A Hming chu Lucifer ning a tih

A HMING CHU LUCIFER NING A TIH
By: Rev. Dr. Lalrosiem Songate


Hming hi mitinin ei nuom nuom ei phuok thei a, amiruokchu, nuom nuom phuok thei a ni lai zingin a chin tawk chu um ngei sien a țha! England rama Derbyshire County huom sunga Chesterfield an ti hmuna khawsa Dan le Mandy Sheldon hai nupa chun nau pasalte an nei a, a hming dinga an phuok chu dangdai ve tak a nih. Tulai chu khawvel mihriem Lockdown hin a mi chawk buoi vawng a, anni khawm an lockdown leiin an naute thar zieklut ding chu zieklut thei vak loin an um a. Eini lai hin ei thaw kher ngainaw a chu ramdangahai hin naute pieng hrim hrim hi an zieklut nghal a, Birth Certificate le Social Security numberhai khawm an lak nghal hlak a nih. Anni khawm thlali veng vawng an nghak hnungin an inzieklutna ding Office khawm an hawng ta leiin va ziek lut dingin an inthawk ta a nih.

Dan le Mandy Sheldon hai hin an nau pasalte hminga an sak chu Lucifer, Lucifer Sheldon ti a nih. A rapthlak bawk, a dangdai ang reng bawk, a hming an hei hril ri chu a hre po chu a meng par awk awk el a nih. Chu office a thawktuhai khawm a barakhai em em a, a ziekluttunu Registrar khawm chun a zieklut pek nuom vak naw a. Pathien thu a awi le awinaw chu thudang nisien, naute hminga Lucifer hang ti ta ngat chu rapthlak a ti em em a, ziek khawm a ziek lut nuom nghal naw hrim a nih. A nu le pa kuoma chun hieng ang hming a put chun nakie school a kai pha khawm hotuhai endangna dam tuok thei a ni a, chun sin zawngna thua khawm harsatna tuok thei ngai a ni leiin hi hming em hi chu thawlo dingin a lo hrilpui a. A nu le pa hlak chun pawi an ti naw khawp el a, chu bak ah an naupa Lucifer Sheldon ti a an ko ding hi an phûr em em lem a ni zie thu an hril nghe nghe a nih.

Registrar nu chun ama thu ela chuong anga hming dangdai tak el naute hminga lo hei zieklut el chu a ngam naw leiin a chung tienga hotuhai khawm a hang râwn kuol vel a. Iemanichen a hang buoipui ngiel hnung chun dang theina dan khawm a nei chuong ta naw leiin a zieklut ta nghe nghe a nih. Naute chun Lucifer Sheldon hming put a ta, a hung tlangval chen khawmin a hming Lucifer a ni ta zing ding a nih. Chuong ang bawkin a nu le pa khawm eini laia nupui le papuihai inko danin Lucifer nu le Lucifer pa anni ta ding a nih! Pangzat khawm chu a um rêu rûou khawp el!

Iemani zawnga ngaituo chun Lucifer ti hming hi mawi ve tak a nih. Zawlnei Isai 14:12 na ei en chun Lucifer ti hming ei hmu a, a umzie chu sikhawvar tina a nih. Sikhawvar ei ti tak hi zingkar varțien laia planet Venus mawi em em a de hlak, Chawngmawi ei ti hlak kha a nih. Chun hilai thu hi Setan a tlûk hma thu hrilna a ni a, a mawi laia a hming put a nih. Setan hi Pathien vantirkohai laia a um lai, Lucifer hming a put lai khan chu mawi hle ding hrim a nih.

Amiruokchu, khang khawpa mawi kha Pathien laka a helna leiin Pathien hmelma kumhlun Setan a hung ni ta a nih. Setan ti umzie tak chu dotu annawleh khingtu tina a nih. Setan hin iengtiklai khawmin Pathien le a mihai hi a do zing hlak a nih. Setan hming dang nawk pakhat chu diebol a na, chuchu hêktu tina a nih. Setan hi diebol a nina chu Pathien mihai Pathien laka a hêk ngat ngat hlak a nih. Joba khawm kha Pathien hma bula a hêk a, Johan khawma “ei Pathien hmaa a sûn a zâna hêk hlaktu chu” (Thup. 12:10) tiin a hril nghe nghe bawk a nih. Setan hming dang pakhat chu rulpui (serpent) a na (Thup. 12:9), hihin mihlem hmang a ni zie a tarlang bawk a nih. Eden huona Adam le Evi a hlêm a, tulai khawmin mihriemhai hlêm a la ma naw a, khawvel tawp chena mi hlêma hun hmang zo ding a nih. Hremhmun hi Isu chun diebol le a tirkohai ta dinga buotsai a nih, tiin a hril a (Matth. 25:41), chu umzie chu mihriemhai umna dinga siem nilo a nih. Hi taka a tirkohai a ti hi Pathien laka a hel laia vantirko suol, ama zuituhai a tina a nih. Nisienlakhawm Setanhin a hremhmun hluopui dingin mihriemhai a tam thei ang tak hlêm a, fen lut a tum a, țhang khawm a lak nasa em em a nih.

Lucifer hi a tirin mawi hle sienkhawm Pathien laka a helna leia suol po po inhlawmkhawmna a hung ni tak zie ngaituo chun hming dinga zuk dit el ngaina khawm chu a umnaw a na. Anachu hi nupahai hin an naupa hming dingin an hang ditpui tlat el hi, naute lungsietum tak chu a nih. A hming khan thu a phur le phurnaw chu thukhat nisien, a nu le pa in Lucifer hming an zuk dit pek na ringawt hin an naute chunga hin Setan hi thuneina iemanichen an pek chu a ni ta hrim hrim a nih. Hi naute la hung puitling pei ding nuna hin Setanin hau tâwk chu a nei ta hrim hrim a nih.

Chun misuol tak khawmin tieng țhang an nei hlak, an lo ti ang deuin Setan hi ieng angin hmusie inlakhawm ngainatu le dittu chu a lo nei hrim chu a nih. Chuleiin Anton Lavey in Satan kohran hai chen indina Satanic Bible hai chen lo zieka Satan biekna kohran pawl a lo indin el dam ei ngaituo chun, naute hminga Lucifer hang sak el khawm chu awm an lo ti ma chu ni ding a nih.

An naute ruok chu naute lungsiet um tak a nih! Lalpa’n hi naupang nikhuo hrelo hi Krista thisenin inhuol khum tlat raw sen!

Facebook Comments

Leave a Reply