Pathien Thucha

Like Us on Facebook

Sukdamna Rawngbawlna ah Thlaihrik thatna a hmang

Doom Thlaihrik thatna a thut khum lai

Doom Thlaihrik thatna a thut khum lai

South Africa rama pastor pakhat chun sukdamna rawngbawlna a thawna ah thilhring thatna insecticide chikhat Doom an ti chu mipuihai a thut khum. Hieng thil a hmang hi dem hlaw vieu sienkhawm ama chun HIV le cancer natnahai sukdamna dinga Pathienin an hriettir ani thu a hril.

“Pathien ropuina dinga kan thaw a ni a. Mihaiin Pathien thilmak thaw hi hmuhai sien kan nuomna lei a nih. Pathien le chun iengkim thaw thei ani zie suk lang kan tum a nih” tiin Pastor Lethebo Rabalago, Limpopo biela Mount Zion General Assembly kohrana rawngbawltu chun a hril a nih.

An kohran thupuongtuin a hril dan chun Pastor pa hin khawhri hai kuoma mipuihai chunga harsatna an intlun zie thu a hril zeta, chu zoah an taksa haia inthawka suok dingin thu a peka a hnawtsuok ta hlak a nih, tiin an hril. Chun Doom ti khawm hi thil hming mei mei a nia, damna intluntu a hmang thei ani bawk a nih, a tih.

Pastorpa khawm hin hi thlaihrik thina damdawi mipui laia a thut lai thlalak a Facebook a hai a post a, Pathienin sukdamna hmangruo in a hmang ding a nih ti ringna ka nei ngei bawk. Chun hi thil hi phur hluta ka thaw khawm an naw a, Pathien rama hin phurhlut leia thaw hin umzie a neinaw a. Pathien ka ringa Pathien ring puma ei thaw phawt chun iengkim hi Pathienin hmangruoin a hmang thei vawng a nih, tiin Pastor Rabalgo chun a hril a nih.

“Genesis lekhabu ah Pathien thlarau chun tuipui lientak chung chu a awpkhum a ti ei hmu a. Chuleiin iengkim hi Pathien ta vawng an ni a, petrol khawm Doom khawm ama ta vawng an nih. Thenkhat hliem nasa tak leh an hunga Doom kan lo thut khum an dam pei el a nih,” tiin a hril bawk a nih.

Chuonglai zing chun Doom siem suoktu company hai chun Pastor pa kawla an thilsiem hi thlaihrik thatna dinga siem a na mihriem hriselna dinga thalo a nih ti an hril mawl mawla chu a pawpsa chuong naw a. South Africa sawrkar khawma a ngaimaw hle bawk.

Chuonglai zing chun pastor pa rawngbawlna leia damna changa inhril an um zing bawk a nih.

  

 

A nuhmei le chêngkawp nekin Jail runthim a thlang lem!

Larry Ripple

Larry Ripple

Thuvarhai hin nuhmei chungchang a hril nasa em em a, pahni hang tarlang ei tih. “Nuhmei ringum chu a pasal ta dingin lallukhum ana,” (Thuvarhai 12:4) tiin a hril a. Chun hmun dang ah “Nuhmei hrangsie le in liena um nek chun, inchung sîp kilkhâwra cheng chu a ṭha lem.” tiin a hril nawk bawka. Nuhmei sie le nuhmei ṭha hi kar hla tak an nih.

Nuhmei ṭha le ditum chu an thlawi hnung khawma tlangval ṭha lai khawm an la kuoi thlûk duol duol thei a. Lal Edward VIII khawm khan ram nitla senglo  chunga lala ṭhung nek chun a hmangai em em nuthlawi ṭang bêl a thlang lem hlau a ni kha!

Hien gang khawpa nuhmei ditum in pasal an dit dit an kuoithluk zung zung laiin Kansas City, Kansas a um kum 70  a upa tah Larry Ripple chun a nuhmei le in sunga chêng hmunkhat zing nekin jaila um a thlang lem ta tlat el.

Thlabul lai el kha a ni a, Larry Ripple le a nuhmei chu an insel buoi a. An vawikhat inselna el khawm a ni naw el thei, a san chu hieng lawm lawma a nuhmei bula um neka jail intang a zuk thlang lem el nasan chu an insel zing zing ta hlak baka, an nupa kar thu khawm a se vieu ni tang a tih. Larry chu inthawk vakin lekhapuon hleka, “Silai ka chawi a nih, to ṭawkin I pawisa kawl po kha mi hung pe rawh,” ti thu a zieka, a nuhmei an entir a, “Nang le cheng kawp nekin jail a um ka thlang lem,” ti pumin a suok a. Kansas City downtown tienga Bank of Labor building a chun a va lut a, Teller pakhat hma ah a va ngir a, a lekha ziek chu an entir a. Bank Teller khawm chun mani hringna chân nekin tiin to ṭawkin a pawisa kawl po $2924.00 a lo pek el a. Larry Ripple khawm chun a pawisa pek chu a laka an tawl sawna Bank Security pa bula a va ṭhunga a va titi bawr bawr ve el a.

Sawtnawte hnungin Police an hung tlan luta, Security pa khawm an vir buoi ve ṭan nghal a. Chu phing chun Larry Ripple khawm chun Police hai a va pana an mi zawng chu ama ngei ani ti thu a va hril ta a. Police hmun tieng an ṭhuoi nghala Bank Rawk na case an file a lungin ah an sie a. Thil um dan hai an hang sui peia, ama Larry Ripple in a hril dan le surveillance camera a inthawka an hmu dan hai khawm inmil peiin an hriet bawk a. Larry Ripple khawm chun pawisa dita inru tum hrim ani naw thu le a nuhmei bula um zing neka jail a intâng a nuom lem leia hieng thil a thaw a ni ti an hung hriet chieng ta a nih.

Ni nga vel jail an tang hnung chun thil um dan an sui suok vawng ta a, Court thurel angin a um nuom em em na jail a inthawka inthla suokin a um a, a um nuomnaw em em na a nuhmei bula um nawk ding chun an inthla suok nawk ta a nih.

Hi chanchin hi chanchin dangdai tak a ni lai zingin nuhmei khawm pasal khawmin ei in ennawn rawp dinga ṭha chu ka chengpui le damsunga a sie a ṭha a khawma ka khawsak pui ding ka pasal ka nuhmei ta ding hin cheng khawmpui rinum em em ka ni am, annawleh thlakhla um ka ni am? ti hi a nih.

 

Russia Dan Tharin Sakhuo Zalenna a Khuokhir

Vladimir Putin

Vladimir Putin

Russian President Vladimir Putin chun kar liem ta khan biekin puotienga Chanchin Tha rawngbawlna hrim hrim khapna dan an suo a, chuchu Soviet ram kawidar hnunga mihriem zalenna khuokhirna Dan khau taka hriet a la nih.

Great Commission Media Ministries a an president Hannu Haukka in a hril dan chun, “Hi dan thar hin 1929 laia Soviet Union anga zalenna inkhuokhirna ani a, tuhin khang hun lai ngirhmuna thuoikirin ei um nawk an tah,” tiin a hril.

Sawrkar thiltum tak chu rawlrala chetna le sakhaw kulmukna taluo laka inthawka invengna dinga siem hi Russian Parliament a Upper chamber khawma a remti pui ta nghe nghe a nih. Hi dan hin sawrkar hrietpuina a biekin sunga hai tilo a chu sakhuona thil hrim hrim hrildar khap hmak a nih.

Hi thu an hrieta inthawk hin Russia rama kohran tam tak chu insuikhawm in bunghei meua tawngtaina an nei tlut tlut bawk a. Tukhawm hin evangelical kohran ringawt 7000 vel hai chu hi dan thar hung um thutin a thawng nasa em em a, bunghei tawngtai an thaw nasa hle. Pathien khawm in a dawn ngei beisei a um hle bawk.

Hi dan dungzui hin ramdangmi missionary umhai khawm sawrkara inthawka sinthaw phalna (Work Permit) an neinaw chun biekin hai chena thuhril khawm phal ninaw ni haia. Chun ringlotuhai le Pathienthu hrilkhawm hrim hrim missionary sinthaw anga ngai ninga ta, dan anga hrem thei anni bawk an ta, mani mimal insunga sakhuona thil le inzawma thilthaw hrim hrim khawm khap ni bawk a tih.

Hieng baka kum 14 a inthawka a chungtieng Pathienthu hril hrim hrim dan anga hrem thei ning a ta, mimal tukhawma sakhuona thilthaw an hmua sawrkara report an peknaw chun anni khawm hrem thei ni bawk an tih.

Haukka chun khawvel hmun tina ringtuhai Russia ta dinga tawngtai dinga fielna a siem a, “Russia rama mak taka kharkhip in a um mek a. Dan thar siema um hi Lalpa in kohran an dinna san le inkal hmak a ni a. Hi dan thar hin tulai kohran hi tienlaia Soviet rama in suknawmnatna huna a keilut nawk mek a nih.” a tih.

Khawvel hmuntin ramtina kohranhai thangruola Russia ta dinga ei tawngtai mur mur hi a pawimaw hle a nih.

Krista hminga Ngaizawng chan ngam!

Tim Tebow & Olivia Culpo

Tim Tebow & Olivia Culpo

Thanksgiving Day hi nunghak le tlangval tamtak in an ngaizawng hai le hlim taka an hmang hlak nisienkhawm American Football star inlar tak le quarter back position a inkhel hlak, Kristien tlangval fel tak Tim Tebow ta ding ruok chun a hmangai em em a ngaizawngnu Miss USA le Miss Universe ni bawk nunghak hmeltha tawpkhawk Olivia Culpo in sam ang thena biethu an hlan khumna ni a ni ve thung. Amiruokchu an chanchin hretu taphawt chun tlangval Tim Tebow hi an ngaisang zie an khekpui ve tlat a nih.

Tlangval Tim hi Pathiena hringna thatak nei, ringtu indik tak a ni bak ah nuhmei a nei hma po chu a thienghlimna vawng zing dinga Pathien kuoma intiemkamna lo nei ta a nih. Khawvela nuhmei pasalna kawnga pawrche pawl taka ei ngai America rama hin ei hriet phak bak in nunghak tlangval tamtak nuhmei/pasal an innei hma chu an thienghlimna vawnghim tlat dinga intiem ringtu tam tak an um hrim a nih. Tv. Tim Tebow khawm chu chuong ang pawl laia mi a nih. Hieng anga intiem pawl hai hin inchikna dingin Purity Ring an ta, kutsebi chikhat an bun hlak anih. Hieng ang lo buntu in an tiemna a bawsiet pal chun a kutsebi chu a hlip ta hlak a nih.

A ngaizawngnu hlak chu khawvel pumpuia nunghak hmeltha taka thlang suok ngat a ni a. October thla laia inthawka kha lo in ngaizawng ta kha an ni a. Olivia hin a ngaizawngpa ringtu a ni zie le a thienghlimna vawnghim tum tlat mi a ni ti hre sienkhawm ama anga nunghak hmeltha laka chu an sum zo kuomkhuo a lo ring naw a nih. Tuta hma khawm

khan Olivia hin tlangval pakhat Nick Jonas a lo in ngaizawngpui ta hlak a. Ama pa khawm hi a thienghlimna vawng tlat dinga thutiem lo nei ve ta a, intiemna kutsebi hiel khawm lo bun ta a nih. Nisienlakhawm Olivia hai anga nunghak hmeltha laka a lo thang zo ta naw a, an in ngaizawng hnung sawtnawte ah an tiemkamna kutsebi chu a lo hlip ta a nih.

Olivia hin tlangval dang khawm a laka lo insum zo ngailo an ni ti a hriet leiin Tv. Tim Tebow khawm hin insum zo loin sex a la hmangpui tho beiseiin iemanichen chu a hang in ngaizawngpuia a hang inzuipuia chu a beisei angin Tim chu a hne bik ta naw a nih. Ngaizawng nei si a nuom hun huna sex hmangpui theilo ding chu Olivia hai anga hmeltha le umchin tawk hrelo hai ta ding chun umzie a neinaw ngei chu ni ding a na. A beidawngin sam ang thena biethu a hei inhlan thuoi el ta a nih.

Thena biethu an hlan ni hi November 26, Thangksgiving Day ni kha a ni a. Hi thu a lo hriet le inruolin Tv. Tim Tebow chun a Twitter ah Sam 118:1 na, “Aw Lalpa kuoma lawmthu hril ro, ama chu a tha si a, a ngilneina khawm kumkhawtluongin a um ding a ni si a!” ti thu hi a tweet nghe nghe a nih. Mi tam tak ta dingin ngaizawnghai le inthena hi thil lawmum ninaw sienkhawm Tv. Tim ruok chun Pathien kuoma lawmthu a hril lem hlau el a nih.

Pathien nauhai ta ding chun an ngaizawng le an hmangai em em hai le an kar thu a sie a, an innei a remnaw chun Pathienin an ta dingin a thalem dang a buotsai pek lei a ni rawp hlak!

 

1 2 3 82