Asteroids le Hun Nuhnung

Asteroids le Hun Nuhnung

By: Rev. Dr. Lalrosiem Songate

February 15, 2013 khan asteroid feet 65 vela sei chu van boruok a 40000 mph a hrata vuongin Russia rama Chelyabinsk khawpui chung mel 14 vela insangah a puokdar a, chuchun building iemani zat zet a nghawr siet a, darthlalang kawi darin mi tamtak a sukhliem bawk a nih.

Ei van boruok khi a liena lien el a na, a len zie ei hrietthiem theina dingin football field hi van boruok nisien, pen hmawr chikte hin a lailung ah hang sun dum met la, chu I sundum chu khawvel nisien, football field chu van boruok ang ning a tih. Hi van boruok incham duoi ahin asteroid le comet ei tihai an vuong vel vut vut zing a na, a țhen chu lien tak tak, tlang ruol ruol dam, football field ruol ruol dam, chuong neka lien dam, chin lem dam an nih. An vuong hrat zie chu darkar khata kilometer sing tela hrat dam an nih. Motor hi a hrat thei tawpin darkar khata kilometer 80 le 100 chen dam an tlan thei a, train hi darkar khata kilometer 200 dam an na, vuongna hi darkar khata kilometer 500-700 chen dam an nih. Hieng asteroid le comet hai darkar khata kilometer sing têla hrata vuong chu nasa tak a nih. Asteroid ei ti hi lung sakhat an ni a, comet hi chu van boruoka tuidei inkhal le hmunhnawk inhlawm khawm dam an nih, tiin mithiemhai chun an hril.

2013 kuma February thla a Russia khawpui chunga puokdar kha puok loin khawpui kha zuk deng ta ang sien, ieng anga sietna nasa am an tlun ding? Hi hman hi a la lien tawk naw a na. Hieng neka lien tlâng ruol hai dam hin hung deng ta sien, ieng ang sietna rapthlak am an tlun ding? Hieng neka lien lem hin ei khawvel an hung hnai hun hi a tam a, iengtikam a nih khawvel siet rawpna khawpin an la hung hung deng thei ding a nih.

June 5 le 6 hai khan ieng hreloa muong taka Covid-19 buoipuia hun ei hmang lai khan asteroid panga zetin ei khawvel hi an lo hung hnai a nih. Asteroid 2020 KA6 an ti chun June 5 khan ei hnuoi hi kilometer nuoi 44 velin a hung hnai a, chuchu van boruok inkhina dan chun hla lo tak a nih. Hi asteroid hi a vuong hrat dan chu darkar khatah kilometer 26000 a hrat a nih. Hi asteroid hi a lien rak naw a, van boruok ah hnuoi tawkse phak nawna chinah a puok dar a nih. Chun June 6 Inrinni khan asteroid dang football field ruol zeta lien Asteroid 2002 NN4 tia hriet chun darkar khatah kilometer 18000 vela hrata vuong chun ei hnuoi hi kilometer nuoi 50 le ti velin a hung hnai nawk a nih. Kilometer nuoi tel hi ei hnuoi inkhi dan Lamka le Imphal inkar tihai ang inkhina chun tam tak nisien khawm van boruok inkhina a ruok chu ieng rak an naw a nih.  

Hieng ang asteroid Himalay tlang ruol zeta lien, darkar khata kilometer sing tela hrata vuongin ei hnuoi hi hung deng ta ang sien chu sietna an tlun nasa hle ding a nih. Mithiemhai sui dan lem chun hnuoi a hung denga a puokdar nasat dan ding chu Japan rama Hiroshima hmuna Atomb bomb puok let maktaduoi telin a nasa lem ding an ti a nih. Chuchun leihnuoi lien tham tak intui a ta, chu hung inkhal nawka, mihriemhai khawsak thei nawkna ding chun kum tam tak ngai a tih. A siet nasat dan ding chu Nuclear bomb puok leh thuhmun tho ning a tih. Annawleh tuipui chunga dam hung tla ta sien, maihuona tui lung tuma ei deng per chuoi ang elin tuipui tui hung deng per a ta, tuifawn nasatak hung suokin tsunami rapthlak tak a hung inumtir thei bawk ding a nih. A rapthlak dan ding zie chu mani a hisap zawm el ding ni ta sien.

Hieng hun hi ei khawvel hin a hmasuon mek a nih. Ei Bible ah Thupuon 6:13 ah vana arasihai theichang ra thlipuiin a nuoi leia țil țuk țuk ang el a an la hung țil thlak ding thu a hril a nih. Thupuon bung 6 hi ei tiem chun inchikna pasari sut thu ei hmu a, hitaka thil tlunghai hi Tribulation huna thil tlung dinghai a hrilna a nih. Eini ringtuhai ta dinga a thlamuong umna chu Tribulation hun hma in rapture, mithienghlim lawr hung tlung a ta, vanram ah ei um ta ding a nih. Khawvel chunga Pathien zangaina khawm bo tang a ta, Pathien lungsenna berbu in khawvel a bur ta ding a ni leiin siet theina tinrengin khawvel hi a bawm ta ding hrim a nih. Rinumna le sietna nasatak tlung a ta, antichrist rorelna hnuoia khawvel hi um a tih. Chu huna sietna tlung ding laia pakhat chu van boruoka inthawka asteroid haiin hnuoi an zuk deng mur mur ding chu a nih. Zani laia asteroid hawnin ei hnuoi an hung hnai thuok thuokhai khawm chu hi hun hung hnai mek tah, a nauhase ințan khawm ni ta rawi naw nim. Chuleiin ei tulai khawvel hi ei en a, ei Covid-19 hri buoipui le hieng asteroid thuhai le rambung le rambung kar in nghirnghona po po dam ei hang thlir hin ei khawvel hin hun a hau taknaw zie hriet thei a nih.

Facebook Comments

Leave a Reply