lo inchawk a, kohran le khawtlanga khawntesep hai khawm an lo pek tha thei em em a nih.

Hun a hung liem peia, zu le sa chena, ka ngaizawngpa le khumkhata riek khawm zing chu ka hun hmang dan a hung ni ta a. Ka nuomthu a tawpsan el thei khawm kan ta bawk nawh. Ka khawsak dana khawm hin insirna khawm ka nei ngai naw a, vengtieng ngaina hlekte khawm ka nei ngai nawh. Ka nu le pa hlak chu an hmang khawp pawisa ka thawn thei zing bawk leiin zuk ngaina khawm ka nei hran chuong nawh. Anni khawm pawisa ka thawn thei zing lei hin an lung a awi ve el khawm ning a tih. Keini hlak chu nupa ang elin a sun a zanin kan um kawp zing ta a, tukhawm kan inhnar bawk nawh. Midang khawma keini hi min hnar ding khawmin ka sie bik bawk nawh. Chuong laia ka ngaizawngpa chu Nigerian tlangval a ni a. Khawvela midum tak chi hai an nih. A dum em leiin powder hang nal inla khawm sahro vut paw hrul ang el mei mei ni dingin ka ring.

Nikhat chu kan thaw dan pangngaiin suok dinga kan inzui dawk tum lai, ka zuno thlit sa dawnzo tum aka zuk ban lai tak ka phone a hung inri a. Ka zuk en chun “MOM” ti a ka save number kha a ni a. Inrang deuin ka zuk lak a, “Hello Nunu” ka zuk ti le inruol chun phone a ka nu trap hawm hawm ri chu ka zuk hriet el ta a. Kei khawm chun rawl inlap dar dar pumin “Nunu, ieng thu am an ta leh…” ka zuk ti chu, “Tawinu, I pa a um ta naw a ni ie! Zinga a ruong nang dingin hung ngei ngei raw aw!!” tiin a mi hung biek el ta a. Ka beidawngin khawnghatna ding tieng khawm ka hriet nawh, ka kawla Nigerian tlangvalpa hlak chu hrilhai umngaina hreloin a lo buoi ve bawk. Kei chun ka nu kuoma, “Nu, ka pa a damnaw hmel khawm iengkhawm in hril si nawh, iengtinam a zuk thi el leh?” ka ti a, ka nu chun motor accident a thi a ni thu a mi hril a.

Chu nia ka nu trap hla insam chun ka lungril a mi sun vawng vawng a, ka ngaizawngpa le chu nia kan program hai khawm ka cancel pui vawng ta a. Ka pa umnaw hnunga ka nu a khat chaua a khawsak dan ding ka zuk ngaituo chun ka lungril a na em em a, zankhawvarin ka trap niin ka hriet. Zingkhuo a hung var chun flight ticket ka hang zawng leh ka hmu nghal a, in tieng pan chun ka vuong suok nghal ta a. Vuongna sunga khawm chun ka mitthli a far zawi zawi zinga, ka nun hmang dan hai khawm insirna nasa tak ka hung nei pha ta a. Sum hmu dan indikloin sum ka hmu a, chu sum chun motor kan inchawka, chuchu ka pa in a thi pha ta a nih, tiin kan ngaituo a, mani inthiemnawna nasa tak ka hung nei ta a nih. Ka sum hmu dan indiknaw leia hieng anga hremna tuok ka ni leiin midang hmeithai le fahra hai chan ding fazotuhai le ram hmasawnna ding sum fazotuhai chan ding khawm ka ngaingam naw hle! Kei chun ka damlai ngeiin ka suksuol ra ka sik a, thenkhat ruok chun an tu le te hai hun chena khawm an suksuolna ra an la sik thei a na ti dam ka ngaituo pei a. Vuongna sunga ka vuong zing lai chun sum hmuna indiklo hi hmang ngam a umnaw zie chieng takin ka hung hriet suok ta a.

In ka hang tlung chun ka pa chu kuong sunga dei bawra lo zal chu ka zuk hmu a. Khawvela ka pa neisunin “Tawinu I hung tlung an ta maw?” ti a hlim deua mi lo lawm thei talo a, a hmel tak ngiel khawm en tlaklo rak khawpa lo um el ta chu na hi ka ti em em a, a kuong bula chun ka ṭap ta hawm hawm el a. Ka pa kuoma ngaidam inhni ding ni lang khawm anhnu zo vawng tah. Hang ṭawng ka tum khawmin ka awm a ping a, kan nufa chaua maksana kan zuk um el chu na ka va hang ti rawng rawng de aw!

Ka tlung ni chun ka pa ruong khawm vui liemnghal a ni a. Ka nu khawma vairam tienga fe san talo dinga a mi ti leiin ka fe ta naw sawng a. Kan dawr chikte chu tha taka enkawla ka nu thu awia tha taka khawsak pui ka tum lem ta leiin vairam tienga kir chu ka nuom ta naw a nih. Vairam tienga ka ngaizawngpa khawm kha ka thlakhla ta chuong naw a, amakhawma mi thlakhla dingin ka ring chuong nawh.  Amiruokchu keiin ka hriet fuk naw lai khawma mi lo hre zingtu Vana Pathien tieng ka lungril ka pek ta lem a, ka suolna hai Pathien kuoma thupha chawiin ama ta ding chauin ka nun kan hlan fel thei ta a nih.

Tuhin chu nidanga mi ka lo hmusit le biek tlak lo a ka ngaihai chu kan hnar ve ta thung a, ruolhai laka khawm inzak takin ka um ta hlak a nih. Nisienkhawm Pathienin a mi hmangai em leiin ka pa hringna hmangin a kuom tieng a mi ko kir lem ta a nih. “Aw nang Nigerian tlangval, tuhin chu ka mamaw ta naw che. Hremhmun panna “channel” I mi hrawpuina a inthawkin sansuokin ka um ta a, tuhin “LifeOkay Channel” ka hraw lem ta a nih!!” ka ti ve thei ta a nih.

PS: Hi thu hi mi pakhat testimony K. Lianthansang kuoma ziek dinga a ti anga a hung ziek suok, www.phualvatimes.com a mi thei ang anga inlet sawnga hung insuo a nih.

Facebook Comments

Leave a Reply